توشہ خانہ ریفرنس: عمران خان کی نااہلی کا تفصیلی فیصلہ جاری

الیکشن کمیشن آف پاکستان نے توشہ خانہ ریفرنس میں سابق وزیرِ اعظم عمران خان کی نااہلی کا تفصیلی فیصلہ جاری کر دیا ہے۔

پیر کو جاری چھتیس صفحات پر مشتمل فیصلے پر چیف الیکشن کمشنر سکندر سلطان راجا اور چاروں ممبران کے دستخط موجود ہیں۔

الیکشن کمیشن نے 19 اکتوبر کو اپنے مختصر فیصلے میں عمران خان کو آرٹیکل 63 ون پی کے تحت نااہل قرار دیا تھا اور قومی اسمبلی کی ان کی نشست خالی قرار دی تھی۔

ارشد شریف کا مبینہ قتل، کینیا کی حکومت کے ساتھ رابطے میں ہیں: وفاقی وزیرِ داخلہ

وفاقی وزیرِ داخلہ رانا ثنا اللہ نے صحافی ارشد شریف کے اہلِ خانہ کے ساتھ تعزیت کا اظہار کرتے ہوئے کہا ہے کہ واقعے سے متعلق حقائق جاننے کے لیے کینیا کی حکومت سے رابطے میں ہیں۔

رانا ثناء اللہ نے ایک بیان میں کہا ہے کہ کینیا میں ارشد شریف کے ساتھ پیش آنے والا واقعہ افسوس ناک ہے اور غم زدہ خاندان کے دکھ میں برابر کے شریک ہیں۔

انہوں نے ارشد شریف کی ہلاکت سے متعلق حقائق جاننے کے لیے کینیا کی حکومت سے رابطہ کیا ہے اور اس سلسلے میں نیروبی میں موجود پاکستانی سفارت خانہ مکمل معاونت کر رہا ہے۔

صحافی ارشد شریف کا کینیا میں مبینہ قتل، اسلام آباد ہائی کورٹ کا لاش وطن لانے کے لیے اقدامات کا حکم

اسلام آباد ہائی کورٹ نے صحافی ارشد شریف کی میت کینیا سے وطن واپس لانے کے لیے اقدامات کا حکم دے دیا ہے۔

چیف جسٹس اسلام آباد ہائی کورٹ جسٹس اطہر من اللہ نے پیر کو صحافی ارشد شریف کے کینیا میں مبینہ قتل کے معاملے کی تحقیقات کے لیے بیرسٹر شعیب رزاق کی درخواست پر سماعت کی۔

درخواست گزار نے عدالت سے استدعا کی کہ سیکیورٹی ایجنسیوں کو کینیا کی ایجنسیز سے رابطہ کر کے تحقیقات کا حکم دیا جائے اور اس معاملے پر کمیشن بنا کر تحقیقات کرائی جائیں کہ ارشد شریف کن حالات میں وطن چھوڑ کر باہر گئے۔

جسٹس اطہر من اللہ نے استفسار کیا کہ ارشد شریف کی میت کہاں ہے؟ بیرسٹر شعیب رزاق نے عدالت کو بتایا کہ میت کینیا کے دارالحکومت نیروبی میں ہے جسے پاکستان لانے کے لیے اقدامات کا حکم دیا جائے۔

عدالت نے وزارتِ داخلہ اور وزارتِ خارجہ کے نامزد افسر کو ارشد شریف کی فیملی سے فوری ملاقات کی ہدایت کی اور سیکریٹری داخلہ و خارجہ کو نوٹس جاری کرتے ہوئے منگل تک رپورٹ طلب کر لی۔

واضح رہے کہ ارشد شریف کی اہلیہ نے پیر کی صبح ایک ٹویٹ میں بتایا تھا کہ ان کے شوہر کو کینیا میں فائرنگ کر کے قتل کر دیا گیا ہے جس کے بعد صدر، وزیرِ اعظم اور صحافیوں سے مختلف شخصیات نے ارشد شریف کی موت پر اظہارِ تعزیت کیا ہے۔

جمعے کو لانگ مارچ کی تاریخ کا اعلان کر دوں گا: عمران خان

تحریکِ انصاف کے چیئرمین عمران خان نے بیک ڈور رابطوں کی تصدیق کردی ہے۔ تاہم اُن کا کہنا ہے کہ ان رابطوں کا کوئی نتیجہ نہیں نکلے گا، کیوں کہ اُن کا مطالبہ صرف فوری الیکشن ہے۔

اسلام آباد میں اعظم سواتی کے ہمراہ نیوز کانفرنس کرتے ہوئے عمران خان کا کہنا تھا کہ اُن کے لیے مذاکرات کی اس لیے اہمیت نہیں ہے، کیوں کہ اُنہیں پورا یقین ہے کہ حکومت الیکشن نہیں کرائے گی۔

عمران خان کا کہنا تھا کہ اُن کا لانگ مارچ پرامن ہو گا، اُن کی 26 سال کی جدوجہد عدم تشدد پر مبنی رہی ہے۔

عمران خان کا کہنا تھا کہ حکومت نے چن کر اُن حلقوں کا انتخاب کیا جو وہ سمجھ رہے تھے کہ تحریکِ انصاف کے لیے کمزور ہیں، لیکن انہیں وہاں بھی شکست ہوئی۔ لہذٰا حکومت کسی صورت فوری الیکشن کا مطالبہ نہیں مانے گی، اسی لیے وہ لانگ مارچ کریں گے۔