عوامی مسلم لیگ کے سربراہ اور تحریک انصاف کے اتحادی سابق وفاقی وزیر شیخ رشید کو گرفتار کر لیا گیا ہے۔
شیخ رشید کے بھتیجے راشد شفیق نے ایک نجی ٹیلی ویژن سے گفتگو میں سابق وفاقی وزیر کی گرفتاری کی تصدیق کی ہے۔
راشد شفیق نے بتایا ہے کہ اسلام آباد ہائی کورٹ سے ان کے خلاف دائر درخواست میں ریلیف مل گیا تھا۔ اس کے باوجود ان کو گرفتار کیا گیا ہے جو ،ان کے بقول، توہین عدالت کے مترادف ہے۔انہوں نے کہا کہ وہ اس گرفتاری کو عدالت میں چیلنج کریں گے۔
شیخ رشید کو تھانہ آبپارہ کی پولیس نے گرفتار کیا ہے۔اس سلسلے میں دی جانے والی درخواست میں الزام لگایا گیا ہے کہ شیخ رشید نے اپنے ایک انٹرویو میں آصف ررداری پر عمران خان کو قتل کرانے کی سازش کا الزام لگایا تھا۔
ایک شہری راجہ عنایت کی جانب سے دی جانے والی درخواست میں کہا گیا ہے کہ شیخ رشید نے ایک سازش کے تحت آصف علی زرداری پر الزام لگایا ہے۔ اس الزام سے انہوں نے سابق صدر اور ان کے خاندان کی زندگی کو مستقل خطرے میں ڈال دیا ہے۔
درخواست میں کہا گیا ہے کہ الزا م کے ذریعے سازش کرنے پر شیخ رشید سمیت دیگر افراد کے خلاف قانونی کارروائی کی جائے۔
پاکستان تحریک انصاف کے سربراہ عمران خان نے شیخ رشید کی گرفتاری کی مذمت کرتے ہوئے کہا ہے کہ اس بنیاد پر تاریخ میں کبھی کسی کو گرفتار نہیں کیا گیا۔
Strongly condemn arrest of Sh Rasheed.Never in our history have we had such a biased, vindictive Caretaker govt appt by totally discredited ECP. Question is can Pak afford a street movement which we are being pushed towards at a time when we have been bankrupted by Imported Govt?
— Imran Khan (@ImranKhanPTI) February 1, 2023
اس سے قبل اسلام آباد پولیس نے ایک ٹوئٹ کے ذریعے شیخ رشید کو پولیس کے سامنے پیش ہونے کا آخری موقع دیا تھا۔
شیخ رشید کی طلبی۔۔شیخ رشید احمد کےلیے آخری موقعہ کل شام 4 بجے تک پولیس کے روبرو پیش ہوں۔شیخ رشید احمد پولیس انکوائری میں تعاون نہیں کررہے ہیں۔شیخ رشید احمد ایک بالواسطہ پیغام میں آصف زرداری پر لگائے گئے الزامات سے منحرف ہوگئے ۔⏬
— Islamabad Police (@ICT_Police) January 31, 2023
شیخ رشید نے اپنی گرفتاری کے بعد صحافیوں سے بات کرتے ہوئے کہا ہے کہ اس سب کے پیچھے وزیر داخلہ رانا ثنااللہ کا ہاتھ ہے۔
انہوں نے الزام لگایا کہ کم از کم 100 افراد سیڑھیوں کی مدد سے ان کے گھر میں داخل ہوئے۔ دروازے اور کھڑکیاں توڑ دیں۔ گھر کی تلاشی لی اور ملازموں کو مارا پیٹا۔
عوامی مسلم لیگ کے چیئرمین اور عمران خان کے اتحادی شیخ رشید کا کہنا تھا کہ ان کی ضمانت منظور ہونے کے باوجود پولیس نے انہیں گرفتار کیا اور زبردستی اپنی گاڑی میں لے گئے۔