بائیڈن :امریکہ یوکرین میں بند 20 ملین اناج مارکیٹ لانے کے منصوبے پر کام کر رہا ہے

یو کرین کے صدر ولودیمیر زیلنسکی نے منگل کے روز کہا ہے کہ ان کا ملک روسی فورسز سے اپنا تمام علاقہ واپس قبضے میں لے گا۔

انہوں نے یہ بات ایسے وقت میں کہی ہے جب کہ یوکرین کے شہر سیوریو ڈونیسک کی گلیوں میں اب تک کی خونریز لڑائی ہو رہی ہے۔

ان تجاویز کے جواب میں کہ یو کرین کو جنگ ختم کرنے کےلیے علاقہ روس کے حوالے کردینا چاہئیے، زیلنسکی نے کہا،" تعطل کو ئی متبادل نہیں۔ ہمیں اپنا تمام علاقہ واگزار کرواناہے۔"

ڈونیسک کے علاقے کے گورنر پاولو کریلینکو نے یو کرین ٹی وی کو بتایا ہے کہ اگلے محاز پر مسلسل گولہ باری ہو رہی ہے اور روس ڈونیسک میں یوکرین کے قبضے والے دو بڑے شہروں،کراماٹورسک اور سلوویانسک کی جانب بڑھنے کی کوشش کر رہا ہے۔

منگل کے روز روس نے دعویٰ کیا ہے کہ مشرقی یو کرین میں صوبے لوہانسک کے تقریباً تمام علاقے پر اس کا کنٹرول ہو گیا ہے لیکن یو کرین کے عہدیداروں نے کہا ہے کہ ان کے فوجی صنعتی شہر سیویوروڈونیسک میں روسی فوجوں کے

ساتھ گلیوں میں سخت لڑائی کے باوجود اپنا علاقہ نہیں چھوڑ رہے۔

مشرقی یوکرین پر ہفتوں سے جاری روسی حملے کے بعد روسی وزیرِ دفاع سرگئی شوئیگو نے کہا ہے کہ ان کی فورسز لوہانسک کے 97 فیصد علاقے پر قابض ہیں اور ڈونباس کا کچھ علاقہ بھی ان کے کنٹرول میں ہے۔ انہوں نے یہ بات ایسے میں کہی ہے جب تین ماہ سے زیادہ عرصے سے جاری اس جنگ میں روس کو یو کرین کے صدر ولودیمیر زیلنسکی کو اقتدار سے ہٹانے اور دارالحکومت کیف پر قبضہ کرنے میں کامیابی نہیں ہو سکی۔

تاہم یوکرینی عہدیداروں کے بیانات سے ظاہر ہوتا ہے کی روس صوبے ڈونیسک کے تقریباً نصف پر قابض ہو چکا ہے۔

روس منافع کمانے کے لیے یوکرین کے اناج کی برآمدات چوری کر رہاہے، امریکہ

امریکہ کے وزیر خارجہ اینٹنی بلنکن نے کہا کہ "معتبر اطلاعات" کے مطابق روس منافع بخش فروخت کرنے کے لیے یوکرین کے اناج کی برآمدات کی "چوری" کر رہا ہے۔

خبر رساں ادارے رائٹرز کے مطابق بلنکن نے یہ بات مخیر حضرات، غیر سرکاری تنظیموں اور نجی شعبے کے اداروں کے ساتھ ایک ورچوئل گول میز کے دوران بات کرتے ہوئے کہی۔

امریکہ کے اعلی ترین سفارتکار نےکہا کہ مبینہ روسی چوری یوکرین میں اس کی جنگ کے دوران روس کے وسیع تر اقدامات کا حصہ ہے جنہوں نے یوکرین کی گندم کی فصل برآمد کرنے کی صلاحیت کو متاثر کیا اور عالمی غذائی تحفظ کے بحران کو مزید خراب کر دیا۔

خیال رہے کہ یوکرین نے روس پر الزام لگایا ہے کہ وہ اس کا اناج ترکی اور شام سمیت ممالک کو بھیج رہا ہے۔

یورپی کونسل کے صدر چارلز مشیل نے 15 رکنی اقوام متحدہ کی سلامتی کونسل کے سامنے ماسکو پر الزام عائد کیا کہ وہ یوکرین پر حملے سے عالمی خوراک کے بحران کو ہوا دے رہا ہے۔ اس بات پر اقوام متحدہ میں روس کے سفیر واسیلی نیبنزیا اجلاس سے باہر چلے گئے۔

روس ماسکو میں مقیم امریکی نامہ نگاروں کوڈرانے کی کوشش کر رہا ہے، امریکہ

امریکہ نے روس پر الزام عائد کیا ہے کہ وہ ماسکو میں مقیم امریکی نامہ نگاروں کو "ڈرانے" کی کوشش کر رہا ہے۔.

فرانسیسی خبررساں ادارے اے ایف پی نے رپورٹ کیا ہے کہ روسی وزارت خارجہ نے ماسکو میں کام کرنے والے امریکی نامہ نگاروں کو طلب کیا تھا اور امریکی پابندیوں کی وجہ سے جوابی کارروائی کی دھمکی دی تھی۔

واشنگٹن میں دفتر خارجہ کے ترجمان نیڈ پرائس نے نامہ نگاروں کو بتایا، "روسی وزارت خارجہ نے آپ کے ساتھیوں کو ان کے بقول اس لیے طلب کیا ہے کہ 'انہیں میڈیا کے شعبے میں ان کی حکومت کی مخالفانہ لائن کے نتائج کی وضاحت کریں'۔

ترجمان نے کہا کہ یہ بات واضح ہے کہ کریملن میڈیا کی آزادی، معلومات تک رسائی اور سچائی پر مکمل حملے میں مصروف ہے۔

انہوں نے اسے آزاد صحافیوں کو دھمکانے کی واضح کوشش قرار دیا۔

اے ایف پی کی رپورٹ کے مطابق روسی وزارت خارجہ کی ترجمان ماریا زاخارووا نے مئی کے آخر میں دھمکی دی تھی کہ اگر یوٹیوب نے محکمہ کی ہفتہ وار بریفنگ کو بلاک کرنا جاری رکھا تو ماسکو مغربی میڈیا کو ویاں سے نکال دیے گا۔