اسلام آباد ہائی کورٹ نے آصف زرداری کے خلاف نیب کی اپیلیں خارج کر دیں

اسلام آباد ہائی کورٹ نے نیب کی درخواست پر 25 برس پرانے ریفرنسز میں سابق صدر آصف علی زردری کی بریت کے خلاف نیب کی اپیلیں خارج کر دی ہیں۔ نیب نے آصف زرداری کے خلاف دائر ریفرنسز میں اُن کی بریت کے خلاف اپیلیں واپس لینے کے لیے بدھ کو اسلام آباد ہائی کورٹ سے رُجوع کیا تھا۔

نیب نے آصف زرداری کی بریت کے خلاف چار ریفرنسز میں اپیلیں واپس لینے کی استدعا کی تھی جن میں اے آروائی گولڈ، پولو گراؤنڈ، ارسس ٹریکٹر، ایس جی ایس کوٹیکنا ریفرنسز شامل ہیں۔

نیب نے اپنی درخواست میں مؤقف اختیار کیا تھا کہ آصف زرداری کے خلاف ریفرنس میں صرف کاغذات کی فوٹو کاپیز ہی ریکارڈ کا حصہ ہیں، جو قانون کے مطابق نہیں ہیں۔ لہذٰا اس معاملے کو آگے بڑھانے کا کوئی فائدہ نہیں ہے۔

آڈیو لیکس کی تحقیقات، عمران خان نے سپریم کورٹ سے رُجوع کر لیا

چیئرمین تحریکِ انصاف عمران خان نے آڈیو لیکس کی تحقیقات کے لیے سپریم کورٹ سے رُجوع کر لیا ہے۔

عمران خان کی جانب سے دائر کی گئی درخواست میں مؤقف اختیار کیا گیا ہے کہ آڈیو لیکس کی تحقیقات کے لیے سپریم کورٹ جوڈیشل کمیشن یا مشترکہ تحقیقاتی ٹیم بنائے۔

عمران خان نے اپنی درخواست میں یہ استدعا بھی کی ہے کہ آئندہ جاری ہونے والی آڈیو، ویڈیوز لیکس کو روکا جائے۔

خیال رہے کہ حالیہ عرصے میں سابق وزیرِ اعظم عمران خان اور موجودہ وزیرِ اعظم شہباز شریف کی مبینہ آڈیوز منظرِ عام پر آتی رہی ہیں۔ یہ آڈیوز مبینہ طور پر وزیرِ اعظم ہاؤس میں ریکارڈ کی گئی تھیں۔

غیرملکی صحافی کو لاہور ایئرپورٹ پر روک لیا، آٹھ گھنٹے بعد داخلے کی اجازت

صحافی اور کمیٹی ٹو پروٹیکٹ جرنلسٹس (سی پی جے) کے سینئر پروگرام کنسلٹنٹ اسٹیون بٹلر کو آٹھ گھنٹنے تک روکنے رکھنے کے بعد پاکستان میں داخلے کی اجازت دی دی گئی۔

اسٹیون بٹلر عاصمہ جہانگیر کانفرنس میں شرکت کے لیے رات گئے پاکستان پہنچے تھے جہاں لاہور ایئرپورٹ پر انہیں روک لیا گیا تھا۔

وائس آف امریکہ کے نمائندے ضیاء الرحمٰن کے مطابق ذرائع کا کا کہنا ہے کہ اسٹیون بٹلر کو امیگریشن حکام نے لگ بھگ آٹھ گھنٹے روکا۔ ذرائع کے مطابق اسٹیو بٹلر کا نام 'اسٹاپ لسٹ' میں شامل تھا۔

ایئرپورٹ حکام کا کہنا ہے کہ اسٹیون بٹلر کو روکنے کے بعد ایف آئی اے امیگریشن نے وزارتِ داخلہ سے رابطہ کیا جس کے بعد وزارتِ داخلہ کی منظوری سے انہیں پاکستان میں داخلے کی اجازت دے دی گئی۔

ذرائع کا کہنا ہے کہ صحافی اسٹیون بٹلر کو 2019 میں پاکستان آنے پر ڈی پورٹ کردیا گیا تھا۔

پاکستان کو سودی نظام سے نکالنے کی کوشش ہے‘

وفاقی وزیرِ خزانہ اسحاق ڈار نے کہا ہے کہ کوشش ہوگی پاکستان کو سودی نظام سے نکالوں۔ پہلے بھی پاکستان کو اس نظام سے نکالنے کی کوشش کی ہے۔

اسلام آباد میں کانفرنس سے خطاب کے بعد میڈیا سے گفتگو میں اسحاق ڈار نے کہا کہ کوشش ہو گی پاکستان کو مرحلہ وار سودی نظام سے نکالیں۔

ایف اے ٹی ایف کی گرے لسٹ سے پاکستان کا نام نکلنے کے سوال پر انہوں نے کہا کہ جمعے کو ایف اے ٹی ایف کے حوالے سے خبر سامنے آئے گی۔ ایف اے ٹی ایف اجلاس سے قبل کوئی اعلان نہیں کر سکتے۔ ویسے اچھی خبر کی امید ہے۔

روس سے تیل کے حصول پر انہوں نے کہا کہ پاکستان روس سے تیل کے حصول کے لیے اپنے مفاد میں فیصلہ کرے گا۔ امریکہ کے دورے میں یہ باور کرایا ہے کہ اگر اسلام آباد کو بھارت سے زیادہ بہتر قیمت پر تیل ملا تو پاکستان اپنے مفاد میں فیصلہ کرے گا۔