پاکستان کے ایوان بالا سینیٹ کے چیئرمین رضا ربانی نے وزیراعظم شاہد خاقان عباسی کو مشورہ دیا ہے کہ اگر امریکی صدر ڈونلڈ ٹرمپ ان سے نہیں مل رہے تو وہ بھی نائب امریکی صدر سے نہ ملیں۔
منگل کو سینیٹ اجلاس کے دوران انہوں نے کہا کہ یہ پاکستان کی تضحیک کے مترادف ہے کہ صدر ٹرمپ وزیراعظم پاکستان سے نہ ملیں۔
چیئرمین سینیٹ نے کہا کہ ذرائع ابلاغ میں آیا ہے کہ وزیراعظم نائب امریکی صدر مائیک پینس سے ملاقات کریں گے۔
سینیٹ کے اجلاس کے دوران چیئرمین رضا ربانی نے کہا کہ پاکستان خطے میں دہشت گردی کے خلاف اہم کردار ادا کر رہا ہے۔ پاکستان کے زمینی اور فضائی راستے سے امریکی سپلائی افغانستان جارہی ہے۔ اس صورت حال میں امریکی صدر ڈونلڈ ٹرمپ کا پاکستان کے وزیر اعظم شاہد خاقان عباسی سے نہ ملنا پاکستان کی توہین ہے۔
انہوں نے مشورہ دیا کہ شاہد خاقان عباسی کو امریکی صدر کی بجائے نائب صدر سے ملاقات نہیں کرنی چاہیے۔ وزیر اعظم کو کہہ دینا چاہیے کہ اگر صدر ڈونلڈ ٹرمپ کے پاس وقت نہیں تو ہمارے پاس بھی ٹائم نہیں ہے۔ جبکہ امریکی صدر کی بجائے نائب صدر کی ملاقات پاکستان کی حیثیت کو کم کرنا ہے۔
چیئرمین سینیٹ نے جنیوا میں بلوچستان کے حوالے پوسٹرز آویزاں کرنے پر بھی حکومت سے وضاحت طلب کرلی۔
