امریکی ریاست یوٹاہ پیٹھا کدو کی پیداوار میں ملک بھر میں شہرت رکھتی ہے، جہاں پیدا ہونے والے پیٹھے اپنے وزن اور سائز کے اعتبار سے دوسرے تمام علاقوں کی نسبت نمایاں طور پر آگے رہتے ہیں۔
لیکن اس سال نئی فصل نے وزن کے تمام سابقہ ریکارڈ توڑ دیتے ہیں۔ اور وہاں کم ازکم 8 ایسے پیٹھا کدو سامنے آ چکے ہیں، جن کا وزن ایک ہزار پونڈ یعنی 455 کلو گرام سے زیادہ ہے۔
یوٹاہ میں زیادہ وزن کے پیٹھا کا سالانہ مقابلہ بھی ہوتا ہے۔ حال ہی میں ہونے والے 16 ویں سالانہ مقابلے میں جس پیٹھے کو پہلا انعام ملا ہے اس کا وزن 1826 پونڈ یعنی 830 کلو سے زیادہ ہے
یہ پیٹھا کدو ایک مقامی کاشت کار محمد صادق کے کھیت میں پیدا ہوا ہے۔ اس سے قبل بڑے سائز کے پیٹھے عموماً گرین ہاوسز میں پیدا ہوتے رہے ہیں۔ یہ پہلا ایسا بھاری اور زیادہ وزن کا پیٹھا ہے جو فارم سے باہر ایک عام کسان کے کھیت میں پیدا ہوا ہے۔
اس مقابلے کے منتظمین کا کہنا ہے کہ یہ یوٹاہ کی تاریخ کا دوسرا سب سے وزنی پیٹھا ہے۔
زیادہ وزن کے پیٹھا کدو کے مقابلے کی ایک اور تقریب 10 اکتوبر کو پلیزنٹ گروو شہر کے ایک فارم میں منعقد کی جائے گی۔
امریکہ میں پیٹھا کھانے اور میٹھے پکوانوں کے ساتھ مختلف تقریبات میں بھی استعمال ہوتا ہے۔ جن میں ہالوین سب سے نمایاں ہے، جس میں زیادہ تر لوگ اپنے گھروں کے باہر پیٹھے کو بڑی خوبصورتی سے سجاتے ہیں۔ یہ تقریب اکتوبر کے آخر میں منائی جاتی ہے۔
