پاکستان میں الیکشن میں چار دن باقی؛ انتخابی سرگرمیاں تیز

سول عدالت نے غیر شرعی نکاح کیس کا فیصلہ سناتے ہوئے سابق وزیرِ اعظم عمران خان اور بشریٰ بی بی کو سات سات سال قید اور پانچ پانچ لاکھ روپے جرمانے کا حکم دے دیا۔

وائس آف امریکہ کے نمائندے عاصم علی رانا کے مطابق سول جج قدرت اللہ نے ہفتے کو اڈیالہ جیل میں غیر شرعی نکاح کیس کا مختصر فیصلہ پڑھ کر سنایا۔

عدالت نے عمران خان اور بشریٰ بی بی کا نکاح غیر شرعی قرار دیا اور انہیں سات، سات سال قید کی سزا کا حکم دیا۔

ایک ہفتے کے دوران یہ تیسرا کیس میں جس میں سابق وزیرِ اعظم کو عدالت کی جانب سے سزا سنائی گئی ہے۔

اس سے قبل خصوصی عدالت نے سائفر کیس میں عمران خان کو دس سال جب کہ توشہ خانہ کیس میں سابق وزیرِ اعظم اور بشریٰ بی بی کو 14، 14 سال قید کی سزا سنائی گئی تھی۔

سابق وزیرِ اعظم کے مقدمات پر فیصلے ایسے موقع پر ہو رہے ہیں جب عام انتخابات میں ایک ہفتے سے بھی کم وقت رہ گیا ہے اور پاکستان تحریکِ انصاف (پی ٹی آئی) کے انتخابی امیدوار سپریم کورٹ کے فیصلے کے بعد آزاد حیثیت سے الیکشن لڑ رہے ہیں۔

مزید جانیے: عدت میں نکاح کا کیس: عمران خان اور بشریٰ بی بی کو 7،7 سال قید کی سزا

گزشتہ روز پیش آنے والے واقعات اور انتخابی سرگرمیوں سے متعلق پڑھنے کے لیے کلک کریں۔

استحکام پاکستان پارٹی (آئی پی پی) کے سربراہ جہانگیر ترین نے کہا ہے کہ انہوں نے کبھی کسی کو چور ڈاکو نہیں کہا۔ وہ اس طرح کی سیاست نہیں کرتے۔

ملتان میں میڈیا سے گفتگو میں جہانگیر ترین نے عمران خان اور بشریٰ بی بی کو عدت میں نکاح کیس میں سزا کے حوالے سے پوچھے گئے سوال پر کہا کہ عدالت نے تمام شواہد دیکھ کر فیصلہ کیا ہے۔ سب کو عدالت کے فیصلے کا احترام کرنا چاہیے۔

عام انتخابات کے بعد کی صورتِ حال کا ذکر کرتے ہوئے انہوں نے کہا کہ الیکشن کے بعد امید ہے ایک ایسی حکومت وجود میں آئے گی جس کو عوام کی حمایت اور اکثریت حاصل ہو گی اور وہ پانچ سال تک برسرِ اقتدار رہے گی۔ پانچ سال اتنا عرصہ ہوتا ہے جس میں منصوبے بن سکتے ہیں۔

ان کے بقول ان کے لیے ترجیح ملک کی معیشت کی بہتری ہے۔

مسلم لیگ (ن) کے صدر اور سابق وزیرِ اعظم شہباز شریف نے کہا ہے کہ مناظرے کی باتیں کرنے والے پہلے کارکردگی کا موازنہ کر لیں۔

لاہور میں پریس کانفرنس کرتے ہوئے شہباز شریف نے ہفتے کی شب ہونے والی بارش کا ذکر کرتے ہوئے کہا کہ کراچی کی صورتِ حال سامنے ہے۔

واضح رہے کہ کراچی میں ہفتے اور اتوار کو بارش ہوئی ہے جس کے بعد شاہراہوں پر پانی کھڑا ہو گیا تھا۔

قبل ازیں پیپلز پارٹی کے چیئرمین بلاول بھٹو زرداری نے مسلم لیگ (ن) کو مناظرے کا چیلنج دیا تھا۔