ووٹ انتخابی دفاتر تک کیسے پہنچتے ہیں؟
امریکہ میں الیکشن کے دن ووٹنگ ختم ہونے کے بعد ووٹوں کو انتخابی دفاتر تک حفاظت سے پہنچانے کے لیے مختلف ریاستوں میں متعدد طریقے اپنائے جاتے ہیں۔
اہم سوئنگ ریاست پنسلوینیا میں مختلف کاؤنٹیز اس مقصد کےلیے کئی طریقے استعمال کرتی ہیں۔ پولیس اپنی حفاظت میں سیل بند کنٹینرز اور دیگر دستاویزات کو انتخابی دفاتر تک پہنچاتی ہے۔
مثال کے طور پر ہیرس برگ کے مشرق میں واقع کاؤنٹی کے اسسٹنٹ ڈائریکٹر الیکشن اسیفنی نوجیری کے مطابق برکس کاؤنٹی میں پول ورکرز ووٹوں کو سیل بند ڈبوں میں کاؤنٹی الیکشن آفس تک واپس لے کر جائیں گےجہاں انہیں ایک محفوظ کمرے میں لاک کر دیا جائے گا۔
فلاڈیلفیا میں قانون نافذ کرنے والے مقامی ادارے پولنگ کے مراکز سے ووٹوں کے ڈبے اکٹھے کرنے میں براہ راست کردار ادا کرتے ہیں۔
فلاڈیلفیا کے سٹی کمشنربلوسٹین نے، جو اس شہر کے انتخابات نگران بورڈ میں خدمات انجام دیتے ہیں کہا کہ پولنگ ختم ہونے کے بعد فلاڈیلفیا کے پولیس افسر شہر بھر کے پولنگ کے مراکز پر جائیں گے اور ووٹوں کے ڈبوں کو اکٹھا کر کے انہیں رات ختم ہونے پر ہمارے ہیڈ کوارٹر میں واپس بھیجیں گے۔
وہاں سے کاؤنٹی پولیس کی نگرانی میں ووٹوں کو ایک گودام تک پہنچایا جاتا ہے جہاں انہیں مفقل پنجرو ں میں محفوظ کیا جاتا ہے جن کی 24 گھنٹے نگرانی کی جاتی ہے۔
اٹلانٹا کے پانچ پولنگ مقامات پر بموں کی دھمکی
اٹلانٹا کی ایک اور کاؤنٹی میں بم کی موجودگی کی دھمکیوں کی وجہ سے ووٹنگ متاثر ہوئی ہے۔ پولنگ بند ہونے سے تقریباً ایک گھنٹہ قبل ڈیکلب کاؤنٹی کے حکام نے کہا کہ انہیں پانچ پولنگ مقامات پر بم کی دھمکیاں موصول ہوئی ہیں۔
ڈیموکریٹک اکثریتی علاقے کے عہدیداروں نے کہا کہ ان مقامات پر ووٹنگ پولیس کی جانب سےاس بات کی تصدیق تک روک دی گئی کہ وہاں کوئی بم نہیں ہے۔ کاؤنٹی حکام کا کہنا ہے کہ وہ ووٹنگ کے وقت میں توسیع کے لیے عدالتی حکم کی کوشش کر رہے ہیں جو جارجیا میں معمول کی بات ہے۔
فلٹن اور گوینیٹ کاؤنٹیز میں کچھ پولنگ مقامات کو منگل کے شروع میں دھمکیاں موصول ہوئی تھیں جو غلط ثابت ہوئیں۔
ڈیکلب میں الیکشنز ڈائریکٹر کیشا اسمتھ نے ایک بیان میں کہا کہ وہ اس بات کو یقینی بنانے کے لیے تیزی سے کام کر رہے ہیں کہ ہر ووٹر کو بم کی دھمکیوں کے باوجود ووٹ ڈالنے کا موقع ملے۔
ڈونلڈ ٹرمپ کو کئی ریاستوں میں کامیابی حاصل
صدارتی انتخابات کے اب تک کے نتائج کےمطابق ری پبلکن پارٹی کے صدارتی امیدوار سابق صدر ڈونلڈ ٹرمپ نے کئی ریاستوں میں کامیابی حاصل کر لی ہے۔
انہوں نے ساؤتھ کیرولائنا، فلوریڈا، ٹینیسی، اوکلاہوما، الاباما، مسی سیپی، ویسٹ ورجینیا، انڈیانا اور کینٹکی میں کامیابی اپنے نام کی ہے۔