سندھ کے وزیرِ اطلاعات شرجیل انعام میمن نے کہا ہے کہ پیپلز پارٹی کراچی میں بلدیاتی انتخابات کرانے کے لیے تیار ہے۔

کراچی میں بلدیاتی انتخابات ملتوی ہونے پر منگل کو مقامی نیوز چینل 'جیو نیوز' سے گفتگو کرتے ہوئے شرجیل انعام میمن نے کہا کہ سیلاب سے پورا ملک متاثر ہے۔ کراچی کے علاوہ سندھ کی پولیس کی پوری نفری سیلاب متاثرین کی مدد میں لگی ہوئی ہے۔

انہوں نے کہا کہ موجودہ صورتِ حال کو دیکھتے ہوئے ہم نے الیکشن میں امن و امان کے لیے وفاق سے اضافی سیکیورٹی اہلکاروں کی درخواست کی تھی۔

انہوں نے کہا کہ ہم نے بلدیاتی انتخابات کرانے کے لیے منع نہیں کیا تھا، اگر الیکشن کمیشن ابھی اپنا فیصلہ واپس لیتا ہے تو ہم انتخابات کرائیں گے لیکن اس میں سیکیورٹی کم ہوگی۔

پاکستان کی فوج کے سربراہ جنرل قمر جاوید باجوہ کی سربراہی میں ہونے والی کور کمانڈرز کانفرنس میں جوہری ہتھیاروں کے تحفظ کے لیے قائم کمانڈ اینڈ کنٹرول سسٹم پر مکمل اعتماد کا اظہار کیا گیا۔

فوج کے شعبۂ تعلقات عامہ (آئی ایس پی آر) نے منگل کو راولپنڈی میں ہونے والی کانفرنس سے متعلق بیان میں کہا ہے کہ پاکستان ایک ذمے دار ایٹمی ہتھیار رکھنے والی ریاست ہے۔

فوج کے مطابق جوہری اثاثوں کے تحفظ کے لیے عالمی معیار کے مطابق تمام ضروری اقدامات کیے گئے ہیں۔

آئی ایس پی آر کا بیان میں مزید کہنا تھا کہ کور کمانڈرز کانفرنس میں ملکی اور غیر ملکی سیکیورٹی صورت حال کا بھی جائزہ لیا گیا۔

کور کمانڈرز نے سندھ اور بلوچستان میں سیلاب سے متاثرہ علاقوں میں بحالی کی سرگرمیوں کے لیے فوجی اہلکاروں کی سول انتظامیہ کے ساتھ معاونت کو بھی سراہا۔

کراچی میں بلدیاتی انتخابات تیسری بار ملتوی

الیکشن کمیشن آف پاکستان نے 23 اکتوبر کوکراچی میں ہونے والے بلدیاتی انتخابات ایک بار پھر ملتوی کرنے کا اعلان کیا ہے۔

انتخابات ملتوی کرنے کا فیصلہ منگل کو الیکشن کمیشن کے اجلاس میں کیا گیا۔ اجلاس کے بعد جاری کیے جانے والے ایک بیان کے مطابق 15 دن کے بعد ہونے والے کمیشن کے اجلاس میں آئندہ بلدیاتی انتخابات کی تاریخ سے متعلق غور کیا جائے گا۔

واضح رہے کہ الیکشن کمیشن نے سندھ حکومت سے کہا تھا کہ وہ 23 اکتوبر کو بلدیاتی انتخابات کے انعقاد کے لیے سیکیورٹی انتظامات کرے جس پر سندھ حکومت نےمؤقف اختیار کیا تھا کہ اس کے پاس سیلاب کی وجہ سے پولیس اہلکاروں کی کمی ہے۔

سندھ حکومت نے الیکشن کمیشن کو آگاہ کیا تھا کہ اس کو لگ بھگ 16 ہزار پولیس اہلکاروں کی کمی کا سامنا ہے اس لیے بلدیاتی انتخابات تین ماہ کے لیے ملتوی کیے جائیں۔

الیکشن کمیشن کے مطابق سندھ حکومت کے جواب کے بعد کمیشن نے کراچی کے سات اضلاع میں اتوار کو ہونے والے انتخابات کی سیکیورٹی کےلیے وفاقی وزارتِ داخلہ سے رابطہ کیا۔

بیان کے مطابق وفاقی وزارتِ داخلہ نے نے کوئیک رسپانس فورس کے لیے فوجی اور رینجرز اہلکار فراہم کرنے کی ہامی بھری تھی لیکن الیکشن کی سیکیورٹی کے لیے ان دونوں اداروں کے اہلکاروں کو پولیس کے متبادل کے طور پر تعینات کرنے سے معذرت کرلی تھی۔ کوئیک رسپانس فورس اس وقت طلب کی جاتی ہے جب پولیس کو مدد کی ضرورت ہو۔

بیان میں کہا گیا ہے کہ ان حالات میں الیکشن کمیشن کے پاس بلدیاتی انتخابات فی الحال ملتوی کرنے کے علاوہ اور کوئی راستہ نہیں۔

وفاقی وزیرِ داخلہ رانا ثنا اللہ کا کہنا ہے کہ الیکشن کمیشن غیر جانب دارانہ انتخابات کرانے پر مبارک باد کا مستحق ہے، تحریکِ انصاف مستقل اسی الیکشن کمیشن کے سربراہ کو تنقید کا نشانہ بنا رہی ہے۔

اسلام آباد میں پریس کانفرنس کرتے ہوئے رانا ثنا اللہ کا کہنا تھا کہ حکومت چاہتی تو آر ٹی ایس خراب ہو سکتا تھا۔ ماضی میں ایسا ہوتا رہا ہے۔ لیکن حکومت قانون کی حکمرانی چاہتی ہے اور ایسا الیکشن ہو جس پر کسی کو انگلی اٹھانے کا موقع نہ ملے۔

رانا ثنا اللہ نے مزید کہا کہ مہنگائی کے باوجود لاکھوں افراد نے مسلم لیگ (ن) پر اعتماد کیا ہے اور ضمنی الیکشن میں مسلم لیگ (ن) کو ووٹ دیا ہے البتہ ساڑھے پانچ لاکھ لوگوں نے ہمارے خلاف ووٹ دیا ہے۔ لوگ یہ سمجھ رہے تھے کہ اپریل میں حکومت کی تبدیلی کے ساتھ مہنگائی میں کمی ہو گی لیکن اب تک عوام کی امید پر پورا نہیں اتر سکے، اگر سیلاب کا معاملہ نہ ہوتا تو مہنگائی کم ہو چکی ہوتی۔