غزہ میں اسرائیلی حملے میں عورتوں اور بچوں سمیت 100 فلسطینی ہلاک

اسرائیلی حکام نے دعوی کیا ہے کہ ہفتے کی رات کو ایران پر کیے جانے والے حملوں نے اسرائیلی مقاصد حاصل کر لیے ہیں۔

اسرائیلی دفاعی فورسز کے ترجمان ڈینئل ہیگاری کا کہنا تھا کہ سیاسی قیادت کی ہدایات کے مطابق اسرائیل نے ایران کے مختلف علاقوں میں اہداف پر کارروائی کی۔

ترجمان کے مطابق اسرائیل نے حالیہ کارروائیوں مین ایران کے میزائل مینو فیکچرنگ ٹھکانے کو نشانہ بنایا جہاں سے اسرائیل پر پچھلے سال حملے کیے گئے تھے۔

ڈینئل کے مطابق علاوہ ازیں اسرائیلی کارروائی میں ایران کے زمین سے فضا میں مار کرنے والے میزائلوں اور ایرانی فضائی صلاحیتوں کو نشانہ بنایا گیا جن کا مقصد ایران میں اسرائیل کی فضائی آپریشن کی آزادی کو محدود کرنا تھا۔

ان کے بقول اسرائیل کو اب ایران میں فضائی آپریشن کرنے کی وسیع آزادی حاصل ہے۔

اسرائیل کی شمالی غزہ میں فضائی کارروائی میں کم از کم 22 افراد ہلاک ہو گئے۔

غزہ کی وزارت صحت کے مطابق ہفتے کو رات گئے اسرائیل کے فضائی حملے میں ہلاک ہونے والوں میں 11 خواتین اور دو بچے بھی شامل ہیں۔

رپورٹس کے مطابق اسرائیل نے شمالی قصبے بیت الحیہ میں واقع گھروں اور عمارتوں پر حملے کیے۔

غزہ کی وزارت صحت کے مطابق 15 سے زائد افراد زخمی ہیں جبکہ ہلاکتوں میں اضافہ بھی ہو سکتا ہے۔

اس کارروائی پر اسرائیلی فوج کی طرف سے فوری طور پر کوئی رد عمل سامنے نہیں آیا۔

اسرائیلی فوج کا کہنا ہے کہ جنوبی لبنان میں اس کے چار مزید اہلکار ہلاک ہو گئے ہیں۔

فوج کے مطابق لبنان میں رواں سال 30 ستمبر سے زمینی جنگ شروع ہونے کے بعد سے اب تک ہلاک ہونے والے اسرائیلی فوجیوں کی تعداد 36 ہو گئی ہے۔

اتوار کو جاری کردہ بیان میں اسرائیلی فوج کا کہنا تھا کہ یہ فوجی ہفتے کو جنوبی لبنان میں جنگ کے دوران مارے گئے۔

تل ابیب کے شمالی شہر رمت ہیشرون میں اتوار کو ٹرک ڈرائیور نے اپنا ٹرک بس اسٹاپ پر چڑھا دیا جس کی وجہ سے کم از کم 24 افراد زخمی ہو گئے۔

تاہم پولیس نے ابھی تک یہ واضح نہیں کیا کہ یہ کوئی حادثہ تھا یا جان بوجھ کر حملہ کیا گیا۔

پولیس کی ابتدائی تحقیقات کے مطابق ٹرک ڈرائیور نے بس اسٹاپ پر پہلے سے کھڑی بس کو بھی ہِٹ کیا۔

رپورٹس کے مطابق پولیس کا کہنا تھا کہ موقعے پر موجود شہریوں نے ٹرک ڈرائیور کو گولی مار کر ہلاک کر دیا۔