افغانستان جي پرڏيهي وزارت جي ٻاهران خود ڪش بم ڌماڪي ۾ گهٽ ۾ گهٽ ڇهه ڄڻا اجل جو شڪار ٿيا ۽ ڪيترا ئي زخمي ٿيا آهن.
اکين ڏٺي شاهدن ۽ ڊاڪٽرن جي اطلاعن مطابق ۽ اٽليءَ جي پاران قائم ڪيل بين الاقوامي انساني همدريءَ جي تنظيم، امرجينسي ءَان ڳالهه جي تصديق ڪئي آهي ته ان جي اسپتال ۾ زخمين کي آندو ويو آهي، جن ۾ هڪ ٻار به شامل آهي.
ذريعن وائس آف آمريڪا کي ٻڌايو آهي ته ڌماڪي ۾ هڪ سيڪيورٽي چوواٽي کي ان وقت نشانو بڻايو ويو جڏهن وزارت جا ملازم واپس وڃي رهيا هيا.
فوتگين جي ان کان وڏي انگ جا اطلاع به مليا آهن.ليڪن طالبان اختياريءَ وارن فوري طور تي ان واقعي تي ڪو تبصرو نه ڪيو آهي ۽ نه ئي ڌماڪي جي نوعيت جي باري ۾ معلوم ٿي سگهيو آهي.
اڃان ڪنهن گروپ ان هاڃيڪار بم ڌماڪي جي ذمي داري قبول نه ڪئي آهي. افغانستان ۾ پوئين هفتي رمضان جي ڀلاري مهيني ۾ ان وقت حملو ٿيو جڏهن روزو رکيو پئي ويو.
ان کان اڳ دهشت گرد گروه، اسلامڪ اسٽيٽ خراسان يا داعش خراسان دهشت گرد حملن جي ذمي داري قبول ڪندو رهيو آهي.
سومر جي ئي ڏينهن طالبان اعلان ڪيو هو ته هنن بلخ ۾ ڪاروائيءَ دوران داعش خراسان جي ٽن اهم ميمبرن کي هلاڪ ڪيو آهي، جن منجهان هڪ جي سڃاڻپ مولوي ضياالدين جي نالي سان ڪئي وئي آهي. ۽ دعوا ڪئي وئي هئي ته هو نالي ڪوٺيو گورنر ۽ گروپ جو ٻيو اهم ترين عمل دار هو.
افغانستان جي لاءِ آمريڪا جي اڳوڻي خصوصي ايلچي، زلمي خليل زاد پنهنجي هڪ ٽوئيٽ ۾ چيو آهي ته جيڪڏهن ان ڳالهه جي تصديق ٿي وڃي ٿي ته اها ڳالهه اتر افغانستان ۾ داعش خراسان جي لاءِ تمام وڏو لوڏو ثابت ٿيندي.
گزريل مهيني گڏيل قومن جي اداري جي هڪ رپورٽ جي لاءِ رڪن ملڪن جي پاران شيئر ڪيل انٽيلي جينس خبردار ڪيو هو ته داعش خراسان وٽ 1000 کان 3000 تائين ويڙهاڪ آهن جن ڪابل ۽ افغان صوبن ڪنڙ، ننگرهار ۽ نورستان ۾ پنهنجا سيل قائم ڪيا آهن. اهي سمورا علائقا پاڪستان جي سرحد سان لاڳاپيل آهن.
(وي او اي نيوز)
