عمران خان سیلاب کو اپنی سیاست چمکانے کے لیے استعمال کر رہے ہیں: شہباز شریف

وزیرِ اعظم شہباز شریف نے کہا ہے کہ عمران خان پاکستان میں آنے والے بدترین سیلاب کو اپنی سیاست چمکانے کے لیے استعمال کر رہے ہیں۔

برطانوی جریدے 'دی اکانومسٹ' کی رپورٹ کا حوالہ دیتے ہوئے شہباز شریف کا کہنا تھا کہ جریدے نے بھی ہماری اس بات کی تائید کر دی ہے جو ہم شروع دن سے عمران خان کے بارے میں کہتے تھے۔

شہباز شریف کا کہنا تھا کہ جریدے نے لکھا ہے کہ کیسے عمران خان نے آئی ایم ایف کے ساتھ معاہدے کی دھجیاں اُڑائیں اور سیلاب کو اپنی سیاست چمکانے کے لیے استعمال کر رہے ہیں۔ عمران نیازی پاکستان کے لیے خطرہ ہیں۔

توہین عدالت کیس: عمران خان آج ذاتی حیثیت میں پیش ہوں گے

سابق وزیرِ اعظم عمران خان خاتون مجسٹریٹ زیبا چوہدری کو دھمکیاں دینے سے متعلق توہینِ عدالت کیس میں آج ذاتی حیثیت میں پیش ہوں گے۔

چیف جسٹس اسلام آباد ہائی کورٹ جسٹس اطہر من اللہ کی سربراہی میں پانچ رکنی بینچ توہین عدالت کی کارروائی کی سماعت کرے گا۔ بدھ کو عمران خان نے اس کیس میں عدالتی احکامات پر اپنا دوسرا جواب جمع کرایا تھا۔

اس سے قبل اسلام آباد ہائی کورٹ نے 31 اگست کو سماعت کے موقع پر عمران خان کے جواب پر عدم اطمینان کا اظہار کرتے ہوئے انہیں دوبارہ جواب جمع کرانے کا حکم دیا تھا۔

سابق وزیرِ اعظم نے اپنے جمع کرائے گئے نئے بیان میں کہا ہے کہ انہیں خاتون جوڈیشل مجسٹریٹ زیبا چوہدری سے متعلق غیر ارادی طور پر منہ سے نکلنے والے الفاظ پر افسوس ہے۔

عمران خان نے اپنے جواب میں عدالت سے غیرمشروط معافی تو نہیں مانگی تاہم ان کا کہنا ہے کہ ان کا مقصد خاتون مجسٹریٹ کی دل آزاری نہیں تھا۔ وہ یقین دہانی کراتے ہیں کہ عدالت اور ججز کا احترام کرتے ہیں۔

دہشت گردی کا مقدمہ: اسلام آباد ہائی کورٹ کا عمران خان کو شاملِ تفتیش ہونے کا حکم

اسلام آباد ہائی کورٹ نے پاکستان تحریکِ انصاف کے چیئرمین عمران خان کو اُن کے خلاف درج دہشت گردی کے مقدمے میں شاملِ تفتیش ہونے کا حکم دیا ہے۔

منگل کو سماعت کے دوران اسلام آباد ہائی کورٹ نے پولیس کو مقدمے کا چالان پیش کرنے سے روک دیا اور پہلے تفتیش مکمل کرنے کی ہدایت کر دی۔

خیال رہے کہ عمران خان نے اپنے خلاف مقدمہ خارج کرنے کے لیے اسلام آباد ہائی کورٹ میں درخواست دائر کر رکھی ہے۔

عدالت نے پولیس کو حکم دیا کہ وہ عمران خان کا بیان ریکارڈ کرے اور پھر عدالت کو آگاہ کرے کہ انسدادِ دہشت گردی کا مقدمہ بنتا ہے یا نہیں۔

چیف جسٹس اطہر من اللہ نے ریمارکس دیے کہ پولیس اہلکار ریاست کا نمائندہ ہوتا ہے اور قانون پر عمل کرنا ہر شہری پر فرض ہے، لہذٰا عمران خان اس معاملے میں شاملِ تفتیش ہوں۔

خیال رہے کہ چند روز قبل اسلام آباد میں تحریکِ انصاف کے گرفتار رہنما ڈاکٹر شہباز گل کے ساتھ اظہارِ یکجہتی ریلی میں عمران خان کی جانب سے پولیس حکام اور خاتون جج کو دھمکیاں دینے کے الزام میں دہشت گردی کی دفعات کے تحت مقدمہ درج کیا گیا تھا۔

افواج اور عوام کے درمیان بداعتمادی پھیلانے والے پاکستان کے خیر خواہ نہیں ہیں: شہباز شریف

وزیرِ اعظم پاکستان شہباز شریف نے کہا ہے کہ افواجِ پاکستان اور عوام کے درمیان دُوریاں پیدا کرنے کی کوشش کرنے والے ملک کے خیر خواہ نہیں ہیں۔

پاکستان اور بھارت کی ستمبر 1965 میں ہونے والی جنگ پر ملک میں منائے جانے والے یومِ دفاع پر اپنے پیغام میں شہباز شریف نے کہا کہ آج جب پاکستان سیلاب اور دیگر چیلنجز میں گھرا ہوا ہے تو ایسے میں ہمیں 1965 والے جذبے کی ضرورت ہے۔