پاکستان: تین ماہ بعد کرونا کے ایک ہزار سے زائد یومیہ کیسز ریکارڈ
پاکستان میں چوبیس گھنٹے کے دوران کرونا وائرس سے ایک ہزار 85 افراد متاثر ہونے کی تصدیق ہوئی ہے۔
گزشتہ تین ماہ میں پہلی بار کرونا وائرس کے ایک ہزار سے زائد یومیہ کیسز سامنے آئے ہیں۔
نیشنل کمانڈ اینڈ آپریشن سینٹر(این سی او سی) کے جاری کردہ اعداد و شمار کے مطابق پاکستان میں کرونا کے پھیلاؤ کی شرح دو فی صد سے بڑھ گئی ہے۔
بھارت: اومیکرون سے پہلی ہلاکت کی تصدیق، کیسز کی یومیہ شرح میں 57 فی صد اضافہ
بھارت میں کرونا کے یومیہ مثبت کیسز کی شرح میں 57 فی صد اضافہ ہوگیا ہے۔
خبر رساں ادارے ’رائٹرز‘ نے بھارت کی وزارتِ صحت کے حوالے سے بتایا ہے کہ گزشتہ چوبیس گھنٹوں کے دوران بھارت میں کرونا وائرس کے 90 ہزار 928 کیسز کی تشخیص ہوئی۔ ایک روز قبل یہ تعداد 58 ہزار سے زائد تھی۔
بھارت میں کرونا سے ایک روز کے دوران 325 ہلاکتیں بھی ہوئی ہیں۔ جب کہ وبا سے متاثرہ افراد کی مجموعی تعداد ساڑھے تین کروڑ سے تجاوز کر گئی ہے۔
ذرائع ابلاغ کے مطابق بھارت میں کرونا کے اومیکرون ویریئنٹ کے باعث پہلی ہلاکت کی تصدیق بھی ہوگئی ہے۔
امریکہ: کرونا کے مریضوں کے اسپتال میں داخلے کی شرح 45 فی صد ہوگئی
امریکہ میں وبائی امراض کے ماہر انتھونی فاؤچی نے خبردار کیا ہے کہ کرونا وائرس کے اومیکرون ویرئینٹ کے باعث اسپتالوں پر دباؤ بڑھ سکتا ہے۔
ڈاکٹر فاؤچی کا کہناہے ک اگرچہ اومیکرون سے متاثر ہونے کی صورت میں ظاہر ہونے والی علامات زیادہ شدید نہیں ہیں لیکن بڑھتے ہوئے کیسز کی صورت میں نظامِ صحت پر دباؤ بڑھنے کا امکان ہے۔
سات روز کے اندر امریکہ میں کرونا کے پانچ لاکھ 40 ہزار مزید کیسز سامنے آئے ہیں اور اس دوران اسپتال میں داخل ہونے والے متاثرہ مریضوں کی تعداد میں 45 فیصد اضافہ ہوا ہے۔
کرونا وائرس سے متاثرہ ایک لاکھ 11 ہزار افراد اسپتالوں میں داخل ہوچکے ہیں۔یہ امریکہ میں کرونا سے متاثرہ افراد کی اسپتال میں داخل ہونے کی جنوری 2021 کے بعد سب سے زیادہ تعداد ہے۔
پاکستان میں اومیکرون تیزی سے پھیل رہا ہے: این سی او سی
پاکستان میں کرونا کے نگراں ادارے نیشنل کمانڈ اینڈ آپریشن سینٹر (این سی او سی) کے سربراہ اسد عمر نے کہا ہے کہ ملک میں کرونا کی نئی قسم اومیکرون تیزی سے پھیل رہی ہے جس کے باعث کرونا کے مثبت کیسز کی شرح میں اضافہ ہوا ہے۔
ان کے بقول گنجان آباد علاقوں میں وائرس کا پھیلاؤ زیادہ ہے اور دو ہفتوں میں کراچی میں مثبت کیسز کی شرح میں 940 فی صد اضافہ ہوا ہے۔
اسد عمر نے اسلام آباد میں این سی او سی کے اجلاس کے بعد معاونِ خصوصی برائے صحت ڈاکٹر فیصل سلطان کے ہمراہ پریس کانفرنس کی۔
انہوں نے کہا کہ سات دنوں کے اعداد و شمار کے مطابق ملک کے 60 فی صد کیسز کراچی اور لاہور سے آ رہے ہیں۔
اسد عمر نے شہریوں پر زور دیا کہ وہ ویکسی نیشن مکمل کریں اور اگر دوسری ڈوز نہیں لگوائی تو اسے فوری لگوائیں۔
ادھر ڈاکٹر فیصل سلطان نے کہا کہ مردوں کی نسبت خواتین کو کرونا ویکسی نیشن کا فائدہ زیادہ ہے۔ البتہ ویکسین سب کا تحفظ کر رہی ہے۔
کرونا کی نئے ویئریئنٹ اومیکرون سے متعلق انہوں نے کہا کہ اومیکرون تیزی سے پھیل رہا ہے۔ ملک میں 350 سے زائد افراد میں اومیکرون کی تصدیق ہو چکی ہے۔