پاکستان کو سیلاب کی تباہ کاریوں سے نمٹنے کے لیے 10 ارب ڈالرز درکار ہوں گے: احسن اقبال

پاکستان کے وفاقی وزیر برائے منصوبہ بندی احسن اقبال نے کہا ہے کہ پاکستان کو سیلاب کی تباہ کاریوں سے نمٹنے کے لیے 10 ارب ڈالرز درکار ہوں گے۔

خبر رساں ادارے 'اے ایف پی' کو دیے گئے انٹرویو میں احسن اقبال کا کہنا تھا کہ سیلاب سے مواصلاتی نظام، انفراسٹرکچر، زرعی نظام، لائیو اسٹاک اور دیگر شعبے بری طرح متاثر ہوئے ہیں جن کی بحالی کے لیے اربوں ڈالرز درکار ہیں۔

وفاقی وزیر کا مزید کہنا تھا کہ ابتدائی تخمینوں سے یہ پتا چلتا ہے کہ یہ ایک بہت بڑی قدرتی آفت ہے۔ اس کے لیے شاید 10 ارب ڈالرز بھی کم پڑ جائیں۔ کیوں کہ اس سے 10 لاکھ مکانات کو نقصان پہنچا ہے۔

احسن اقبال کا کہنا تھا کہ بحالی کے کم پانچ برس لگ سکتے ہیں جب کہ اس دوران غذائی قلت بھی پیدا ہو سکتی ہے۔

سوات کے مختلف علاقوں میں بجلی کی فراہمی تاحال معطل

خیبر پختونخوا کے ضلع سوات میں سیلاب سے متاثرہ علاقوں میں بجلی کی فراہمی تاحال معطل ہے جس کی وجہ سے شہریوں کو مشکلات کا سامنا ہے۔

متاثرہ علاقوں میں باغ ڈھیرئی، مدین، بحرین اور کالام کے درمیان سڑکیں بھی شدید متاثر ہیں جبکہ کالام سے اتروڑ اور گبرال کے مابین رابطہ منقطع ہے۔

چین کا پاکستان کی قیادت اور عوام سے اظہارِ یکجہتی

چین نے پاکستان میں سیلاب سے ہونے والے جانی و مالی نقصانات پر پاکستان کی قیادت اور عوام سے افسوس اور یکجہتی کا اظہار کیا ہے۔

منگل کو چین کے صدر شی جن پنگ اور وزیرِاعظم لی کی چیانگ نے پاکستان کے صدر عارف علوی اور وزیراعظم شہباز شریف کے نام خصوصی پیغام جاری کیا ہے۔

پاکستانی حکام کی جانب سے منگل کو جاری کیے گئے ایک اعلامیے کے مطابق شہباز شریف نے چینی قیادت کا شکریہ ادار کرتے ہوئے کہا ہے کہ ہمیشہ کی طرح چین کی قیادت اور عوام نے پاکستان دوستی کا مظاہرہ کیا ہے۔

تین گھنٹے میں پانچ ارب روپے کے عطیات پر پاکستانیوں کا شکرگزار ہوں: عمران خان

پاکستان کے سابق وزیرِاعظم عمران خان نے سیلاب متاثرین کی امداد کے لیے کی گئی ٹیلی تھون میں بڑی تعداد میں عطیات کے اعلانات پر پاکستانیوں کا شکریہ ادا کیا ہے۔

ٹوئٹر پر اپنے ایک ٹویٹ میں انہوں نے کہا کہ وہ عطیات دینے پر اہل وطن بالخصوص سمندرپار پاکستانیوں کے شکرگزار ہیں۔

انہوں نے کہا کہ ''ہماری تین گھنٹے کی ٹیلی تھون میں پانچ ارب روپے کے عطیات کے اعلانات موصول ہوئے ہیں۔''