شمال مغربی نائیجیریا کے علاقے زمفارا میں ایک اسکول ہوسٹل پر مسلح ڈاکوؤں کی جانب سے مبینہ طور پر دھاوا بولنے کے بعد سے سیکڑوں طالبات لاپتا ہیں۔ اس علاقے میں ایک ہفتے کے دوران اتنے بڑے پیمانے پر یہ اغوا کا دوسرا واقعہ ہے۔
پولیس نے ایک بیان میں کہا ہے کہ زمفارا پولیس کمانڈ نے فوج کے ساتھ مل کر گورنمنٹ سائنس سیکنڈری اسکول کی 317 طالبات کی تلاش کے لیے مشترکہ سرچ اینڈ ریسکیو آپریشن کا آغاز کیا ہے۔
نائیجیریا کے شمال مغرب میں حالیہ برسوں میں بھاری اسلحے سے لیس جرائم پیشہ گروپ، تواتر سے ایسی وارداتیں کر رہے ہیں۔ ان وارداتوں کا مقصد اغوا برائے تاوان، لوٹ مار اور جنسی زیادتی ہوتا ہے۔
خبر رساں ادارے فرانس 24 کے مطابق، نام نہ بتانے کی شرط پر بعض حکام کا کہنا ہے کہ اغوا برائے تاوان کی ایسی وارداتوں میں اضافے کی ایک وجہ، ماضی میں بچوں کی بازیابی کیلئے حکومت کی جانب سے تاوان کی مد میں بڑی رقوم دینے سے ہوا ہے۔ حکومت تاوان دینے کے الزامات سے انکار کرتی ہے۔
زمفارا کے انفارمیشن کمیشنر سلیمان تناُؤ انکَا، نے بتایا کہ مسلح افراد رات گئے واردات کے دوران علاقے میں فائرنگ کرتے ہوئے آئے۔ ان کے بقول جو معلومات انہیں ملی ہیں، اِن کے مطابق ڈاکو گاڑیوں میں آئے اور ان میں طالبات کو بٹھا کر لے گئے۔ بقول ان کے ڈاکو کچھ طالبات کو پیدل بھی لے کر گئے ہیں۔
اس سے پہلے اسکولوں پر ایسی وارداتیں اسلامی شدت پسند تنظیم بوکو حرام اور داعش کا مغربی افریقہ کا گروپ کرتا تھا۔ مگر اب یہ طریقہ کار نائیجیریا کے شمال مغرب میں مسلح گروہوں نے اپنا لیا ہے۔
خبر رساں ایجنسی اے ایف پی سے بات کرتے ہوئے طالبات کے والدین میں سے ایک نے بتایا کہ انہیں اس واقعہ کی اطلاع فون پر ملی۔
سعدی کوانے کے مطابق ’’میں جنابے کی طرف جا رہا تھا کہ مجھے کال ملی کہ ڈاکوؤں نے اسکول پر حملہ کر دیا ہے اور طالبات کو اپنے ساتھ لے گئے ہیں۔ میری دو بیٹیاں اس اسکول میں پڑھتی ہیں۔‘‘
گزشتہ ہفتے نائیجیر کی شمال وسطی ریاست میں ایک حملے میں نامعلوم مسلح افراد نے ایک بورڈنگ اسکول پر حملے میں ایک طالب علم کو قتل کر دیا اور 27 طلبا کو اغوا کر کے اپنے ساتھ لے گئے۔ یہ بچے ابھی تک بازیاب نہیں ہو سکے۔
پچھلے برس دسمبر میں نائیجیریا کے صدر محمد بوہاری کی آبائی ریاست کاٹسینا کے دورے کے دوران علاقے کنکارا میں ایک اسکول کے 3 سو طلبا کو اغوا کر لیا گیا تھا۔
یہ لڑکے بعد میں مذاکرات کے ذریعے بازیاب کروا لیے گئے تھے لیکن اس واقعے پر عالمی سطح پر غم و غصے کا اظہار کیا گیا تھا۔
