پاکستان کی حکمران جماعت پیپلز پارٹی کی رہنما فوزیہ وہاب کو سپرد خاک کر دیا گیا ہے۔
ان کی نمازہ جنازہ پیر کی دوپہر کراچی کے علاقے ڈیفنس میں ادا کی گئی جس میں وفاقی و صوبائی وزراء سمیت بڑی تعداد میں لوگوں نے شرکت کی۔
رکن قومی اسمبلی فوزیہ وہاب مختصر علالت کے بعد اتوار کو انتقال کر گئی تھیں ان کی عمر 56 برس تھی۔
پتے کی سرجری کے بعد فوزیہ وہاب کی طبیعت بگڑ گئی تھی اور تقریباً تین ہفتے کی علالت کے بعد وہ خالق حقیتی سے جا ملیں۔
فوزیہ وہاب پیپلز پارٹی کی سیکرٹری اطلاعات اور قومی اسمبلی کی اُمورِ خزانہ کی پارلیمانی کمیٹی کی سربراہ تھیں۔
