براہِ راست تحریکِ انصاف کے قافلے اور پولیس میں مڈبھیڑ، احتجاج کی کال دینے پر عمران خان کے خلاف مقدمہ درج

موٹروے پر پولیس اور مظاہرین میں مڈبھیڑ کے دوران سات افراد زخمی ہوئے ہیں جن میں پولیس کے چار اہلکار شامل ہیں۔

پولیس ترجمان کے مطابق تمام زخمیوں کو باچاخان میڈیکل کمپلیکس لایا گیا ہے۔ ان زخمیوں میں پنجاب پولیس کے چار اہلکار شامل ہیں۔

باچاخان میڈیکل کمپلیکس کے ڈائریکٹر ایمرجنسی ڈاکٹر رازق شاہ کا کہنا تھا کہ زخمیوں کو زیادہ تر چوٹیں سر پر لگی ہیں۔ پولیس اہلکاروں اور عام شہری اس وقت سرجیکل ایمرجنسی میں ہیں۔

پنجاب کی پولیس نے راولپنڈی کے تھانہ دھمیال میں سابق وزیرِ اعظم عمران خان، ان کی اہلیہ بشریٰ بی بی، بہن علیمہ خان اور خیبر پختونخوا کے وزیرِ اعلیٰ علی امین گنڈاپور سمیت تحریکِ انصاف کے دیگر رہنماؤں کے خلاف ایک اور مقدمہ درج کر لیا ہے۔

اس مقدمے میں دہشت گردی سمیت 14 دیگر دفعات شامل کی گئی ہیں۔

اس مقدمے میں بھی سابق صدرڈاکٹر عارف علوی، سابق اسپیکر قومی اسمبلی اسد قیصر، قومی اسمبلی میں اپوزیشن رہنما عمر ایوب، سابق وزیر حماد اظہر سمیت 200 افراد کو نامزد کیا گیا ہے۔

ایف آئی آر کے متن میں کہا گیا ہے کہ نامزد ملزمان نے چکری روڈ پر ٹائر جلا کر سڑک بلاک کی جب کہ اشتعال انگیز نعرے بازی کرکے خوف و ہراس پھیلایا۔ یہ بھی دعویٰ کیا گیا ہے کہ ملزمان نے پولیس پر پتھراو کیا جب کہ آتشی اسلحے سے فائرنگ کی گئی۔

متن کے مطابق عمران خان کی بہن علیمہ خان نے بانی پی ٹی آئی کی طرف سے 24 نومبر کے احتجاج کا پیغام دیا جب کہ ان کی اہلیہ بشریٰ بی بی کی ایماء پر لوگ مشتعل ہوئے اور سڑکوں پر نکلے۔

پاکستان تحریکِ انصاف کے رہنما سابق وزیرِ اعظم عمران خان سے ملاقات کے لیے اڈیالہ جیل پہنچ گئے ہیں۔

مقامی میڈیا کے مطابق اڈیالہ جیل پہنچنے والے رہنماؤں میں پی ٹی آئی کے چیئرمین بیرسٹر گوہر اور بیرسٹر سیف شامل ہیں۔

واضح رہے کہ یہ ملاقات ایسے موقع پر ہو رہی ہے جب پی ٹی آئی کا احتجاج جاری ہے اور قافلے اسلام آباد کی جانب رواں دواں ہیں۔

پنجاب کے تھانہ ٹیکسلا میں جیل میں قید سابق وزیرِ اعظم عمران خان، ان کی اہلیہ بشریٰ بی بی، بہن علیمہ خان اور وزیرِ اعلیٰ خیبر پختونخوا علی امین گنڈا پور سمیت تحریکِ انصاف کے دیگر رہنماؤں کے خلاف انسدادِ دہشت گردی ایکٹ کے تحت مقدمہ درج کیا گیا ہے۔

مقامی میڈیا کے مطابق تھانہ ٹیکسلا میں درج مقدمے میں دہشت گردی سمیت 13 دفعات شامل کی گئی ہیں۔ اس ایف آئی آر میں سابق صدر عارف علوی، حماد اظہر، اسد قیصر اور اپوزیشن لیڈر عمر ایوب کو بھی نامزد کیا گیا ہے۔

مقدمے کے متن کے مطابق عمران خان نے علیمہ خان کے ذریعے عوام کو 24 نومبر کے احتجاج کا پیغام دیا تھا۔ بشریٰ بی بی نے 19 نومبر کے ویڈیو پیغام میں کارکنوں کو اسلام آباد پہنچنے کی ہدایت کی تھی۔ ملزمان نے پُر تشدد احتجاج کرکے شہریوں کی زندگیوں کو خطرے میں ڈالا اور جلاؤ گھیراؤ کیا۔

یہ بھی کہا گیا ہے کہ ملزمان نے ریاستی اداروں کے خلاف نعرے لگائے ہیں جب کہ عوام میں خوف و ہراس پھیلایا ہے۔