|
ویب ڈیسک — سابق امریکی صدر ڈونلڈ ٹرمپ پر انتخابی ریلی کے دوران ہونے والے قاتلانہ حملے پر عالمی رہنماؤں کی جانب سے بھی ردِعمل سامنے آ رہا ہے۔
سابق صدر امریکی ریاست پینسلوینیا میں انتخابی ریلی کے دوران فائرنگ سے زخمی ہو گئے تھے۔ اس دوران حملہ آور اور ریلی میں شریک ایک شخص ہلاک جب کہ دو افراد زخمی ہو گئے۔
پاکستان
صدرِ پاکستان آصف علی زرداری اور وزیرِ اعظم شہباز شریف نے سابق صدر ڈونلڈ ٹرمپ پر انتخابی ریلی کے دوران حملے کی مذمت کی ہے۔
آصف زرداری اور شہباز شریف کا الگ الگ بیانات میں کہنا تھا کہ سیاست میں تشدد کی کوئی جگہ نہیں ہے۔
شہباز شریف کے بقول اس مشکل وقت میں اُن کی ہمدردیاں اور نیک خواہشات ڈونلڈ ٹرمپ کے خاندان کے ساتھ ہیں۔
آصف زرداری نے حملے کے دوران انسانی جانوں کے ضیاع پر بھی افسوس کا اظہار کیا ہے۔
Just learnt that former President Trump was shot at an election rally. This is a shocking development. I condemn all violence in politics. Wish the former President swift recovery and good health.
— Shehbaz Sharif (@CMShehbaz) July 14, 2024
بھارت
بھارتی وزیراعظم نریندر مودی کا کہنا تھا کہ وہ اپنے دوست (ڈونلڈ ٹرمپ) پر ہونے والے حملے پر شدید فکر مند ہیں۔ مودی کا کہنا تھا کہ سیاست اور جمہوریت میں تشدد کی کوئی جگہ نہیں ہے۔
Deeply concerned by the attack on my friend, former President Donald Trump. Strongly condemn the incident. Violence has no place in politics and democracies. Wish him speedy recovery. Our thoughts and prayers are with the family of the deceased, those injured and the American…
— Narendra Modi (@narendramodi) July 14, 2024
چین
چینی صدر شی جن پنگ نے ٹرمپ پر ہونے والے قاتلانہ حملے پر ان کے ساتھ ہمدردی کا اظہار کیا ہے۔
چینی وزارت خارجہ کی جانب سے جاری کردہ بیان میں کہا گیا ہے کہ چین سابق صدر پر ہونے والے حملے سے متعلق صورت حال پر نظر رکھے ہوئے ہے۔
یورپی یونین
یورپی یونین کے خارجہ پالیسی کے سربراہ جوزف بوریل کا ڈونلڈ ٹرمپ پر ہونے والے حملے پر کہنا ہے کہ ایک بار پھر وہ سیاسی رہنماؤں کے خلاف ہونے والا ناقابلِ برداشت تشدد دیکھ رہے ہیں۔
برطانیہ
برطانوی وزیرِ اعظم کیر سٹارمر کا اتوار کو کہنا تھا کہ وہ ریلی کے مناظر دیکھ کر گھبرا گئے ہیں۔ ان کا مزید کہنا تھا کہ کسی بھی حالت میں سیاسی تشدد کی ہمارے معاشروں میں جگہ نہیں ہے۔
اسرائیل
اسرائیلی وزیراعظم بن یامین نیتن یاہو کا کہنا ہے کہ وہ اور ان ک اہلیہ سابق صدر ٹرمپ پر کیے جانے والے حملے سے صدمے میں ہیں۔
نیتن یاہو کا مزید کہنا تھا کہ وہ ان کی حفاظت اور جلد صحت یابی کے لیے دعا گو ہیں۔
Your browser doesn’t support HTML5
اٹلی
اطالوی وزیراعظم جارجیا میلونی نے کہا کہ وہ پینسلوینیا سے آنے والی اپ ڈیٹس دیکھ رہی ہیں اور ٹرمپ کی جلد صحت یابی کے لیے دعا گو ہیں۔
یوکرین
یوکرین کے صدر ولادیمیر زیلنسکی کا کہنا ہے کہ انہیں سابق صدر پر ہونے والی فائرنگ کے بارے میں جان کر حیرانی ہوئی اور وہ ٹرمپ کی جلد صحت یابی کے لیے دعا گو ہیں۔
ان کا مزید کہنا تھا کہ اس طرح کے تشدد کا دنیا میں کہیں بھی کوئی جواز نہیں ہے اور نہ کوئی جگہ ہے۔
برازیل، ارجنٹائن، جاپان، آسٹریلیا اور نیوزی لینڈ کی قیادت نے بھی ٹرمپ پر ہونے والے حملے کی مذمت کی ہے۔