پاکستان کے وزیرِ داخلہ رانا ثناء اللہ خان نے کہا ہے کہ صدرِ مملکت الیکشن کمیشن کو غیر قانونی و غیر آئینی احکامات پر مجبور نہیں کر سکتے اس لیے وہ آئین کی حد میں رہیں اور اپنے دفتر کو بلیک میلنگ کا اڈا نہ بنائیں۔
صدر عارف علوی نے پنجاب اور خیبر پختونخوا میں انتخابات سے متعلق تاریخ دینے کے لیے چیف الیکشن کمشنر سکندر سلطان راجا کوپیر کو ایوانِ صدر میں مدعو کیا تھا البتہ الیکشن کمیشن نے اجلاس میں آنے سے معذرت کر لی ہے۔
وزیرِ داخلہ رانا ثناء اللہ خان نے پیر کو سوشل میڈیا پر ایک بیان میں کہا کہ صدر علوی 'آ بیل مجھے مار' والے کام نہ کریں اور خوامخواہ معاملے میں ٹانگ نہ اڑائیں۔
انہوں نے کہا کہ "الیکشن کی تاریخ دینے سے صدر کا کوئی لینا دینا نہیں ہے۔الیکشن کمیشن آپ کا غلام نہیں کہ جو آپ کہیں وہ مانے۔"
رانا ثناءاللہ کے بقول عمران خان نے معیشت، خارجہ تعلقات اور قومی مفادات کو نقصان پہنچایا۔ اب ریاستی سربراہ کے منصب کو سازش کے لیے استعمال کر رہے ہیں۔
صدر علوی ”آ بیل مجھے مار“ والے کام نہ کریں، آئین کی حد میں رہیں، صدر کے دفتر کو بلیک میلنگ کا اڈہ نہ بنائیں؛ الیکشن کی تاریخ دینے سے صدر کا کوئی لینا دینا نہیں، عارف علوی خوامخواہ ٹانگ نہ اڑائیں، صدر الیکشن کمشن کو غیرقانونی اور غیر آئینی احکامات پر مجبور نہیں کر سکتا۔
— Rana SanaUllah Khan (@RanaSanaullahPK) February 20, 2023
سیکریٹری الیکشن کمیشن عمر حمید نے پیر کو بذریعہ خط صدار کے دفتر کو آگاہ کیا تھا کہ الیکشن کمیشن کے حکام اجلاس میں شرکت نہیں کر سکتے۔
خط کے متن کے مطابق پنجاب اور خیبر پختونخوا میں انتخابات کی تاریخ سے متعلق معاملات عدالتوں میں زیرِ التوا ہیں اس لیے الیکشن کمیشن ایوانِ صدر میں پیر کو ہونے والے اجلاس میں شرکت نہیں کرے گا۔