افغانستان سے مذاکرات: عمران خان نے علی امین گنڈا پور کے اعلان کی حمایت کر دی

اسلام آباد ہائی کورٹ نے پارلیمنٹ سے تحریکِ انصاف کے اراکینِ اسمبلی کی گرفتاریوں کے معاملے پر کہا ہے کہ پارلیمنٹ سے گرفتاریوں کے خلاف ایک درخواست آئی ہے۔ اس معاملے کو اسپیکر قومی اسمبلی دیکھ رہے ہیں لیکن یہ عدالت بھی دیکھ سکتی ہے۔

چیف جسٹس اسلام آباد ہائی کورٹ جسٹس عامر فاروق اور جسٹس ثمن رفعت امتیاز پر مشتمل دو رکنی بینچ جمعے کو پی ٹی آئی کے جلسے کے بعد درج مقدمات اور گرفتاریوں کے معاملے کی سماعت کر رہا ہے۔

پراسیکیوٹر جنرل اسلام آباد نے عدالت کو بتایا کہ پی ٹی آئی کے جلسے میں ریاست مخالف خوف ناک تقاریر کی گئی ہیں۔

جسٹس عامر فاروق نے کہا کہ کسی نے کتنا ہی سنگین جرم کیا ہو اسے فیئر ٹرائل کا حق ہے۔ اگر آپ کی بات مان لی جائے تو پھر قتل کے ملزم کا تو ان کاؤنٹر کر دیں۔

جسٹس عامر فاروق نے کہا کہ ملک کے حالات دیکھیں اور آپ نے پارلیمنٹ کے اندر گھس کر اراکین کو گرفتار کرلیا، انتظار کرلیتے، اراکین کو باہر آنے دیتے۔ کیا کسی ادارے کا وقار باقی نہیں رہنے دینا؟ آپ کیا کر رہے ہیں، پارلیمنٹ تمام اداروں کی ماں ہے۔

چیف جسٹس نے کہا یہی کام پہلے اِس ہائی کورٹ میں کیا گیا اور اب پارلیمنٹ میں کر دیا۔

پراسیکیوٹر جنرل کے ایف آئی آر پڑھنے پر چیف جسٹس کے دلچسپ ریمارکس

دورانِ سماعت پراسیکیوٹر جنرل نے ایف آئی آر پڑھ کو عدالت کو بتایا کہ شیر افضل مروت سے پستول برآمد ہوا ہے۔ اس پر چیف جسٹس نے کہا کہ اس ایف آئی آر کا آتھر بھی دلچسپ ہے۔ جس نے بھی یہ ایف آئی آر لکھی ہے اس نے اچھی کامیڈی لکھی ہے جس پر پوری فلم بن سکتی ہے۔ کریڈٹ دینا ہو گا کہ بڑے عرصے بعد اچھی کامیڈی دیکھنے کو ملی ہے۔

ایف آئی آر کا متن سننے کے بعد چیف جسٹس نے ریمارکس دیے کہ اسلام آباد پولیس ہے یا رضیہ جو غنڈوں میں پھنس گئی؟ جس پر عدالت میں قہقہے لگ گئے۔

جسٹس عامر فاروق نے کہا کہ شعیب شاہین نے پستول رکھ لیا، بیرسٹر گوہر نے اسلحہ رکھ لیا، فلاں نے ڈانڈا مارا۔ یہ کیا ہے؟ کیا میں بیرسٹر گوہر کو نہیں جانتا، کیا ہم شعیب شاہین کو نہیں جانتے؟ یہ تضحیک ہے۔

چیف جسٹس عامر فاروق نے کہا کہ اس مقدمے میں مضحکۂ خیز قسم کے الزامات لگائے گئے ہیں۔ چار دن ہو گئے ہیں آپ نے جو کرنا تھا وہ کر لیا ہے۔

اسلام آباد ہائی کورٹ کے دو رکنی خصوصی بینچ نے پی ٹی آئی کے گرفتار رہنماؤں کا جسمانی ریمانڈ کالعدم قرار دینے کی درخواستوں پر فیصلہ محفوظ کر لیا ہے اور چیف جسٹس نے کہا کہ وہ آج ہی اس پر فیصلہ سنائیں گے۔

