جرمن فوج نے بتایا ہے کہ اس کے فوجیوں نے شمالی افغانستان میں غلطی سے پانچ افغان فوجیوں کو ہلاک کر دیا ہے۔
ہفتے کے روز یہ واقعہ اس وقت پیش آیا جب جرمن فوجی قندوز کے قریب اس علاقے کی طرف جا رہے تھے جہاں جمعے کے روز طالبان باغیوں کے ساتھ خوں ریز جھڑپ ہوئی تھی۔ اس جھڑپ میں تین جرمن فوجی ہلاک اور کئی زخمی ہو گئے تھے۔
فوج نے بتایا کہ جرمن گشتی دستے نے دو غیر فوجی گاڑیوں کو رکنے کا اشارہ کیا، اور حکم عدولی پر ان پر فائر کھول دیا۔ فوج کو بعد میں پتا چلا کہ ان گاڑیوں کے اندر افغان فوجی سوار تھے۔
نیٹو نے ہفتے کے روز ایک بیان جاری کیا جس میں مرنے والے افغان فوجیوں کے خاندانوں سے تعزیت کی گئی ہے۔ نیٹو کے ترجمان نے کہا کہ نیٹو افغان فوج کے ساتھ مشترکہ کارروائیوں کو بہت احتیاط سے ترتیب دیتی ہے اور اس قسم کے واقعات سے ان کوششوں کو نقصان پہنچتا ہے۔
افغان وزارتِ دفاع نے بھی فوجیوں کے خاندانوں کے ساتھ ہم دردی کا اظہار کیا ہے۔
نیٹو اور وزارت اس واقعے کی چھان بین کر رہے ہیں۔
