مبارک ثانی کیس: سپریم کورٹ نے متنازع پیراگراف حذف کر دیے

‏پنجاب حکومت کی جانب سے صوبے میں تین روز کے لیے دفعہ 144 کا نفاذ لاہور ہائی کورٹ میں چیلنج کر دیا گیا ہے۔

درخواست گزار ملک نجی اللہ نےاظہر صدیق ایڈووکیٹ کے توسط سے دائر درخواست میں مؤقف اختیار کیا ہے کہ پاکستان تحریکِ انصاف کے پرامن احتجاج کو روکنے کے لیے صوبائی حکومت نے دفعہ 144 لگا دی ہے، حکومت کا یہ اقدام سیاسی بنیاد پر مبنی ہے۔

درخواست گزار نے عدالت سے استدعا کی ہے کہ دفعہ 144 کے نفاذ کے نوٹی فکیشن کو کالعدم قرار دیتے ہوئے پٹیشن کے حتمی فیصلے تک دفعہ 144 کا نفاذ معطل کیا جائے۔

درخواست میں پنجاب حکومت، سیکریٹری داخلہ اور ڈپٹی کمشنرز کو فریق بنایا گیا ہے۔

پاکستان تحریکِ انصاف لاہور کی مقامی قیادت نے اسلام آباد جلسے میں شرکت کا ارادہ رکھنے والے مقامی رہنماؤں اور کارکنوں کو حراست میں لینے کا دعویٰ کیا ہے۔

رکنِ پنجاب اسمبلی فرخ جاوید مون نے ایک ویڈیو بیان میں کہا ہے کہ پولیس نے انہیں گارڈن ٹاؤن کے علاقے میں رہائش گاہ پر نظر بند کر دیا ہے۔

انہوں نے دعویٰ کیا کہ وہ آج گھر سے نکل رہے تھے کہ پولیس نے انہیں اس کی اجازت نہیں دی اور بتایا کہ آج شام چار بجے تک گھر سے نہیں نکل سکتے۔فرخ جاوید مون کے مطابق انہیں گھر سے نکل کر اپنے دفتر بھی جانے نہیں دیا جا رہا۔

پی ٹی آئی نے دعویٰ کیا ہے کہ رات گئے پولیس نے کئی رہنما اور کارکنوں کے گھروں پر چھاپے بھی مارے ہیں۔

پی ٹی آئی کے مطابق پولیس نے مناواں سے اصغر گجراور شاہدرہ سے عبدالکریم خان اور واجد شاہ کو حراست میں لیا ہے اور یہ گرفتاریاں اسلام آباد جلسے کے پیشِ نظر کی گئی ہیں۔

پاکستان تحریکِ انصاف نے اسلام آباد کے علاقے ترنول چوک پر جمعرات کو شیڈول جلسہ ملتوی کر دیا ہے۔

اسلام آباد سے وائس آف امریکہ کے نمائندے عاصم علی رانا کے مطابق پی ٹی آئی رہنما اعظم سواتی نے کہا ہے کہ عمران خان کی ہدایت پر آج ہونے والا جلسہ ملتوی کر دیا گیا ہے اور اب یہ جلسہ آٹھ ستمبر کو ہو گا۔

اعظم سواتی کے مطابق بانی پی ٹی آئی نے انہیں جیل میں بلا کر جلسے سے متعلق ہدایات دی ہیں جب کہ چیئرمین تحریکِ انصاف بیرسٹر گوہر نے بھی جلسہ ملتوی کیے جانے کی تصدیق کی ہے۔

سپریم کورٹ جمعرات کو احمدی شہری مبارک احمد ثانی کی رہائی کے فیصلے کے خلاف وفاق کی متفرق درخواست کی سماعت کرے گی جب کہ تحفظِ ناموسِ رسالت نے اعلیٰ عدالت کے سامنے احتجاج کا اعلان کیا ہے۔

اسلام آباد سے وائس آف امریکہ کے نمائندے عاصم علی رانا کے مطابق مبارک احمد ثانی کیس کی سماعت سے قبل تحفظِ ناموسِ رسالت کے کارکن اسلام آباد میں جمع ہونا شروع ہو گئے ہیں۔

انتظامیہ نے کسی بھی ناخوش گوار صورتِ حال کے پیشِ نظر ریڈ زون کو پہلے ہی سیل کر دیا ہے۔

اس سے قبل پیر کو مبارک احمد ثانی کیس کے فیصلے کے خلاف احتجاج کرتے ہوئے مذہبی جماعتوں کے کارکنان ریڈ زون میں داخل ہو گئے تھے۔

ان افراد نے سپریم کورٹ پہنچنے کی بھی کوشش کی تھی۔

سپریم کورٹ کے حالیہ فیصلے کی روشنی میں مبارک احمد ثانی نامی شہری کو ضمانت پر رہائی ملی تھی جنہیں توہینِ مذہب کے الزامات کا سامنا ہے۔