وزير اعظم شهباز شريف چيو آهي ته عدالت جي اندران اٿڻ وارا آواز اميد جي ڪرڻي وانگر آهن ۽ هاڻي جيڪڏهن پارليامينٽ قانون سازي نه ڪئي ته پوءِ ايندڙ نسل اسان کي معاف نه ڪندو.
اڱاري ڏينهن پارليامينٽ جي گڏيل اجلاس ۾ خيالن جو اظهار ڪندي شهباز شريف چيو ته تارازيءَ جو توازن ئي ’’جهنگ جي قانون’’ کي بدليندو. اڄ ججن جا نالا ڳليءَ محلي ۾ ٻارن جي زبان تي آهن، جنهن کي ختم ڪرڻو پوندو. تڏهن وڃي انصاف کي اوج نصيب ٿيندو.
هن چيو ته پارليامينٽ کي اهو اختيار حاصل آهي ته اها ملڪ ۽ قوم جي مفاد کي سامهون رکندي ڪم ڪري.
وزير اعظم اليڪشن بابت پاڻ مرادي نوٽيس ڪيس ۾ ٻن ججن جي اختلافي فيصلي جو حوالو ڏيندي چيو ته فيصلي کان پوءِ قانون سازي نه ڪئي وئي ته مورخ اسان کي معاف نه ڪندو.
هن چيو ته، ’’اسان کي فيصلو ڪرڻو پوندو ته ڪروڙين عوام کي رليف ڏيڻو آهي يا هڪ لاڏلي کي؟ اڄ اسان کي فيصلو ڪرڻو آهي ته آئين ۽ قانون جي مطابق هلڻ گهرجي يا جهنگ جي قانون جي مطابق هلڻ کپي’’.
خيال رهي ته سپريم ڪورٽ جي ٻن ججن جسٽس منصور علي شاه ۽ جسٽس جمال مندوخيل جو چونڊن جي ڪيس متعلق فيصلي تي سومر ڏينهن اختلافي نوٽ سامهون آيو آهي.
ٻنهي ججن چيو آهي ته چيف جسٽس جي وسيع اختيارن جي ڪري عدالت تي تنقيد ٿئي ٿي ۽ هنن چيو ججن جي اختيارن تي ٻيهر نظر وجهڻ جي لاءِ هيءُ موزون وقت آهي.
خيال رهي ته چيف جسٽس سپريم ڪورٽ جسٽس عمر عطا بنديال پنجاب ۽ خيبرپختونخوا ۾ 90 ڏينهن ۾ چونڊون ڪرائڻ جي معاملي تي پاڻ مرادو نوٽيس ورتو هو.
وزير اعظم شهباز شريف چيو ته ’’اڄ عدالت جي اختيارن جي مذاق اڏائي پئي وڃي. هڪ لاڏلو عدالت ۾ پيش نه ٿو ٿئي. ان کي رات جي اونداهيءَ ۾ ضمانتون ڏنيون پيون وڃن. آئين سان ڀوڳ ٿي رهيو آهي’’.
قومي اسمبليءَ ۾ خيالن جي اظهار دوران شهباز شريف وڌيڪ چيو ته ملڪ ٻه واٽي تي اچي بيٺو آهي.’’خداءِ جي واسطي هن ملڪ کي بند ڳليءَ ۾ وڃڻ کان روڪيو وڃي. تاڙي ٻنهي هٿن سان وڄندي آهي. قانون ساز ۽ عدليه کي پنهنجو آئيني ۽ قانوني اختيار استعمال ڪرڻو پوندو’’.
وزير اعظم پنهنجي خطاب ۾ چيو ته عمران خان فوج جي اڳواڻ جي خلاف مهم هلائي. سندس چوڻ تي ٻاهرين ملڪن ۾ فوج جي خلاف مظاهرا ڪرايا ويا.
هن چيو ته جيسيتائين عمران خان قوم کان معافي نه گهري، تيسيتائين هن سان ڳالهائي نه ٿو سگهجي.
’حڪومت عدالتي اصلاحات جي ذريعي سپريم ڪورٽ کي ورهائڻ ٿي گهري’
حڪومت جي پاران عدالتي اصلاحات جي اطلاع تي رد عمل ڏيندي، تحريڪ انصاف جي اڳواڻ فواد چوڌريءَ چيو آهي ته حڪومت ان عمل جي ذريعي سپريم ڪورٽ کي تقسيم ڪرڻ گهري ٿي.
اسلام آباد ۾صحافين سان ڳالهائيندي فواد چوڌريءَ چيو ته اهڙي وقت عدالتي اصلاحن جي ڳالهه ڪرڻ جڏهن اليڪشن جو ڪيس ٻڌو پيو وڃي، حڪومت جي بدنيتي ظاهر ٿئي ٿي.
هن چيو ته مسلم ليگ (ن) جا ڪروڙين روپيا ان بيانئي تي لڳي چڪا آهن ته عدالت کي ڪهڙيءَ ريت نظرن کان ڪيرائيو وڃي.
فواد چوڌريءَ وڌيڪ چيو ته سپريم ڪورٽ آف پاڪستان ئي عدالتي اصلاحات ڪري سگهي ٿي.
’اليڪشن جي فيصلي کان اڳ اهو فيصلو ٿيندو ته 4/3 جي فيصلي کي 3/2 سان ڇو بدليو ويو’
ٻئي پاسي، مسلم ليگ (ن) جي سينئر نائب صدر مريم نواز چيو آهي ته اليڪشن ڪيس جي فيصلي کان اڳ اهو فيصلو ڪرڻ کپي ته 4/3 جي فيصلي کي 3/2 ۾ ڇو بدلايو ويو.
اڱاري ڏينهن پنهنجي ٽوئيٽ ۾ مريم نواز چيو ته اهو طئي ڪرڻ به ضروري آهي ته ان فيصلي ۾ ڪير ڪير شامل آهي. هن اهم ترين نڪتي کي واضح ڪرڻ کان سواءِ زور ۽ زبردستيءَ سان قانون جي خلاف فيصلا رليءَ هيٺان لڪائڻ وارو انداز هرگز قبول نه ڪيو ويندو.
