یوکرین کی جنگ میں اب تک عام شہری ہلاکتیں 925 ہو گئیں، عالمی ادارہ
اقوام متحدہ کے انسانی حقوق کے ادارے او ایچ سی ایچ آر نے کہا ہے کہ یوکرین پر روس کے حملے کے بعد سے سینکڑوں عام شہری ہلاک اور زخمی ہو چکے ہیں۔
ادارے کی پیر کو جاری ہونے والی رپورٹ کے مطابق اب تک ہلاک ہونے والوں کی تعداد 925 ہے جب کہ 1496 عام شہری زخمی ہوئے ہیں۔
عالمی اداے نے کہا ہے کہ زیادہ تر عام شہریوں کی ہلاکتوں کی وجہ دھماکہ خیز ہتھیاروں کا استعمال ہے جس سے ایک بڑا علاقہ متاثر ہوا، اس کے ساتھ ساتھ توپ خانے سے شدید گولہ باری، میزائلوں کا استعمال اور فضائی حملے بھی ان جانی نقصانات کا سبب بنے ہیں۔
روس یوکرین میں حیاتیاتی اور کیمیائی ہتھیار استعمال کر سکتا ہے: جو بائیڈن
امریکہ کے صدر جو بائیڈن نے انتباہ کیا ہے کہ روس کی جانب سے کیف میں حیاتیاتی اور کیمیائی ہتھیاروں کی موجودگی کے جھوٹے دعوے یہ نشاندہی کرتے ہیں کہ روسی صدر ولادی میر پوٹن ممکنہ طور پر ایسے ہتھیار استعمال کرنے کا ارادہ رکھتے ہیں۔
صدر بائیڈن نے یہ تبصرہ پیر کے روز کاروبار سے متعلق ایک کانفرنس کے دوران کیا۔ ان کا یہ بھی کہنا تھا کہ وہ یہ خیال ظاہر کر رہے ہیں کہ یوکرین کے پاس ملک میں حیاتیاتی اور کیمیائی ہتھیار موجود ہیں۔ جو اس جانب ایک واضح اشارہ ہے کہ صدر پوٹن ان دونوں اقسام کے ہتھیاروں کے استعمال پر غور کر رہے ہیں۔
دوسری جانب پیر کے روز روس کی وزارتِ خارجہ نے کہا ہے کہ اس نے امریکہ کے سفیر جان سولیوین کو طلب کر کے بتایا کہ صدر ولادی میر پوٹن کے متعلق صدر جو بائیڈن کے تبصرے ناقابل قبول ہیں، جس کا بظاہر اشارہ صدر بائیڈن کے اس بیان کی طرف تھا جس میں انہوں نے روسی رہنما کو جنگی مجرم قرار دیا تھا۔
یوکرین جنگ: مہاجرین کی تعداد 35 لاکھ سے بڑھ گئی، عالمی ادارہ
مہاجرین کے عالمی ادارے نے کہا ہے کہ یوکرین کی جنگ کی وجہ سے ملک چھوڑ کر جانے والے افراد کی تعداد 35 لاکھ سے بڑھ گئی ہے۔ جب کہ 20 لاکھ سے زیادہ افراد سرحد عبور کر کے پولینڈ میں داخل ہوئے ہیں۔
امن نوبیل انعام یافتہ روسی صحافی کا اپنا میڈل یوکرینی پناہ گزینوں کے فنڈ میں دینے کا اعلان
روس کے 2021 میں امن نوبیل انعام حاصل کرنے والے صحافی دیمتری موراتوف نے کہا ہے کہ وہ یوکرین کے پناہ گزینوں کے لیے فنڈز اکھٹے کرنے کی غرض سے اپنا نوبیل ایوارڈ نیلام کریں گے۔
روسی زبان کے ایک اخبار نووایا گزیٹا میں شائع ہونے والے اپنے ایک بیان میں انہوں نے کہا ہے کہ میں نے اپنا 2021 کا امن نوبیل میڈل یوکرین کے پناہ گزینوں کے فنڈ میں دینے کا فیصلہ کیا ہے۔ میں نیلامی کرنے والے اداروں سے کہا ہے کہ اس عالمی ایوارڈ کی نیلامی کے لیے مجھ سے رابطہ کریں۔
اپنے اس بیان میں یوکرینی پناہ گزینوں کے لیے اپنا امن نوبیل میڈل نیلام کرنے کے ساتھ ساتھ انہوں نے روس سے اپیل کی ہے کہ وہ جنگ بند کرے اور ہلاک ہونے والوں کی نعیشں لواحقین کے سپرد کرے اور قیدیوں کا تبادلہ کرے۔