اردن کے عوام کا وزیر اعظم رفاعی سے مستعفی ہونے کا مطالبہ

اردن میں ہزاروں شہریوں نے حکومت کی سطح پر تبدیلی اور وزیر اعظم سمیر الرفاعی سے مستعفی ہونے کا مطالبہ کرتے ہوئے دارالحکومت عمان سمیت ملک کے کئی دیگر شہروں میں جمعہ کو احتجاجی جلوس نکالے ہیں۔

حزب اختلاف کے حامیوں نے گذشتہ ہفتے سے مظاہروں کا سلسلہ جاری رکھا ہوا ہے جو تیونس میں ہونے والے حالیہ احتجاج کی طرز پر کیے جا رہے ہیں۔

اردن کے عوام نے اشیائے خورونوش کی قیمتوں میں غیر معمولی اضافے پر تنقید کے ساتھ ساتھ حکومت پر الزام لگایا ہے کہ وہ بدعنوانی پر قابو پانے میں ناکام ہو گئی ہے۔

وزیر اعظم رفاعی نے رواں ماہ سرکاری ملازمین کی تنخواہوں کے علاوہ ریٹائرڈ ملازمین کی وضیفوں میں اضافے کا اعلان کیا تھا تاہم اس اقدام کے باوجود احتجاجی مظاہروں کا سلسلہ جاری ہے۔