براہِ راست پی ٹی آئی کا قافلہ ڈی چوک پہنچ گیا، علی امین گنڈاپور کا آگے نہ بڑھنے کا اعلان

پی ٹی آئی کے احتجاج کے دوران اسلام آباد میں جگہ جگہ پر مظاہرین اور پولیس کی جھڑپیں ہوئیں اور آنسو گیس کی شدید شیلنگ کی وجہ سے کئی علاقے میدانِ جنگ کا منظر پیش کرتے رہے۔

تحریکِ انصاف کے کارکنان اسلام آباد کے ڈی چوک پر پہن رہے ہیں۔

مظاہرین نے ڈی چوک کے قریب کھڑے کنٹینر گرا دیے ہیں جب کہ ڈی چوک پر موجود پولیس اور رینجرز اہلکار پیچھے ہٹ گئے ہیں۔

وفاقی وزیرِ اطلاعات عطا للہ تارڑ کا کہنا ہے کہ تحریکِ انصاف کے احتجاج میں شامل افراد کرائے پر لائے ہوئے لوگ ہیں۔

اسلام آباد میں میڈیا سے گفتگو میں وزیرِ اطلاعات کا کہنا تھا کہ جب بھی کسی دوست ملک کا دورہ ہوتا ہے۔ اسی وقت احتجاج کیوں ہوتا ہے جب کہ ڈی چوک پر ہی کیوں احتجاج کیا جاتا ہے۔

انہوں نے مزید کہا کہ کسی کو بھی اجازت نہیں دی جائے گی کہ پاکستان کے آئے ہوئے بیلاروس کے صدر کے دورے کو خراب کیا جائے۔

خیبر پختونخوا کے وزیرِ اعلیٰ علی امین گنڈا پور نے کہا ہے کہ جب تک عمران خان کی ہدایت نہیں ہو گی ڈی چوک سے آگے نہیں جائیں گے۔

علی امین گنڈا پور نے پی ٹی آئی کے قافلے سے خطاب میں کہا کہ عمران خان نے ڈی چوک سے آگے کے علاقے میں جانے کا نہیں کہا۔ اس لیے ان کی ہدایت پر عمل کیا جائے گا۔