روس کے یو کرین سے اناج چرانے کی خبروں میں صداقت ہے' اینٹنی بلنکن'
امریکی وزیرِ خارجہ اینٹنی بلنکن نے پیر کے روز نامہ نگاروں کو بتایا کہ روس نے دوبارہ فروخت کے لیے اناج چوری کر لیا ہے اور یو کرین کو مکئی برآمد کر نے سے روک رہا ہے۔
امریکی محکمہ خارجہ میں، یو کرین پر حملے کے بعد پیدا ہونے والے خوراک کے تحفظ کے مسئلے پر ایک کانفرنس سے خطاب کرتے ہوئے مسٹر بلنکن نے کہا،" اس بارے میں مصدقہ اطلاعات ہیں کہ روس یو کرین سے اناج چوری کر رہا ہے تاکہ اپنے منافع پر فروخت کر سکے۔"
اخبار نیویارک ٹائمز نے پیر کے روز اطلاع دی ہے کہ روسی کنٹرول والی بندرگاہوں سے متعدد مال بردار جہاز روانہ ہوئے ہیں جن پر امریکی عہدیداروں کے مطابق " چوری شدہ اناج " لدہ ہے۔
اخبار کے مطابق امریکہ نے 14 ایسے افریقی ممالک کو خبردار کر دیا ہے جو اناج کی درآمد پر انحصار کرتے ہیں اور اس کی کمی کا سامنا کر رہے ہیں۔
سیوویوروڈونیسک میں یو کرین اور روسی فوجوں کے درمیان گلیوں میں لڑائی
پیر کے روز سیوویوروڈونیسک میں یو کرین اور روسی فوجوں کے درمیان گلیوں میں لڑائی ہو رہی ہے۔ یو کرین کے اس صنعتی شہر کا ایک نصف یوکرین اور دوسرا نصف حصہ روسی فوجوں کے قبضے میں ہے۔
عددی لحاظ سے روسی فوجوں کو سبقت حاصل ہے لیکن یو کرین کے صدر ولودیمیر زیلنسکی نے کہا ہے کہ کیف کی فورسز کے پاس اب بھی کنٹرول دوبارہ حاصل کرنے کا موقع ہے۔
اس سے پہلے لوہانسک کے گورنر سرہائی ہائیدائی نے کہا تھا کہ یو کرینی فورسز کے پاؤں اکھڑ رہے ہیں۔
صدر زیلنسکی نے پیر کے روز کہا کہ برطانوی وزیرِ اعظم بورس جانسن نے انہیں نئے، بہتر دفاعی امدادی پیکیج کی فراہمی کی یقین دہانی کروائی ہے اور یہ کہ انہوں نے یو کرینی بندرگاہوں کے ذریعےاناج کی برآمد میں رکاوٹیں دور کرنے کے طریقوں پر بھی بات کی ہے تاکہ خوراک کے بحران سے بچا جا سکے۔
روسی صدر پو ٹن نے خبردار کیا ہے کہ اگر مغرب نے یو کرین کو دور تک مار کرنے والے راکٹ فراہم کیے تو روس ان اہداف کو بھی نشانہ بنائے گا جن پر اس نے اب تک حملہ نہیں کیا۔
امریکہ کے بعد برطانیہ کا بھی یوکرین کو دفاع کے لیے جدید سسٹم دینے کا اعلان
برطانیہ نے پیر کو کہا کہ وہ امریکہ کی پیروی کرتے ہوئے روسی حملے سے دوچار ملک یوکرین کو طویل فاصلے تک مار کرنے والے میزائل سسٹم بھیجے گا۔
خبر رساں ادارے ایجنسی فرانس پریس نے رپورٹ کیا ہےکہ برطانیہ کا یہ فیصلہ روس کے صدر ولادیمیر پوٹن کی طرف سے کیف کو جدید ہتھیاروں کی فراہمی کے خلاف انتباہات کی نفی کرتا ہے۔
خبر کے مطابق، یوکرین کی وزارت دفاع نے کہا کہ لندن نے واشنگٹن کے ساتھ ملٹی لانچ راکٹ سسٹم، جسے ایم ایل آر ایس کے نام سے جانا جاتا ہے، کے تحفے پر قریبی تعاون کیا ہے، تاکہ یوکرین کو روسی جارحیت کے خلاف اپنے دفاع میں مدد مل سکے۔
امریکہ کی قیادت میں نیٹو کی بحری مشقوں کا آغاز، فن لینڈ اور سویڈن بھی شریک
مغربی ممالک کے ملٹری اتحاد نیٹو نے امریکہ کی قیادت میں بحیرہ بالٹک میں بحری مشق کا آغاز کردیا ہے جس میں 7,000 سے زیادہ ملاح، فضائیہ اور میرینز شریک ہیں۔
خبر رساں ادارے ایسوسی ایٹڈ پریس کی خبر کے مطابق دو ہفتے تک جاری رہنے والی مشقوں میں فن لینڈ اور سویڈن سمیت 16 ممالک کے 45 جہاز اور 75 طیارے شامل ہیں۔
خیال رہے کہ فن لینڈ اور سویڈن نے، مئی میں نیٹو میں شامل ہونے کے لیے درخواست دی تھی۔
ان دو ممالک کا فیصلہ روس کے 24 فروری کو یوکرین پر حملے کا براہ راست نتیجہ تھا۔