موٹروے پولیس کے مطابق کراچی میں لیاری ایکسپریس وے ٹریفک کے لیے مکمل طور پر بند ہوگیا ہے۔
اطلاعات کے مطابق کراچی کے علاقے اورنگی میں صورتِ حال کشیدہ ہے جہاں گزشتہ روز دھرنے پر بیٹھے مظاہرین اور ایک دوسرے فرقے کے جلوس کے شرکا کےدرمیان تصادم میں ایک شخص ہلاک اور پانچ زخمی ہوگئے تھے۔ علاقے میں پولیس اور رینجرز کی بھاری نفری تعینات ہے۔
ملک بھر میں کئی موٹرویز اور ہائی ویز بند
ملک بھر میں احتجاج کا سلسلہ جاری ہے۔ موٹروے پولیس کے ترجمان نے 'ٹوئٹر' پر بتایا ہے کہ احتجاج کے باعث موٹرویز اور جی ٹی روڈ سمیت بیشتر ہائی ویز کئی مقامات پر بند ہیں اور ٹریفک کو متبادل راستوں سے گزارا جا رہا ہے۔
پشاور میں نمازِ ظہر کے بعد احتجاج کا اعلان
کئی دینی جماعتوں نے پشاور اور خیبر پختونخوا کے دیگر اضلاع میں ظہر کی نماز کے بعد مظاہروں کا اعلان کیا ہے جس کے پیشِ نظر سکیورٹی سخت کردی گئی ہے۔
دینی جماعتوں کی اپیل پر پشاور میں کئی مقامات پر احتجاج ہوگا۔
احتجاج کے پیشِ نظر پشاور سمیت صوبے کے بیشتر بڑے شہروں میں سرکاری دفاتر میں ملازمین اور تعلیمی اداروں میں طلبہ کی حاضری بھی معمول سے کہیں کم رہی۔
