'ہم زندہ ہیں مگر جی نہیں رہے:' افغان خواتین

ویب ڈیسک — 

افغان خواتین اور لڑکیوں کے حقوق پر طالبان کی عائدہ کردہ منظم پابندیوں سے انہیں متعدد ایسے امراض کا سامنا ہے جو پابندیوں کے جاری رہنے کی صورت میں موت کا باعث بن سکتی ہیں اور ایسا ہونا 'نسوانی قتل عام' کے مترادف ہو گا۔

یہ بات اقوام متحدہ کی انسانی حقوق کی کونسل کے مقرر کردہ ماہرین نے ملک کے آٹھ روزہ دورے کے بعد بتائی۔ آزاد انہ طور پر کام کرنے والے یہ ماہرین اگلے ماہ دورۂ افغانستان سے متعلق اپنی ایک مفصل رپورٹ پیش کریں گے۔

اپنے تاثرات بیان کرتے ہوئے ان ماہرین نے کہا کہ ایک افغان خاتون نے پابندیوں سے دشوار حالات کے بارے میں بتایا کہ "ہم زندہ ہیں مگر جی نہیں رہے۔"

'افغانستان میں خواتین پر پابندیاں اسلام نہیں ہے'

ایک مشترکہ بیان میں ماہرین نے نوٹ کیا کہ وہ ذہنی صحت کے وسیع مسائل اور خواتین اور لڑکیوں میں بڑھتی ہوئی خودکشیوں کے بارے میں فکر مند ہیں۔

پابندیوں کے اثرات

طالبان کی طرف سے سن 2021 میں افغانستان میں اقتدار پر قبضہ کرنے کے بعد سے پابندیوں کو " صنفی بنیاد پر امتیاز" قرار دیتے ہوئے ماہرین نے کہا کہ یہ پابندیاں خواتین اور لڑکیوں کے حقوق کو منظم طریقے سے چھیننے کے برابر ہیں۔

بیان میں ماہرین نے کہا کہ افغانستان میں جاری ان "خوفناک" انسانی حقوق کی خلاف ورزیوں نے طالبان دور سے پہلےسے ملک میں چلے آرہے صنفی بنیاد پر امتیازی سلوک کے ان دیگر پہلوؤں پر پردہ ڈال دیا ہے جو اب "معاشرے میں گہرے طور پر جڑے ہوئے ہیں اور معمول بن چکے ہیں۔"

طالبان کے سبب دو بار افغانستان چھوڑنے والوں کی داستان

خیال رہے کہ افغانستان میں خواتین کو چھٹی جماعت سے آگے کی تعلیم کے لیے اسکول اور یونیورسٹی جانے پر طالبان کی طرف سے پابندی نافذ ہے۔ مزید یہ کہ صرف خواتین ڈاکٹر ہی خواتین کی صحت کی دیکھ بھال کرسکتی ہیں۔

اس کے علاوہ ، طالبان کی پابندیوں نے خواتین کو اقوام متحدہ اور غیر سرکاری تنظیموں (این جی اوز) میں کام کرنے سے روک دیا ہے۔

مسلم رہنما افغان خواتین کی تعلیم اور دیگر حقوق کے لیے مل کر کام کریں، ملالہ

گھر میں نظر بندی کی زندگی

افغانستان میں انسانی حقوق کی صورت حال پر خصوصی نمائندے رچرڈ بینیٹ اور ورکنگ گروپ کی چیئر ڈوروتھی نے اپنے دورے کے دوران طالبان رہنماؤں اور کابل، مزار شریف اور بلخ میں بعض خواتین سے بات کی۔

متعدد خواتین نے انسانی حقوق کے علم برداروں سے ملاقاتوں میں اپنے خوف اور انتہائی تشویش کے جذبات کا اظہار کیا اور اپنی صورت حال کو گھر میں نظربند زندگی" کے طور پر بیان کیا۔"

انہوں نے کہا کہ ہمیں خاص طور پر اس حقیقت پر بھی تشویش ہے کہ جو خواتین ان جابرانہ اقدامات کے خلاف پرامن طور پر احتجاج کرتی ہیں انہیں دھمکیوں، ہراساں کیے جانے، حراست اور تشدد کا سامنا کرنا پڑتا ہے۔

انسانی حقوق کے ماہرین نے جنوبی افریقہ کے نسلی امتیاز کے دور کی اصطلاح استعمال کرتے ہوئے کہا کہ دنیا کو افغانستان میں جاری اس "صنفی امتیاز" کے معاملے پر چشم پوشی سے کام نہیں لینا چاہیے۔