اسلام آباد ہائی کورٹ نے تحریکِ انصاف کے گرفتار رہنماؤں کا جسمانی ریمانڈ کالعدم قرار دے دیا ہے۔

چیف جسٹس اسلام آباد ہائی کورٹ جسٹس عامر فاروق کی سربراہی میں دو رکنی بینچ نے جمعے کو پی ٹی آئی رہنماؤں کی گرفتاری کے معاملے پر سماعت کی۔

عدالت نے گرفتار ملزمان کو جوڈیشل ریمانڈ پر جیل بھیج دیا۔

واضح رہے کہ آٹھ ستمبر کو تحریکِ انصاف کے جلسے کے بعد اسلام آباد کے مختلف تھانوں میں پی ٹی آئی رہنماؤں کے خلاف مقدمات درج کیے گئے تھے۔ جب کہ نقاب پوش افراد نے پارلیمنٹ میں گھس کر بعض اراکین کو حراست میں لے لیا تھا۔

اسلام آباد پولیس نے تحریکِ انصاف کے گرفتار 10 اراکینِ اسمبلی کو اسپیکر کو پروڈکشن آرڈر پر پارلیمنٹ ہاؤس پہنچا دیا ہے۔

اسپیکر قومی اسمبلی سردار ایاز صادق نے گرفتار ارکانِ قومی اسمبلی کے رواں سیشن کے اجلاسوں میں پیش کرنے کے لیے پروڈکشن آڈر جاری کر رکھا ہے۔

سابق وزیرِ اعظم عمران خان نے وزیرِ اعلٰی خیبرپختونخوا کی جانب سے خود افغانستان سے مذاکرات کے فیصلے کی حمایت کرتے ہوئے کہا ہے کہ بات چیت کے بغیر دہشت گردی ختم نہیں ہو سکتی۔

اڈیالہ جیل میں صحافیوں سے غیر رسمی گفتگو کرتے ہوئے عمران خان کا کہنا تھا کہ 'انہیں' علی امین گنڈاپور کے پاؤں پکڑنے چاہئیں کہ خدا کے واسطے جا کر افغانستان سے بات کرو۔

وفاقی حکومت اور دفتر خارجہ کی موجودگی میں ایک صوبے کی جانب سے کسی دوسرے ملک سے بات چیت کے سوال پر عمران خان کا کہنا تھا کہ "دفتر خارجہ کو چھوڑو خیبر پختونخوا دہشت گردی سے سب سے ذیادہ متاثر ہے۔"

عمران خان کا کہنا تھا کہ اگر کوئی دہشت گردی ختم کرنے کی کوشش کر رہا ہے تو اس سے تعاون کریں۔ علی امین گنڈا پور ملک کے فائدے کی بات کر رہا ہے خدانخواستہ ملک کے خلاف بات نہیں کر رہا۔

عمران خان کا کہنا تھا کہ مولانا فضل الرحمان کی جانب سے کسی بھی عہدے پر توسیع کی حمایت نہ کرنے کا اعلان خوش آئند ہے۔

اُن کا کہنا تھا کہ شکر ہے کہ مولانا فضل الرحمان نے کہا کہ وہ کسی بھی توسیع کو نہیں مانتے۔

عمران خان کا کہنا تھا کہ علی امین گنڈاپور کو اسٹیبلشمنٹ کے لوگوں نے غائب کیا کسی کو نہیں پتا تھا کہ وہ کہاں گیا۔ سب کو پتا ہے کہ اس ملک میں کون لوگوں کو اٹھاتا ہے۔ علی امین گنڈاپور لاج رکھ رہا ہے بول نہیں رہا۔

واضح رہے کہ وفاقی وزیرِ دفاع خواجہ آصف نے کہا تھا کہ کوئی صوبہ کسی ملک سے مذاکرات نہیں کر سکتا۔

قومی اسمبلی میں خطاب میں خواجہ آصف کا کہنا تھا کہ خیبر پختونخوا کے وزیرِ اعلیٰ کا افغانستان سے خود مذاکرات کرنے کا بیان فیڈریشن پر حملہ ہے۔