پنجاب اسمبلی میں ہنگامہ آرائی کا کیس: عطا تارڑ کی عبوری ضمانت منظور

پنجاب اسمبلی میں ہنگامہ آرائی کے کیس میں وزیرِ اعظم شہباز شریف کے معاون خصوصی عطا تارڑ کی عبوری ضمانت منظور ہو گئی ہے۔

لاہور کی ایک مقامی عدالت نے پولیس کو عطا تارڑ کو گرفتار کرنے سے بھی روک دیا ہے۔

عدالت نے پنجاب اسمبلی میں ہنگامہ آرائی کے کیس میں عطا تارڑ کو شاملِ تفتیش ہونے کا حکم دیا ہے جب کہ 50 ہزار روپے مچلکوں کے عوض 14 ستمبر تک ان کی عبوری ضمانت منظور کرلی گئی ہے۔

عطا تارڑ نے درخواستِ ضمانت میں مؤقف اختیار کیا تھا کہ پنجاب اسمبلی میں ہنگامہ آرائی سے ان کا کوئی تعلق نہیں۔ پولیس نے سیاسی بنیاد پر انہیں مقدمے میں نامزد کیا ہے۔

درخواست گزار کا مزید کہنا تھا کہ ان پر اسمبلی اہلکار کی وردی پھاڑنے اور حملہ کرنے کا الزام ہے لیکن سی سی ٹی وی فوٹیج میں دیکھا جا سکتا ہے کہ وہ اس جرم میں شریک نہیں ہیں۔

عمران خان کے گجرات میں جلسے کی تیاریاں

سابق وزیرِ اعظم اور چیئرمین تحریکِ انصاف عمران خان جمعے کو گجرات میں جلسے سے خطاب کریں گے۔

تحریکِ انصاف کے جلسے کے لیے گجرات کے ظہور الہیٰ اسٹیڈیم میں تیاریاں کی گئی ہیں جہاں شام چھے بجے عمران خان کارکنوں سے خطاب کریں گے۔

جمعرات کو وزیرِ اعلیٰ پنجاب چوہدری پرویز الہیٰ نے جلسہ گاہ پہنچ کر وہاں انتظامات کا جائزہ بھی لیا تھا۔

حکمران آئی ایم ایف اور سیلاب میں پھنس گئے ہیں، شیخ رشید احمد

عوامی مسلم لیگ کے سربراہ شیخ رشید کہتے ہیں کہ عمران خان آئی ایم ایف اور کرونا سے بچ گئے لیکن حکمران آئی ایم ایف اور سیلاب میں پھنس گئے ہیں۔

شیخ رشید نے ایک ٹویٹ میں حکومت کی معاشی پالیسی پر کڑی تنقید کی۔ ان کا کہنا تھا کہ عالمی مارکیٹ میں جتنا تیل سستا ہوتا ہے پاکستان میں اتنا ہی مہنگا ہو جاتا ہے۔ اوپن مارکیٹ میں ڈالر کی قدر میں تین روپے کا اضافہ ہوا ہے۔

انہوں نے کہا کہ حکومت نے معاشی ناکامی میں داتا دربار داخلے پر بھی 10 روپے ٹیکس لگا دیا ہے۔

وزیر اعظم شہباز شریف نے ملک میں 300 یونٹ تک بجلی استعمال کرنے والوں کے لیے فیول سر چارج ختم کرنے کا اعلان کر دیا ہے۔

اسلام آباد میں مسلم لیگ (ن) کے اراکین اسمبلی سے خطاب کرتے ہوئے ان کا کہنا تھا کہ ہم نے پہلے مرحلے میں 200 یونٹ تک بجلی استعمال کرنے والوں کے فیول ایڈجسٹمنٹ جارچر ختم کردیے تھے جس پر حکومت کو 21 ارب روپے کا بوجھ اٹھانا پڑا۔

ان کا کہنا تھا کہ مگر 48 سے 52 فی صد صارفین ہی صرف 200 یونٹ تک بجلی استعمال کرتے تھے لہٰذا میں نے 300 یونٹ تک استثنیٰ دیں گے تو بات بنے گی۔

وزیرِاعظم نے کہا کہ جو لوگ 300 یونٹ تک بجلی استعمال کرتے ہیں ان کے لیے فیول ایڈجسٹمنٹ چارجز ختم کر دیے ہیں۔