فائزر ویکسین کے اثرات، برازیل میں ایک پورے علاقے کی آبادی پر تحقیق
فائزر ویکسین بنانے والی کمپنی کا کہنا ہے کہ اس نے برازیل کے ایک علاقے میں پوری آبادی پر ویکسین کے اثرات کا مطالعہ کرنے کا فیصلہ کیا ہے۔
جنوبی برازیل کے ٹولیڈو نامی علاقے میں 12 برس سے زائد عمر کے تمام افراد پر ویکسین کے اثرات اور کرونا وائرس سے متاثر ہونے کے عمل کا جائزہ لیا جائے گا۔
ٹولیڈو کی آبادی لگ بھگ ایک لاکھ 23 ہزار نفوس پر مشتمل ہے۔ اس تحقیق میں برازیل کے نیشنل ویکسی نیشن پروگرام، محکمۂ صحت کے مقامی حکام، ایک اسپتال اور ایک وفاقی یونیورسٹی کی معاونت حاصل ہو گی۔
فائزر کا کہنا ہے کہ اس تحقیقی مطالعے کا مقصد کرونا وائرس کے حقیقی زندگی پر ویکسی نیشن کے بعد کے اثرات کا جائزہ لینا ہے۔
پاکستان میں مزید 12 سو افراد متاثر
پاکستان میں کرونا وائرس سے مزید 12 سو افراد متاثر ہوئے ہیں۔
سرکاری اعداد و شمار کے مطابق پاکستان میں گزشتہ 24 گھنٹوں میں 46 ہزار 477 ٹیسٹ کیے گئے جن کے مثبت آنے کی شرح 2.6 فی صد تھی۔
اعداد و شمار کے مطابق گزشتہ روز مزید 1212 افراد کے وبا سے متاثر ہونے کی تصدیق ہوئی جس کے بعد زیرِ علاج افراد کی تعداد 44 ہزار 828 ہو گئی ہے۔
فائزر ویکسین چھ ماہ تک مؤثر، پھر بوسٹر کی ضرورت پڑ سکتی ہے: رپورٹ
ایک نئی مطالعاتی رپورٹ سے ظاہر ہوتا ہے کہ فائزر اور بائیواین ٹیک کی تیار کردہ کووڈ 19 کی ویکسین کی دو خوراکیں چھ ماہ تک مؤثر ثابت ہوتی ہیں۔ دوسری خوراک کے بعد انسان وائرس کے اثرات سے بچا رہتا ہے اور اسپتال داخل ہونے کی ضرورت پیش نہیں آتی۔
فائزر کے تحقیق کاروں کے علاوہ امریکہ میں قائم صحت کی دیکھ بھال سے وابستہ ادارے، کائزر پرماننٹے کے تقریباً تین کروڑ 40 افراد کے ریکارڈ کا جائزہ لیا گیا۔ ریکارڈ کا یہ جائزہ دسمبر 2020ء اور اس سال اگست تک کے دورانیے سے تعلق رکھتا تھا، جن کا کائزر کے جنوبی کیلی فورنیا کے ہیلتھ انشورنس اور صحت کی سہولیات فراہم کرنے والے اداروں سے وابستہ ارکان سے تعلق تھا۔
یہ مطالعہ، جو پیر کے روز 'دی لانسے میڈیکل جرنل' میں شائع ہوا ہے، اس سے یہ بھی پتا چلتا ہے کہ ویکسین کی دوسری خوراک کے بعد یہ کم از کم چھ ماہ کے لیے ڈیلٹا جیسے انتہائی متعدی ویرئنٹ کے خلاف 93 فی صد حد تک مؤثر ہے۔
لیکن، تحقیق کاروں نے اس بات کا بھی پتا چلایا ہے کہ چھ ماہ کی مدت پوری ہونے کے ایک ماہ بعد 88 فی صد سے کم ہو کر 47 فی صد رہ جاتی ہے۔
یہ نئی معالعاتی رپورٹ اسی دن شائع ہوئی ہے جب ادویات سے متعلق یورپی یونین کے ادارے نے 18 اور اس سے زیادہ عمر کے افراد کو فائزر اور بائیو این ٹیک کی کووڈ 19 ویکسین کے بوسٹر شاٹس لگانے کی منظوری دی ہے۔ تاہم، یورپی یونین نے بوسٹر لگانے یا نہ لگانے کی اجازت دینے کو رکن ملکوں کا انفرادی فیصلہ قرار دیا ہے۔
رپورٹر کی ڈائری: 'شاپنگ مال پہنچی تو گارڈ نے پوچھا ویکسی نیشن کارڈ ہے؟'
کیا آپ کے پاس ویکسی نیشن کارڈ ہے؟ اگر ہے تو دکھا دیں پھر ہی میں آپ کو اندر فوڈ کورٹ میں جانے کی اجازت دوں گا۔
یہ جملہ میری سماعت سے تب ٹکرایا جب شہرِ کراچی کے سب سے بڑے شاپنگ مال 'لکی ون' میں داخلے کے لیے کئی درجن افراد قطار میں پریشان کھڑے تھے اور اس جملے کو سننے کے بعد دھیمی آواز میں سیکیورٹی گارڈ کی منت سماجت کر رہے تھے جو ناکام ثابت ہو رہی تھی۔ کیوں کہ ان میں سے بیشتر افراد نجی کیب سروس اوبر، کریم یا پھر رکشے کا کرایہ ادا کر کے یہاں تک پہنچے تھے۔ لیکن ان کے پاس ویکسی نیشن کا کوئی بھی ثبوت نہیں تھا تو انہیں واپس جانے کا کہہ دیا گیا تھا۔
جب میرے گھر والوں کی باری آئی تو مجھ سے بھی ویکسی نیشن کارڈ کا مطالبہ کیا گیا۔ میں نے اور میری بہن نے فوراً ہی کارڈ پیش کردیا، مجھ سے میرا نام پوچھا گیا اور نادرا کا جاری کردہ کارڈ دیکھ کر جس پر میری تصویر موجود تھی، جانے کی اجازت دی گئی۔ جب کہ میری بہن جس کے پاس ویکسی نیشن سینٹر کا بنا ہوا کارڈ تھا، جو بنا تصویر کے تھا۔ جس پر انہوں نے تصدیق کے لیے بہن سے شناختی کارڈ مانگا اور پھر اسے بھی جانے کی اجازت دے دی۔
مال کے اندر داخل ہوتے ہی ہمیں ایک لمحے کو یہ محسوس ہوا کہ اب ہمارا شمار ان ذمہ دار شہریوں میں ہو رہا ہے جنہوں نے بر وقت کرونا سے بچاؤ کی مکمل ویکسین لگوائی ہے اور اسی بنا پر ہم بغیر مشکل کے یہاں آگئے ہیں۔