کراچی: ڈینٹل کلینک پر حملہ کرنے والے شخص کی گرفتاری کا دعویٰ

سندھ پولیس کے محکمۂ انسداد دہشت گردی (سی ٹی ڈی) نے کراچی میں ڈینٹل کلینک پر فائرنگ میں ملوث شخص کو گرفتار کرنے کا دعویٰ کیا ہے۔ جس کا تعلق کالعدم تنظیم ایس آر اے کی ذیلی تنظیم سندھ پیپلز آرمی سے بتایا گیا ہے۔

جمعہ کو جاری ایک اعلامیے میں سی ڈی ٹی نے بتایا کہ حساس اداروں کی مدد سے کالعدم تنظیم کی موجودگی پر کارروائی کی گئی جس میں ایس آر اے سے تعلق رکھنے والے شخص کو گرفتار کیا گیا۔ سی ٹی ڈی کے بقول ''اس تنظیم کے دہشت گردوں نے ہو ڈینٹل کلینک صدر کراچی کو ٹارگٹ کیا۔'' جس میں ایک دوہری شہریت یافتہ شخص رونلڈ رائمنڈ ہلاک جب کہ دو افراد زخمی ہوئے۔

سی ڈی ٹی کا کہنا ہے ک ملزم کے قبضے سے واردات میں استعمال ہونے والی موٹرسائیکل برآمد کی گئی۔

سوات میں امن و امان کی صورتِ حال تشویش ناک ہے لیکن کنٹرول سے باہر نہیں: وفاقی وزیرِ داخلہ

وفاقی وزیرِ داخلہ رانا ثناء اللہ نے کہا ہے کہ سوات میں امن و امان کی صورتِ حال تشویش ناک ضرور ہے لیکن حالات اتنے خراب نہیں کہ اسے کنٹرول نہ کیا جا سکے۔

جیو نیوز کے پروگرام 'جیو پاکستان' میں جمعے کو گفتگو کرتے ہوئے رانا ثنا اللہ نے کہا کہ پاکستان کے سیکیورٹی ادارے سوات میں صورتِ حال پر قابو پانے کی بھرپور صلاحیت رکھتے ہیں۔

انہوں نے کہا کہ سوات سمیت صوبے بھر میں عوام کے جان و مال کے تحفظ کے لیے خیبر پختونخوا حکومت سے تعاون کریں گے۔

واضح رہے کہ چند روز قبل سوات میں اسکول وین پر فائرنگ کے نتیجے میں ڈرائیور ہلاک اور دو طالب علم زخمی ہو گئے تھے۔ اس واقعے کے خلاف ہزاروں افراد نے سوات میں احتجاج کیا تھا۔

وفاقی وزیرِ داخلہ کے بقول سوات کے سرکردہ رہنماؤں سے مشاورت ہوئی ہے اور وفاقی حکومت قیامِ امن کے لیے صوبائی حکومت کے ساتھ ہر ممکن تعاون کرے گی۔

رانا ثناء اللہ نے شکوہ کیا کہ خیبر پختونخوا حکومت لانگ مارچ کی تیاریوں میں لگی ہے اور انہیں سوات کی صورتِ حال کا کوئی احساس نہیں جب کہ وزیرِ اعلیٰ نے اب تک سوات کے معاملے پر کوئی بیان نہیں دیا۔

وفاقی حکومت نے عمران خان کے خلاف توہینِ عدالت کی درخواست دائر کر دی

‏وفاقی حکومت نے تحریکِ انصاف کے چیئرمین عمران خان کے خلاف توہینِ عدالت کی درخواست سپریم کورٹ میں دائر کر دی ہے۔

وفاقی حکومت کی استدعا میں کہا گیا ہے کہ عمران خان ایک مرتبہ پھر اسلام آباد پر چڑھائی کے اعلانات کر رہے ہیں۔

وفاقی حکومت نے سپریم کورٹ سے استدعا کی ہے کہ عمران خان کو احتجاج اور دھرنے کے حوالے سے احکامات پر عمل درآمد یقینی بنانے کا پابند بنایا جائے۔

خیال رہے کہ سپریم کورٹ نے حکم دے رکھا ہے کہ اسلام آباد کے ریڈ زون میں کسی کو احتجاج یا دھرنا دینے کی اجازت نہ دی جائے۔ اس حوالے سے سپریم کورٹ نے اسلام آباد کے د و مقامات پر احتجاج کے لیے جگہ مختص کرنے کی ہدایت کی تھی۔

خیبرپختونخوا میں ضمنی انتخابات کے لیے سیکیورٹی انتظامات کو حتمی شکل دے دی گئی

سولہ اکتوبر کو خیبرپختونخوا کے مختلف حلقوں میں شیڈول ضمنی انتخابات کے یے سیکیورٹٰی انتظامات کو حتمی شکل دے دی گئی ہے۔ پشاور کے حلقہ این اے 31 میں 265 پولنگ اسٹیشنز کو حساس قرار دے دیا گیا ہے۔

حساس پولنگ اسٹیشنز پر نو سے 10 اہلکار تعینات ہوں گے۔

این اے 22 مردان سمیت این اے 24 چارسدہ میں مجموعی طور پر 714 پولنگ اسٹیشن قائم کیے گئے ہیں۔ این اے 22 میں 238 پولنگ اسٹیشنز حساس ترین جب کہ 92 کو حساس قرار دیا گیا ہے۔

این اے 24 چارسدہ میں 242 پولنگ اسٹیشنز میں سے 142 کو حساس قرار دیا گیا ہے۔