جنگ کے باعث لبنان میں چار لاکھ بچے بے گھر ہو چکے ہیں: اقوامِ متحدہ

اقوامِ متحدہ کی بچوں کی بہبود سے متعلق ایجنسی یونیسیف کا کہنا ہے کہ لبنان میں گزشتہ تین ہفتوں کے دوران لگ بھگ چار لاکھ بچے بے گھر ہوئے ہیں۔

اسرائیل اور لبنان کی عسکری تنظیم حزب اللہ کے درمیان جاری جنگ کے باعث لبنان کے لوگ محفوظ مقامات کی جانب منتقل ہو رہے ہیں۔

یونیسیف کے ڈپٹی ایگزیکٹو ڈائریکٹر ٹیڈ چائیبن نے پیر کو بیروت میں ان اسکولوں کا دورہ کیا جہاں بے گھر افراد کے لیے پناہ گاہیں بنائی گئی ہیں۔

انہو ں نے خبر رساں ادارے 'ایسوسی ایٹڈ پریس' سے بات کرتے ہوئے کہا کہ جو چیز سب سے زیادہ اثر انداز ہونے والی ہے وہ یہ ہے کہ اس وقت جنگ کو تین ہفتے ہوئے ہیں اور بہت زیادہ بچے متاثر ہو چکے ہیں۔

مشرقِ وسطیٰ میں کشیدگی کے دوران گزشتہ روز پیش آنے والے واقعات سے متعلق پڑھنے کے لیے یہاں کلک کریں۔