پی ایس ایل کے سیمی فائنلز اور فائنل ملتوی
پاکستان کرکٹ بورڈ (پی سی بی) نے پی ایس ایل فائیو کے دو سیمی فائنلز اور فائنل میچز ملتوی کر دیے ہیں۔ پی سی بی کے مطابق میچز ملتوی کرنے کے بارے میں مزید تفصیلات بعد میں بتائی جائیں گی۔
لاہور سے وائس آف امریکہ کے نمائندے ضیاالرحمٰن کے مطابق کرونا وائرس کے خدشے کے پیش نظر فائنل اور سیمی فائنلز ملتوی کیے گئے ہیں۔ سیمی فائنل کھیلنے والی ٹیموں میں شامل غیر ملکی کھلاڑی اپنے اپنے ملک روانہ ہونا شروع ہو گئے ہیں۔
کرونا وائرس: افغان مہاجرین کی رضا کارانہ واپسی کا عمل عارضی طور پر معطل
اقوامِ متحدہ کے ادارہ برائے مہاجرین 'یو این ایچ سی آر' نے کرونا وائرس سے بچاؤ کے احتیاطی اقدامات کے تحت پاکستان اور افغانستان کی سرحدوں کی بندش کے بعد افغان مہاجرین کی رضا کارانہ واپسی کا عمل عارضی طور پر معطل کر دیا ہے۔
یو این ایچ سی آر پاکستان کے منگل کو جاری بیان کے مطابق صوبۂ خبیر پختونخوا میں نوشہرہ اور صوبۂ بلوچستان میں کوئٹہ کے قریب قائم رضاکارانہ واپسی کے مراکز کو بند کر دیا گیا ہے۔
یو این ایچ سی آر کے پاکستان میں نائب مندوب لین ہال نے کہا ہے کہ ادارے کی اوّلین ترجیح کرونا وائرس کا پھیلاؤ روکنے کے لیے عالمی کوششوں کی حمایت کرنا ہے۔ اس ضمن میں وہ پاکستان کی جانب سے کیے گئے اقدامات کی حمایت کرتے ہیں۔
یو این ایچ سی آر کے مطابق مارچ 2020 میں افغان مہاجرین کی واپسی کا عمل دوبارہ شروع ہونے کے بعد نو خاندانوں کے 28 افراد افغانستان واپس جا چکے ہیں جب کہ 14 لاکھ رجسٹرڈ افغان مہاجرین پاکستان میں مقیم ہیں۔
نیو جرسی میں کرفیو نافذ
امریکہ کی ریاست نیو جرسی میں کرونا وائرس کے مزید 80 نئے کیسز سامنے آنے کے بعد ریاست میں کرفیو نافذ کر دیا گیا ہے۔
نیو جرسی میں کرونا وائرس کے کیسز کی مجموعی تعداد 178 ہو گئی ہے۔ گورنر فل مرفی نے کرونا وائرس کو مزید پھیلنے سے روکنے کے لیے ریاست میں کرفیو کے نفاذ کا اعلان کیا ہے۔ انہوں نے اپنے ایک ٹوئٹ میں شہریوں پر زور دیا کہ وہ ایک دوسرے سے فاصلہ اختیار کریں اور غیر ضروری طور پر گھروں سے باہر نہ نکلیں۔
کرونا وائرس پر وفاق اور صوبوں میں ہم آہنگی کیوں نہیں؟
پاکستان کے معاون خصوصی برائے صحت کے مطابق ملک میں کرونا وائرس کے مصدقہ مریضوں کی تعداد 94 ہو چکی ہے تاہم صوبوں کی جانب سے جاری ہونے والے اعداد و شمار کے مطابق یہ تعداد 130 سے زائد ہے۔
وفاق اور صوبوں کی سطح پر کرونا وائرس کے مصدقہ افراد کی تعداد کے حوالے سے اعداد و شمار کا فقدان دکھائی دیتا ہے۔
معاون خصوصی صحت سے جب یہ سوال پوچھا گیا تو انہوں نے جواب دیا کہ اس وقت (پیر کی رات) تک مصدقہ مریضوں کی تعداد 94 ہے اور یہ اعداد و شمار تبدیل ہوتے رہتے ہیں۔ انہوں نے کہا کہ بہت سے متاثرہ افراد کے میڈیکل ٹیسٹ کے نتائج آ رہے ہوتے ہیں اور بعض کی دوبارہ تصدیق ہونا باقی ہوتی ہے۔
نیشنل کوآرڈینیشن کمیٹی کے وزیر اعظم کی زیر صدارت ہونے والے اجلاس کے بعد معاون خصوصی برائے صحت جس وقت میڈیا کو کرونا وائرس کے تازہ اعداد و شمار سے آگاہ کر رہے تھے، عین اسی وقت خیبر پختونخوا کے صوبائی وزیر صحت نے ٹوئٹ کے ذریعے بتایا کہ صوبے میں 15 افراد میں کرونا وائرس کی تشخیص ہوئی ہے۔
وزیراعلیٰ سندھ مراد علی شاہ کے مطابق ان کے صوبے میں کرونا کے مریضوں کی تعداد 104 ہو گئی ہے جن میں سکھر میں 76، کراچی میں 27 اور حیدرآباد میں ایک کیس رپورٹ ہوا ہے۔
صوبوں کی طرف سے فراہم کردہ اعداد و شمار کے مطابق سندھ میں 104، خیبر پختونخوا میں 15، بلوچستان میں 10، گلگت بلتستان میں پانچ، پنجاب میں ایک، جب کہ اسلام آباد میں چار افراد کے اس وبا سے متاثر ہونے کی تصدیق ہوئی ہے۔