تحریکِ انصاف کا احتجاج، اسلام آباد میں فوج تعینات کردی گئی

وفاقی حکومت نے پانچ سے 17 اکتوبر تک اسلام آباد میں فوج تعینات کرنے کی منظوری دے دی ہے۔

وزارتِ داخلہ کی جانب سے جاری کیے گئے نوٹی فکیشن کے مطابق رواں ماہ شنگھائی تعاون تنظیم (ایس سی او) اجلاس کے دوران اسلام آباد میں فوج تعینات رہے گی۔

آرٹیکل 245 کے تحت اسلام اباد میں فوج تعینات کی جائے گی۔ وزیر اعظم کی منظوری کے بعد فوج تعیناتی کا نوٹی فکیشن جاری کیا گیا ہے۔

پاکستان تحریکِ انصاف (پی ٹی آئی) کے اسلام آباد میں احتجاج کے دوران سابق وزیرِ اعظم عمران خان کی دو بہنوں کو حراست میں لے لیا گیا ہے۔

عمران خان کی بہن علیمہ خان کو ڈی چوک سے گرفتار کیا گیا۔ عمران خان کی بہن عظمی خان کو بھی پولیس نے حراست میں لے لیا ہے۔ دونوں بہنوں کو تھانہ سیکریٹریٹ منتقل کر دیا گیا۔

پاکستان تحریکِ انصاف (پی ٹی آئی) کی جانب سے اسلام آباد میں احتجاج کی کال کے بعد کارکن ڈی چوک سمیت مختلف مقامات پر جمع ہو رہے ہیں۔

وائس آف امریکہ کے نمائندے عاصم علی رانا کے مطابق کارکنوں کو منتشر کرنے کے لیے پولیس کی جانب سے شیلنگ بھی کی گئی ہے۔ اسلام آباد شہر میں داخلے کے راستوں پر پولیس نے کنٹینر لگا رکھے ہیں جب کہ بڑی تعداد میں پولیس اہلکار بھی تعینات ہیں۔

پاکستان کے وفاقی وزیرِ اطلاعات عطا اللہ تارڑ نے کہا ہے کہ شنگھائی تعاون تنظیم کا انعقاد پاکستان کے لیے بہت بڑا اعزاز کی بات ہے۔ ایسے موقع پر احتجاج منفی پیغام ہے۔

جمعے کو اپنے ایک پیغام میں وزیرِ اطلاعات نے کہا کہ سی پیک کے آغاز پر بانی پی ٹی آئی نے دھرنا دیا تھا۔ ہمیں پاکستان کا مثبت تشخص دنیا کو دکھانا ہے۔

انہوں نے کہا کہ پارلیمنٹ کے فلور پر احتجاج کیا جائے۔ سڑکوں پر احتجاج سے منفی تاثر جائے گا۔ علی امین گنڈاپور کو مشورہ ہے کہ وہ پشاور جائیں اور ٹرانسپورٹ کے کرائے کم کریں۔