افغانستان کے دارالحکومت کابل کی ایک مسجد میں دھماکے میں امام ملا ایاز نیازی کی ہلاکت پر جہاں افغان اعلیٰ حکام نے مذمت کی ہے وہاں طالبان کی جانب سے بھی مذمتی بیان سامنے آیا ہے۔
کابل کے گرین زون میں واقع مشہور مسجد وزیر اکبر خان میں منگل کی شام بم دھماکہ ہوا تھا۔ دھماکے میں دو افراد ہلاک جب کہ دو زخمی ہوئے تھے۔
افغان وزارت داخلہ کے ترجمان طارق آریان کے مطابق مسجد میں شام ساڑھے سات بجے اس وقت دھماکہ ہوا جب نمازی مغرب کی نماز ادا کر چکے تھے۔
دھماکے کی شدت سے قریب کی دیگر عمارتوں کو بھی نقصان پہنچا جب کہ سیکیورٹی حکام نے مسجد میں نصب ایک اور بم ناکارہ بنانے کا بھی دعویٰ کیا۔
خیال رہے کہ ایاز نیازی نے اسلامی تعلیمات میں پی ایچ ڈی کیا تھا۔ ان کی رہائش مسجد کے ساتھ واقع عمارت میں تھی۔ نماز کے بعد وہ اپنے گھر واپس جا رہے تھے جب دھماکہ ہوا جس کی زد میں آ کر وہ زخمی ہوئے۔
مسجد وزیر اکبر خان کابل کے انتہائی سیکیورٹی والے اس علاقے میں واقع ہے جہاں کئی ممالک کے سفارت خانے اور متعدد بین الاقوامی تنظیموں کے دفاتر ہیں۔
یہ مسجد سفارتی علاقے کے داخلی مقام پر واقع ہے اور اس میں سفارتی علاقے اور باہر، دونوں جانب سے داخل ہوا جا سکتا ہے۔
وزارت داخلہ کے ترجمان کے مطابق ہلاک ہونے والوں میں مسجد کے امام اور معروف مذہبی اسکالر مولوی محمد ایاز نیازی بھی شامل تھے۔ مولوی نیازی دھماکے میں زخمی ہوئے تھے اور بعد ازاں اسپتال میں دوران علاج چل بسے۔
افغان ذرائع ابلاغ کے مطابق مولوی ایاز نیازی کابل میں خاصے مشہور تھے۔ ان کے سیاسی خیالات کے حامل وعظ اور بیانات سننے کے لیے بڑی تعداد میں لوگ اس مسجد کا رُخ کرتے تھے۔
افغان صدر اشرف غنی کے ترجمان نے اس دھماکے کو گھناؤنا حملہ قرار دیا ہے۔
(1/3) محمد اشرف غنی رئیس جمهوری اسلامی افغانستان قبل از ظهر امروز طی مراسمی به پیکر دوکتور محمد ایاز نیازی امام و خطیب مسجد جامع وزیر محمد اکبرخان که روز گذشته در حملۀ تروریستی به این مسجد، به شهادت رسید، ادای احترام کرد. pic.twitter.com/JkjDl0hcNm
— ارگ (@ARG_AFG) June 3, 2020
ابتدائی طور پر حکام نے اس دھماکے کو خودکش حملہ قرار دیا تھا لیکن بعد ازاں بتایا تھا کہ دھماکہ پہلے سے نصب بارودی مواد کے ذریعے کیا گیا۔
حکام کے مطابق دھماکہ خیز مواد مسجد کے احاطے میں وضو خانے کے قریب نصب کیا گیا تھا۔
صدر اشرف غنی نے بدھ کو مولوی ایاز نیازی کا آخری دیدار کیا۔ اس موقع پر انہوں نے ملا ایاز نیازی کو افغانستان کا ایک روشن خیال اسکالر اور مذہبی رہنما قرار دیا اور حملہ کرنے والوں کو اسلام کے احکامات اور افغان معاشرے کی روایات سے لاعلم قرار دیا۔
(3/3) وی بالای طالبان صدا زد و گفت: آتش بس را که در زمان عید سعید فطر که موجب خشنودی مردم شد، ادامه داده و خود را از حرکات افراطی جدا سازید، تا به زودی مذاکرات صلح آغار گردد.
— ارگ (@ARG_AFG) June 3, 2020
انہوں نے طالبان پر بھی زور دیا کہ وہ عید پر کیے جانے والی جنگ بندی کو جاری رکھیں کیوں کہ اس سے عوام کو خوشی ہوئی تھی۔
افغانستان کی قومی مفاہمتی کونسل کے چیئرمین عبداللہ عبداللہ نے ایک بیان میں کہا ہے کہ جرائم پیشہ دہشت گردوں نے ایک بار پھر ایک مذہبی شخصیت کو نشانہ بنایا ہے۔ وہ اس عظیم مذہبی شخصیت کے خیالات کو اپنے شدت پسندانہ نظریے کے لیے خطرہ محسوس کرتے تھے۔
Criminal terrorists struck once again at a towering religious figure in our country. They view great religious scholars as a major threat against their extremist ideology. 1/2 pic.twitter.com/9vdeUcTsGl
— Dr. Abdullah Abdullah (@DrabdullahCE) June 2, 2020
عبداللہ عبداللہ نے کہا کہ دہشت گردوں نے محمد ایاز نیازی کو قتل کر دیا ہے لیکن وہ ان کے حقیقی مذہبی خیالات کی میراث کو ختم نہیں کر سکتے۔
افغانستان کے سابق صدر حامد کرزئی نے بھی ایاز نیازی کی بم دھماکے میں ہلاکت کی مذمت اور اس پر افسوس کا اظہار کیا ہے۔
I am deeply grieved by the profoundly saddening martyrdom of Dr Ayaz Niazi & other worshipers caused by a heinous terrorist attack inside Wazir Akbar Khan Mosque, Kabul. Prof. Niazi was Afghanistan’s renowned academic and highly regarded religious scholar. He was a peace 1... pic.twitter.com/wPlfnYqaWf
— Hamid Karzai (@KarzaiH) June 2, 2020
دوسری جانب طالبان نے بھی دھماکے کی مذمت کی ہے۔ طالبان ترجمان ذبیح اللہ مجاہد نے ایک ٹوئٹ میں کہا ہے کہ طالبان مسجد وزیر اکبر خان میں دھماکے اور ملا محمد ایاز نیازی کی ہلاکت کی شدید مذمت کرتے ہیں۔
#توضیحات:باتأسف اطلاع حاصل نمودیم که امام مسجد وزیر محمداکبرخان مولوی صاحب محمد ایاز نیازی در یک انفجار به شهادت رسید.ما حمله بر وی را شدیدا نیکوهش میکنیم و آن را جنایت بزرگ میدانیم.
— Zabihullah (..ذبـــــیح الله م ) (@Zabehulah_M33) June 2, 2020
مقامی میڈیا کے مطابق افغان دارالحکومت کابل میں گزشتہ دو ماہ میں 30 سے زائد دھماکے ہوئے ہیں جن میں دیسی ساختہ بم اور سڑک کنارے نصب بارودی مواد استعمال کیا گیا۔
منگل کو مسجد میں ہونے والے دھماکے کی ذمہ داری کسی بھی گروہ یا تنظیم نے قبول نہیں کی تاہم حالیہ دنوں میں افغانستان میں ہونے والے کئی دھماکوں کی ذمہ داری شدت پسند تنظیم داعش قبول کرتی رہی ہے۔