امریکہ کے صدر ڈونلڈ ٹرمپ نے خبردار کیا ہے کہ اگر ایران نے اس کے عسکری اڈوں، فوجیوں یا اثاثوں پرحملہ کیا تو تہران کی 52 تنصیبات کو فوری طور پر نشانہ بنایا جائے گا۔
صدر ٹرمپ کا یہ بھی کہنا تھا کہ اہداف کو انتہائی پھرتی اور شدت سے نشانہ بنایا جائے گا۔
صدر کا کہنا تھا کہ 1979 میں تہران میں 52 امریکیوں کو یرغمال بنایا گیا تھا، امریکہ مزید خطرہ نہیں چاہتا۔
صدر نے اہداف کی نشاندہی نہیں کی تاہم ان کا کہنا تھا کہ ان میں سے بعض مقامات ایران کے لیے نہایت اہم اور حساس ترین ہیں۔
....targeted 52 Iranian sites (representing the 52 American hostages taken by Iran many years ago), some at a very high level & important to Iran & the Iranian culture, and those targets, and Iran itself, WILL BE HIT VERY FAST AND VERY HARD. The USA wants no more threats!
— Donald J. Trump (@realDonaldTrump) January 4, 2020
خیال کیا جارہا ہے کہ یہ بیان ایرانی کمانڈر جنرل غلام علی ابو حمزہ کی جانب سے گزشتہ روز دیئے گئے اس بیان کے تناظر میں سامنے آیا ہے جس میں انہوں نے کہا تھا کہ امریکہ کو جنرل سلیمانی پر حملے کا جواب دیا جائے گا۔
جنرل غلام علی ابو حمزہ نے اپنے بیان میں یہ بھی کہا تھاکہ آبنائے ہرمز میں امریکی جنگی جہاز اور سمیت 35 تنصیبات ایران کے ہدف پر ہیں۔
امریکہ نے تین جنوری کو عراق کے دارالحکومت بغداد میں ایئر پورٹ پر حملے میں ایران کی القدس فورس کے کمانڈر جنرل قاسم سلیمانی کو نشانہ بنایا تھا جس کے نتیجے میں وہ دیگر افراد کے ہمراہ ہلاک ہو گئے تھے۔
ایران کے سپریم لیڈر آیت اللہ خامنہ اور صدر حسن روحانی نے واقعے پرسخت رد عمل کا اظہار کرتے ہوئے کہا تھا کہ اس کا بدلہ لیا جائے گا۔
ادھر ہفتے کو رات گئے بغداد میں واقع گرین زون میں دو راکٹ گرے جن سے وہاں موجود مکانات، سرکاری دفاتر اور غیر ملکی سفارت خانے کو نقصان پہنچا۔
دوسری جانب ایرانی جنرل قاسم سلیمانی کی میت اتوار کی صبح ایرانی شہر نجف پہنچا دی گئیں جو بعد میں ان کے آبائی شہر کرمان لے جائی جائے گی جہاں منگل کو انہیں سپرد خاک کیا جائے گا۔