پاکستان کے سابق وزیرِ اعظم عمران خان کی جانب سے قتل کی سازش کے مسلسل دعووں کے بعد تحریکِ انصاف نے کہا ہے کہ ایک سابق فوجی افسر کو پارٹی قائد کی سیکیورٹی کا انچارج لگا دیا گیا ہے۔
پاکستان تحریکِ انصاف (پی ٹی آئی)کے مطابق سابق ایس ایس جی کمانڈو لیفٹننٹ کرنل عاصم کو عمران خان کی سیکیورٹی کے لیے ٹیم کا سربراہ تعینات کیا گیا ہے۔
تحریکِ انصاف نے اپنے آفیشل ٹوئٹر اکاؤنٹ سے ایک ٹوئٹ میں عوام سے عمران خان کی سلامتی کے لیے خصوصی دعاؤں کی بھی درخواست کی ہے۔
پی ٹی آئی کے مطابق عمران خان نے طاقت ور مافیا کو چیلنج کیا ہے اور وہ تمام خطرات سے آگاہ ہیں۔
Dear all, please make a special prayer for Chairman Imran Khan%27s safety! He has challenged very powerful mafia and is aware of the risks, we can make a difference with our prayers. Our collective effort will help, InshaAllah! #امپورٹڈ_حکومت_نامنظور
— PTI (@PTIofficial) May 17, 2022
یاد رہے کہ عمران خان اپنے جلسوں میں اب تواتر کے ساتھ یہ دعوے کر رہے ہیں کہ جس طرح ان کی حکومت ایک سازش کے تحت ختم کی گئی اسی طرح اب ان کی جان لینے کے لیے ایک سازش رچائی جا رہی ہے۔
سابق وزیرِ اعظم نے حال ہی میں سیالکوٹ اور فیصل آباد کے جلسوں میں قتل کی سازش کا دعویٰ کیا تھا لیکن انہوں نے سازش کرنے والوں کے نام نہیں بتائے تھے۔
عمران خان کے ان دعووں پر وفاقی وزیرِ داخلہ رانا ثنااللہ کہتے ہیں سابق وزیرِ اعظم اپنی سیکیورٹی کو سیاسی پراپیگنڈے کے طورپر پیش نہ کریں۔ اگر ان کے پاس شواہد ہیں تو انہیں شیئر کریں۔
رانا ثنااللہ نے پیر کو ایک ٹوئٹ میں کہا کہ اگر عمران خان اپنی جان کو خطرے سے متعلق معلومات فراہم نہیں کرتے تو امریکی سازش کے بیانیے کی طرح ان کے سیکیورٹی خطرات کے بیانیے کو بھی ایک پولیٹیکل اسٹنٹ تصور کیا جائے گا۔
حکومت اس معاملے کی مکمل تحقیقات کروانے کیلئے تیارہے۔ اگر سابق وزیراعظم عمران نیازی چاہیں تو جان کو خطرے سے متعلق معاملے پر ایک جوڈیشل کمیشن بھی قائم کرسکتے ہیں۔جوڈیشل کمیشن عمران نیازی کے فراہم کردہ شواہد اور معلومات کا جائزہ لیکر آزادانہ فیصلہ دے سکتا ہے۔
— Rana SanaUllah Khan (@RanaSanaullahPK) May 16, 2022