سپریم کورٹ آف پاکستان کے آرٹیکل 63 اے کی تشریح سے متعلق صدارتی ریفرنس پر فیصلے کے بعد جہاں یہ سوالات اٹھائے جا رہے ہیں کہ مرکز میں شہباز شریف اور پنجاب میں حمزہ شہباز کی حکومت برقرار رہے گی یا نہیں وہیں عدالتی فیصلے پر تنقید بھی کی جا رہی ہے۔
سپریم کورٹ نے منگل کو اپنے فیصلے میں قرار دیا تھا کہ اگر کوئی رکن اسمبلی پارٹی ہدایات کے خلاف ووٹ دیتا ہے تو وہ ووٹ شمار نہیں ہو گا اور منحرف رکن کو پارٹی پالیسی کا پابند ہونا چاہیے۔
سابق وزیرِ اعظم عمران خان نے سپریم کورٹ کے فیصلے کا خیرمقدم کیا ہے جب کہ تحریک انصاف کے رہنماؤں کی جانب سے کہا جا رہا ہے کہ چوں کہ شہباز شریف کی حکومت کے حق میں بعض منحرف ارکان نے ووٹ دیا تھا اس لیے عدالتی فیصلے کے بعد اب وہ وزیرِ اعظم نہیں رہے۔
فواد چوہدری کے بقول اعلیٰ عدالت کے فیصلے کے بعد وفاق اور پنجاب کی حکومتیں اپنا جواز کھو بیٹھی ہیں۔ اس لیے انہیں استعفیٰ دے کر فوری نئے انتخابات کی جانب جانا چاہیے۔
مرکز میں حکومت برقرار رکھنے کے لیے حکمراں اتحاد کے پاس 172 ارکان کا نمبر پورا ہے لیکن پنجاب میں حمزہ شہباز کی حکومت کے لیے نمبرز گیم اہمیت اختیار کر گئی ہے۔ دوسری جانب اعلیٰ عدالت کے فیصلے پر ناقدین سوالات بھی اٹھا رہے ہیں۔
صحافی کامران یوسف سپریم کورٹ کے فیصلے پر تبصرہ کرتے ہوئے کہتے ہیں کہ عدالت کا فیصلہ دو دھاری تلوار ہے۔ ان کے بقول اس فیصلے کا منفی پہلو یہ ہے کہ پارٹی کا رکن قیادت سے معمولی اختلاف بھی نہیں کر پائے گا اور نہ لیڈر کو اپنی جماعت کے ارکان کی پرواہ ہو گی۔
سپریم کورٹ کا فیصلہ دو دھاری تلوار ہے۔ اس فیصلے کا منفی پہلو یہ ہے کہ پاکستان میں وراثتی سیاست اور پارٹی کے اندر آمریت کو فروغ ملے گا، پارٹی رکن لیڈر سے معمولی اختلاف بھی نہیں کر پائے گا اور نہ لیڈر کو اپنی پارٹی کے اراکین کی پرواہ ہو گی۔ پارٹی لیڈر صحیح معنوں میں امر بن جائے گا
— Kamran Yousaf (@Kamran_Yousaf) May 17, 2022
کامران یوسف کہتے ہیں سپریم کورٹ کے فیصلے کے بعد پاکستان میں وراثتی سیاست اور پارٹی کے اندر آمریت کو فروغ ملے گا اور پارٹی کا سربراہ صحیح معنوں میں آمر بن جائے گا۔
قانونی ماہر ریما عمر کہتی ہیں پارٹی لائن کے خلاف ووٹ دینے کا طریقہ کیا ہے؟ اس پر سپریم کورٹ اپنے مختصر فیصلے میں بظاہر خاموش نظر آتی ہے۔
قانونی ماہرین کہتے ہیں آرٹیکل 63 اے میں واضح لکھا ہے کہ رکنِ قومی و صوبائی اسمبلی اگر پارٹی پالیسی کے خلاف ووٹ دیتا ہے تو بعض کیسز میں وہ ڈی سیٹ ہو جاتا ہے لیکن یہ نہیں کہا جا سکتا کہ ان کے ووٹ کو شمار نہیں کیا جا سکتا۔
1/2 For the purposes of de-seating, Art 63A provides a clear procedure: party head initiates proceedings/makes declaration of defection; ECP confirms/rejects; SC hears appealWhat is the procedure for discarding votes cast against party line? SC short order seems to be silent
— Reema Omer (@reema_omer) May 17, 2022
سابقِ دورِ حکومت کے اٹارنی جنرل خالد جاوید خان ماضی میں ایک ٹی وی پروگرام میں اس حوالے سے کہہ چکے ہیں کہ آئین کا آرٹیکل 95 تمام ارکان کو ووٹ کا حق دیتا ہے چاہے اس کے جو بھی نتائج ہوں۔
سپریم کورٹ کے فیصلے پر محمد تقی نامی ٹوئٹر صارف کہتے ہیں جب ووٹ گننا نہیں ہے تو ووٹ کا حق ہی کیوں ہے۔ انہوں نے تبصرہ کیا کہ حلف اٹھاتے ہی ہر رکن پارلیمان اپنا ووٹ اپنی جماعت کے قائد کو پکڑا کر گھر چلا جائے۔
جب ووٹ گننا نہیں ہے تو ووٹ کا حق ہی کیوں ہے۔ حلف اٹھاتے ہی ہر رکن پارلیمان اپنا نیابتی proxy ووٹ اپنی جماعت کے قائد کو پکڑا کر گھر چلا جائے#SupremeCourt
— Mohammad Taqi (@mazdaki) May 17, 2022
تحریکِ انصاف کے منحرف رکنِ قومی اسمبلی راجا ریاض نے اپنے ایک ٹوئٹ میں سوال اٹھایا کہ اگر کوئی رکن اسمبلی پارٹی کے خلاف ووٹ نہیں دے سکتا تو پھر عدم اعتماد کی شق کا کیا مقصد ہے؟
سپریم کورٹ کا فیصلہ سر آنکھوں پر لیکن اگر کوئی رکن اسمبلی پارٹی کے خلاف ووٹ نہیں دے سکتا تو پھر عدم اعتماد کی شق کیا مقصد؟
— Raja Riaz Ahmad Khan (@RajakhanMNA110) May 17, 2022
یاد رہے کہ سابق وزیرِ اعظم عمران خان کی حکومت کا خاتمہ عدم اعتماد کے قانونی طریقے سے ہوا تھا اور تحریکِ انصاف سمیت حکمراں اتحاد میں شامل مسلم لیگ (ق )کے منحرف ارکان نے اپوزیشن کا ساتھ دیا تھا۔
صحافی غریدہ فاروقی نے سپریم کورٹ کے فیصلے پر تبصرہ کرتے ہوئے کہا کہ مرکز میں شہباز شریف اور پنجاب میں حمزہ شہباز کی حکومت برقرار رہے گی اور عمران خان کو نئے انتخابات کے لیے طویل انتظار کرنا پڑے گا۔
سپریم کورٹ فیصلے کے بعد بھی مرکز میں شہباز شریف، پنجاب میں حمزہ شریف کی حکومت برقرار رہے گی۔ عمران خان کو فریش الیکشن کےلئے طویل انتظار کرنا پڑے گا۔
— Gharidah Farooqi (@GFarooqi) May 17, 2022