شام: باغی گروپ کے محمد بشیر شام کے عبوری وزیراعظم مقرر

چین نے شام میں تمام فریقوں پر سیاسی حل تلاش کرنے پر زور دیا ہے۔

چینی وزارتِ خارجہ کی ترجمان اپنے بیان میں کہا ہے کہ شام کی صورتِ حال پر قریب سے نظر رکھے ہوئے ہیں۔

انہوں نے کہا کہ امید ہے تمام متعلقہ فریق ملک میں استحکام لانے کے لیے سیاسی حل تلاش کریں گے۔

شام کے دارالحکومت دمشق میں ایک عینی شاہد کی جانب سے بنائی گئی یہ ویڈیو سوشل میڈیا پر گردش کر رہی ہے جس میں مبینہ قیدی بشارالاسد حکومت کے خاتمے کے بعد رہائی ملنے پر خوشی کا اظہار کرتے ہوئے بھاگ رہے ہیں۔

ویڈیو بنانے والی خاتون پوچھتی ہیں کہ قیدی ہو؟ تو جواب ملتا ہے کہ ہاں۔ ایک شخص یہ کہتا ہوا جاتا ہے کہ اس نے دس سال قید میں گزارے ہیں۔⁣

شام میں باغیوں کی پیش قدمی اور دمشق پر قبضے کے دوران عسکری تنظیم 'ہیئت تحریر الشام' کا نام تو سامنے آتا رہا ہے، تاہم اس کے سربراہ ابو محمد الجولانی کا کردار پراسرار رہا ہے۔

لیکن دمشق پر باغیوں کے قبضے کے بعد اب ہر جانب اُن کے نام کی گونج ہے۔ الجولانی القاعدہ سے بھی منسلک رہے ہیں، تاہم 2016 میں اُنہوں نے اس سے راہیں جدا کر لی تھیں۔

دمشق پر کنٹرول کے بعد ابو محمد الجولانی نے اپنے خطاب میں کہا کہ "اب مستقبل ہمارا ہے۔" الجولانی نے اپنے خطاب میں مزید کہا کہ اقتدار کی منظم منتقلی تک شام کے ریاستی اداروں کی نگرانی وزیرِ اعظم کریں گے۔

اُن کے اس بیان کے بعد خیال ظاہر کیا جا رہا ہے کہ اسد فیملی کے 50 سالہ دور کے خاتمے کے بعد شام کی قیادت میں اُن کا مرکزی کردار ہو گا۔

اپنے ایک انٹرویو میں الجولانی نے کہا تھا کہ وہ 1982 میں سعودی عرب کے دارالحکومت ریاض میں پیدا ہوئے جہاں اُن کے والد ملازمت کے لیے گئے تھے۔ تاہم بعد ازاں اُن کی پرورش دمشق کے قریب ہوئی۔

اُن کے بقول ابو محمد الجولانی اُن کا جہادی نام جب کہ اصل نام احمد حسین ہے۔

مزید جانیے

برطانیہ کے سینئر وزیر پیٹ مکفیڈن نے کہا ہے کہ شام میں باغی اتحاد کی قیادت کرنے والے گروپ ہیئت تحریر الشام (ایچ ٹی ایس) کو کالعدم تنظیموں کی فہرست سے نکالنے پر غور کیا جارہا ہے۔

انہوں نے کہا ہے ہم اس پر غور ضرور کر رہے ہیں اور اس کا جزوی انحصار آئندہ آنے والے حالات پر ہوگا۔

ایچ ٹی ایس ماضی میں القاعدہ سے منسلک رہی ہے اور برطانیہ میں اسے دہشت گرد گروپ قرار دے کر اس کی حمایت اور اسے تعاون کو غیر قانونی قرار دے رکھا ہے۔