خیبر پختونخوا: اورکزئی میں پولیو ٹیم پر حملے میں ایک پولیس اہلکار ہلاک، جوابی کارروائی میں تین حملہ آور مارے گئے

پاکستان میں گزشتہ روز پیش آنے والے واقعات سے متعلق جاننے کے لیے یہاں کلک کریں۔

سپریم کورٹ بار کے سالانہ انتخابات آج ہو رہے ہیں اور لاہور سے پانچ نشستوں پر 17 امیدوار وں کے درمیان مقابلہ ہے۔

صدر کی نشست پر میاں محمد رؤف عطا اور منیر احمد خان کاکڑ کے درمیان مقابلہ ہو گا جب کہ نائب صدر پنجاب کی نشست پر رانا بختیار اور رانا غلام سرور مدِ مقابل ہیں۔

اسی طرح سیکریٹری کی نشست پر سلمان منصور اور ملک زاہد اسلم جب کہ ایڈیشنل سیکریٹری کی نشست پر محمد اورنگزیب اور راجہ زبیر حسین اور فنانس سیکریٹری کی نشست پر اورنگزیب میر اور چوہدری تنویر کے درمیان مقابلہ ہو گا۔

سپریم کورٹ بار کے الیکشن میں 4021 ووٹر اپنا حق رائے دہی استعمال کریں گے جب کہ سب سے زیادہ 1414 ووٹرز کا تعلق لاہور سے ہے۔ پولنگ کا عمل صبح ساڑھے آٹھ بجے سے شام پانچ بجے تک جاری رہے گا ۔

وزیرِ اعظم شہباز شریف دو روزہ سرکاری دورے پر اسلام آباد سے سعودی عرب روانہ ہو گئے ہیں۔

سرکاری اعلامیے کے مطابق دورۂ سعودی عرب کے دوران دونوں ملکوں کے درمیان اقتصادی اور اسٹرٹیجک شراکت داری پر بات چیت ہو گی۔

بیان کے مطابق دورے کے دوران اقتصادی، توانائی اور دیگر شعبوں میں دوطرفہ تعاون کے امکانات کا جائزہ لیا جائے گا۔

وزیرِ اعظم شہباز شریف کے ہمراہ وفاقی وزیر خزانہ و محصولات سینیٹر محمد اورنگزیب بھی سعودی عرب روانہ ہوئے ہیں۔

خیبر پختونخوا کے ضلع اورکزئی میں پولیو ٹیم پر حملے کے نتیجے میں رضاکاروں کی حفاظت پر مامور ایک پولیس اہلکار ہلاک اور ایک زخمی ہو گیا ہے جب کہ پولیس کے مطابق جوابی کارروائی میں تین حملہ آور مارے گئے ہیں۔

پولیس کے مطابق پولیو ٹیم پر فائرنگ کا واقعہ اپر اورکزئی کے علاقے ڈبوری بادان کلے میں پیش آیا۔

خبر رساں ادارے 'ایسوسی ایٹڈ پریس' کے مطابق مقامی پولیس افسر عدنان خان نے بتایا کہ حملہ اس وقت ہوا جب ہیلتھ ورکرز مہم کے لیے نکلنے سے قبل اکٹھا ہو رہے تھے اور اس دوران ان کی حفاظت کے لیے پولیس کی ٹیمیں بھی موجود تھیں۔

انہوں نے کہا کہ حملے کے دوران کوئی پولیو ورکرز زخمی نہیں ہوا ہے۔

اورکزئی میں ہونے والے حملے کی ذمہ دار تحال کسی نے قبول نہیں کی ہے۔

ڈی ایس پی محمد رحیم کے مطابق پولیو ٹیم پر فائرنگ کے واقعے کے بعد پولیس اور فرنٹئیر کور کی بھاری نفری موقع پر پہنچ گئی ہے اور علاقے میں سرچ آپریشن شروع کر دیا ہے۔