وزیرِ اعظم شہباز شریف کے سیلاب زدہ علاقوں کا دورہ

پاکستان کے وزیرِ اعظم شہباز شریف مسلسل سیلاب زدہ علاقوں کے دورے کر رہے ہیں اور پیر کو بھی انہوں نے خیبر پختونخوا کے مختلف علاقوں کو دورہ کیا ہے۔

وزیرِاعظم آفس سے جاری بیان کے مطابق سیلاب زدہ علاقوں میں نقصانات کا جائزہ اور متاثرین سے ملاقات کے لیے شہباز شریف نوشہرہ گئے ہیں۔

واضح رہے کہ اتوار کو شہباز شریف نے بلوچستان کے علاقے جعفر آباد کا دورہ کیا تھا۔

وزیرِ اعظم کو ان دوروں کے دوران سیلاب کی صورتِ حال اور امدادی کارروائیوں پر تفصیلی بریفنگ بھی دی جا رہی ہے۔

وفاقی حکومت کی جانب سے وزیرِاعظم سیلاب متاثرین میں امدادی چیکس بھی تقسیم کر رہے ہیں۔

خیبر پختونخوا کے دورے میں شہباز شریف نے مردان پل پر دریائے کابل میں سیلابی صورتِ حال کا بھی جائزہ لیا۔

فرانس کے صدر کا پاکستان کے وزیرِ اعظم کو فون

فرانس کے صدر ایمانوئل میخواں نے سیلاب سے متاثرہ پاکستان کے وزیرِ اعظم شہباز شریف کا ٹیلی فون کال کی ہے۔

ایمانوئل میخواں کا سوشل میڈیا پر ایک بیان میں کہنا تھا کہ پاکستان میں عوام ایک بدترین سیلاب کا سامنا کر رہے ہیں۔

ان کا مزید کہنا تھا کہ سیلاب کے سبب بے شمار لوگ لاپتا ہوئے ہیں اور ایک آبادی کا ایک بڑا حصہ متاثر ہوا ہے۔

انہوں نے عزم ظاہر کیا کہ فرانس پاکستان کی مدد کے لیے تیار ہے۔

دوسری جانب پاکستان کے وزیرِ اعظم شہباز شریف نے کہا کہ وہ فرانس کے صدر کے شکر گزار ہیں کہ انہوں نے پاکستان کے عوام سے اظہار یکجہتی کیا ہے اور مدد کی پیش کش کی ہے۔

نوشہرہ کے مقام پر دریائے کابل میں پانی کی سطح میں کمی، 'مزید سیلابی ریلے کا امکان نہیں'

پاکستان کے صوبے خیبر پختونخوا کے ضلع نوشہرہ کی انتظامیہ کا کہنا ہے کہ دریائے کابل میں پانی کی سطح میں کمی واقع ہو رہی ہے اور مزید سیلابی ریلے کا کوئی امکان نہیں ہے۔

ڈپٹی کمشنر نوشہرہ کے دفتر سے جاری ایک بیان کے مطابق دریائے کابل میں اس وقت نوشہرہ کے مقام پر پانی کا بہاؤ دو لاکھ 98 ہزار 790 کیوسک ریکارڈ کیا گیا ہے اور پانی کی سطح میں آہستہ آہستہ کمی واقع ہو رہی ہے۔

ضلعی انتظامیہ کا کہنا ہے کہ اگلے چار سے پانچ گھنٹوں کے دوران پانی کی سطح میں مزید کمی آئے گی جس کے بعد مزید سیلابی ریلا آنے کا کوئی امکان نہیں ہے۔

دو روز قبل نوشہرہ میں حفاظتی بند ٹوٹنے سے نوشہرہ کلاں اور مانہ خیل کی بڑی آبادی زیر آب آگئی تھی۔

موٹر ویز پولیس نے مختلف علاقوں میں سیلاب کے سبب موٹر ویزے اور ہائی ویز کے زیرِ آب ہونے کے خدشات ظاہر کیے ہیں۔

موٹر ویز پولیس کے ترجمان کے جاری کردہ بیان کے مطابق جن علاقوں میں سیلاب کے سبب شاہراہیں زیر آب آنے کا اندیشہ ہے عوام ان علاقوں کا سفر نہ کریں۔

بیان میں بتایا گیا ہے کہ خیبر پختونخوا میں قومی شاہراہ پر اضاخیل اور نوشہرہ کے درمیان سیلاب کا خدشہ ہے، اسی طرح موٹروے ایم-ون پر برہان تا پشاور سیلاب کے خدشات موجود ہیں۔

ترجمان کے مطابق بلوچستان میں قومی شاہراہ پر قلات سے پشین یارو سیلاب کا اندیشہ موجود ہے۔ نیشنل ہائی وے پر حب سے بیلہ اور بوستان سے دلسورا بھی سیلاب کے سبب زیرِ آب ہو سکتی ہے۔

سندھ کے حوالے سے کہا گیا ہے کہ قومی شاہراہ پر کنڈ یارو، مورو، سکرنڈ سیلاب کے خطرے سے دوچار ہیں۔ مٹیاری کے قریب ہٹری، میانی فاریسٹ، چلگری، باڈیرو اور کھنڈو میں سیلاب ہو سکتا ہے۔