پاکستان میں الیکشن میں چار دن باقی؛ انتخابی سرگرمیاں تیز

بلوچستان کے وزیرِ اطلاعات جان اچکزئی نے کہا ہے کہ بلوچستان کے مختلف علاقوں میں واقع حساس پولنگ بوتھ والے علاقوں میں انٹرنیٹ تک رسائی کو عارضی طور پر محدود کر دیا جائے گا ۔

ایک بیان میں جان اچکزئی کا کہنا تھا کہ عام شہریوں کی حفاظت کو یقینی بنانا انتہائی اہمیت کا حامل ہے۔ اس بات کا خدشہ ہے کہ دہشت گرد سوشل میڈیا پلیٹ فارمز جیسے فیس بک ،ٹوئٹر اور دیگر کے چینلز کو مواصلاتی مقاصد کے لیے استعمال کر سکتے ہیں۔

ان کا مزید کہنا تھا کہ خطرے کو کم کرنے کے لیے تربت ،مچھ اور چمن سمیت علاقوں میں انتخابات سے قبل انٹرنیٹ تک رسائی کو محدود کردیا جائے گا۔

پاکستان پیپلز پارٹی (پی پی پی) کے چیئرمین بلاول بھٹو زرداری نے کہا ہے کہ پیپلز پارٹی کو ووٹ دے کر نفرت اور انتقام کی سیاست ختم کی جا سکتی ہے۔

حیدرآباد میں جلسے سے خطاب میں ایم کیو ایم پر تنقید کرتے ہوئے بلاول بھٹو زردای کا کہنا تھا کہ جب حیدر آباد کے عوام سے کہا جائے کہ پتنگ پر مہر لگانی ہے تو جواب دینا ہے کہ پاکستان توڑنے والوں کو ووٹ نہیں دیں گے۔

بلاول بھٹو زرداری نے ایک بار پھر 300 یونٹ تک مفت میں بجلی دینے کا اعلان کرتے ہوئے کہا کہ عوام کو شمسی توانائی سے مفت بجلی فراہم کی جائے گی۔

پاکستان تحریکِ انصاف (پی ٹی آئی) کے کارکنوں اور پولیس کے درمیان کرک میں جھڑپوں کی اطلاعات موصول ہوئی ہیں۔

مقامی میڈیا کے مطابق حکام کا کہنا تھا کہ جلسے کا اہتمام اجازت کے بغیر کیا گیا تھا۔

اطلاعات کے مطابق تحریکِ انصاف کے جلسے سے شیر افضل مروت نے خطاب کرنا تھا۔ البتہ ان کے جلسہ گاہ آمد سے قبل جھڑپیں شروع ہو گئی تھیں۔

مقامی میڈیا کے مطابق مشتعل افراد نے پولیس کی متعدد گاڑیوں کو نقصان پہنچایا اور اس کے شیشے توڑ دیے۔

متحدہ قومی موومنٹ کے برطانیہ میں مقیم بانی الطاف حسین کی قیادت میں کام کرنے والی ایم کیو ایم نے کہا ہے کہ وہ بھی اپنے حمایت یافتہ امیدواروں کا اعلان کریں گے۔

ایم کیو ایم کی رابطہ کمیٹی کے مطابق متحدہ قومی موومنٹ کے لندن میں قائم انٹرنیشنل سیکریٹریٹ میں امیدواروں کا اعلان کیا جائے گا۔

واضح رہے کہ الطاف حسین کی قیادت میں فعال پارٹی کو مقامی میڈیا میں ایم کیو ایم لندن کا نام دیا جاتا ہے۔

ماضی میں الطاف حسین انتخابات کے بائیکاٹ کی اپیل کرتے رہے ہیں۔