بغیر کسی کال کے پاکستانی عوام کے باہر نکلنے پر مبارک باد پیش کرتا ہوں: فواد چوہدری
تحریکِ انصاف کے رہنما فواد چوہدری نے عمران خان کی ایک تصویر جاری کی ہے جس میں اُن کے بقول الیکشن کمیشن کی جانب سے اُن کے خلاف فیصلہ آنے کے باوجود عمران خان ہشاش بشاش ہیں۔
اپنی ٹویٹ میں فواد چوہدری نے پی ٹی آئی کارکنوں کا شکریہ ادا کرتے ہوئے کہا کہ جس طرح بغیر کسی کال کے لوگ باہر نکلے ہیں، وہ قابلِ تحسین ہے۔
الیکشن کمیشن دفتر کے باہر پی ٹی آئی کارکنوں کا احتجاج، ایم این اے گرفتار
چیئرمین تحریکِ انصاف عمران خان کے خلاف فیصلہ آنے پر الیکشن کمیشن کے باہر صورتِ حال کشیدہ ہے۔
پاکستان تحریکِ انصاف کے کارکن الیکشن کمیشن کے باہر احتجاج کر رہے ہیں۔ اس دوران پی ٹی آئی ایم این اے صالح محمد کے گارڈ کی جانب سے فائرنگ پر پولیس نے گارڈ اور بعدازاں ایم این اے کو بھی حراست میں لے لیا۔
مقامی ذرائع ابلاغ کی رپورٹس کے مطابق احتجاج کے دوران خیبرپختونخوا پولیس کے ایک اہلکار نے بھی فائرنگ کی جس پر اسلام آباد پولیس نے اہلکار کو گرفتار کر لیا۔
گرفتار پولیس اہلکار نے اس موقع پر کہا کہ چاہے جو بھی ہو جائے وہ عمران خان کا ساتھ نہیں چھوڑیں گے۔
تحریکِ انصاف لاہور نے کارکنوں کو شہر کے داخلی راستوں پر پہنچنے کی ہدایت کر دی
توشہ خانہ ریفرنس میں عمران خان کے خلاف فیصلہ آنے پر تحریکِ انصاف لاہور نے کارکنوں کو احتجاج کے لیے شہر کے داخلی راستوں پر پہنچنے کی ہدایت کر دی ہے۔
تحریکِ انصاف کے رہنما اور سابق وفاقی وزیر حماد اظہر نے کارکنوں کو بند روڈ، بابو صابو، ٹھوکر نیاز بیگ، شاہدرہ، شنگھائی چوک فیروز پور روڈ اور بھٹہ چوک پہنچنے کی ہدایت کی ہے۔
عمران خان کی نااہلی پر مریم نواز کا ردِعمل