حزب اللہ کے متوقع سربراہ بھی شاید مارے گئے ہیں: اسرائیل کا دعویٰ

غزہ میں قائم الاقصیٰ شہدا اسپتال کے حکام کا کہنا ہے کہ پیر کی شب اسرائیل کے حملے میں ہلاک ہونے والے 21 افراد کی لاشیں اسپتال لائی گئی ہیں۔

طبی حکام نے مزید کہا کہ وسطی غزہ میں فضائی حملے میں ہلاک ہونے والوں میں دو بچے اور پانچ خواتین شامل ہیں۔

خبر رساں ادارے ’ایسوسی ایٹڈ پریس‘ کے مطابق بوریج کے مہاجرین کیمپ میں دو فضائی حملے کیے گئے جس سے کئی گھروں کو نقصان پہنچا۔

امدادی کارکنوں نے اندیشہ ظاہر کیا ہے کہ ملبے تلے مزید افراد دفن ہو سکتے ہیں۔

اسرائیلی وزیرِ اعظم بن یامین نیتن یاہو نے کہا ہے کہ اسرائیل دشمنوں کے خلاف لڑائی جاری رکھنے گا۔

حماس کے اسرائیل پر حملے کو ایک برس مکمل ہونے پر سات اکتوبر کو جاری بیان میں بن یامین نیتن یاہو کا کہنا تھا کہ جب تک دشمن اسرائیل کے وجود اور اس کے امن کے لیے خطرہ ہے اسرائیل کی لڑائی جاری رہے گی۔

انہوں نے کہا کہ غزہ میں جب تک یرغمالی موجود ہیں اسرائیل جنگ جاری رکھے گا۔ اسرائیل ان کی بازیابی سے دستبردار نہیں ہو گا۔ ان کے بقول نہ ہی وہ شکست تسلیم کریں گے۔

واضح رہے کہ سات اکتوبر کے حملوں کے حوالے سے سرکاری تقریب میں وزیرِ اعظم بن یامین نیتن یاہو شریک نہیں ہوئے۔ ان کا اس تقریب میں ریکارڈ شدہ بیان نشر کیا گیا۔

امریکہ کے محکمۂ خارجہ کے حکام نے کہا ہے کہ لبنان سے امریکہ کی شہریت یا گرین کارڈ رکھنے والے 900 افراد انخلا کر چکے ہیں۔

ایک بیان میں کہا گیا ہے کہ امریکی حکومت کے فراہم کردہ طیاروں سے لبنان سے ستمبر کے آخر سے امریکی شہریوں کے انخلا کا عمل جاری ہے۔

محکمۂ خارجہ کے ترجمان میتھیو ملر نے کہا ہے کہ پیر کو بھی 150 امریکی شہریوں نے لبنان سے انخلا کیا ہے۔ یہ افراد خصوصی طیارے سے ترکیہ کے شہر استنبول پہنچے ہیں۔

اسرائیل کی فوج اور لبنان کی عسکری تنظیم حزب اللہ کے درمیان گزشتہ ماہ جنگ میں شدت آنے کے بعد امریکہ نے لگ بھگ آٹھ خصوصی طیاروں کا بندوبست کیا جو لبنان سے امریکہ کے شہریوں کا نکال چکے ہیں۔ ان میں سے سات طیاروں میں امریکہ ترکیہ گئے جب کہ ایک طیارہ جرمنی پہنچا۔

میتھیو ملر کا کہنا تھا کہ لبنان اور امریکہ کی دوہری شہریت رکھنے والے لگ بھگ ساڑھے آٹھ ہزار افراد نے بیروت میں امریکی سفارت خانے سے انخلا کے لیے رابطہ کیا ہے۔

امریکہ کے محکمۂ دفاع (پینٹاگون) نے کہا ہے کہ امریکی وزیرِ دفاع لائیڈ آسٹن کا اسرائیلی ہم منصب یوو گلینٹ سے رابطہ رہتا ہے اور وہ صورتِ حال پر تبادلۂ خیال کرتے رہتے ہیں۔

صحافیوں سے گفتگو میں پینٹاگون کے ترجمان پیٹ رائڈر کا مزید کہنا تھا کہ دونوں وزرائے دفاع کے رابطوں میں اسرائیل کے ممکنہ اقدامات زیرِ بحث آتے رہتے ہیں۔

انہوں نے عندیہ دیا کہ یوو گلینٹ آئندہ ہفتے لائیڈ آسٹن سے پینٹاگون میں ملاقات کریں گے۔