عالمی ادارۂ صحت (ڈبلیو ایچ او) کی سرپرستی میں کام کرنے والے ادارے کوویکس نے کہا ہے کہ اس نے غریب ملکوں کو کرونا وائرس سے بچاؤ کی ویکسین فراہم کرنے کے لیے چھ ارب ڈالر کا فنڈ اکھٹا کر لیا ہے اور ویکسین کی دو ارب خوراکوں کا آرڈر بھی دے دیا ہے۔
ادارے کا کہنا ہے کہ وہ ویکسین کی مزید ایک ارب خوراکیں حاصل کرنے کا ارادہ رکھتا ہے۔
ادارہ یہ ویکسینز غریب اور کم آمدنی کے ممالک میں صحت عامہ کے کارکنوں کو فراہم کرے گا تاکہ وہ عالمی وبا سے محفوظ رہ کر اپنی ذمہ داریاں نبھا سکیں۔
اگرچہ چین، امریکہ، اسرائیل اور دوسرے ملکوں کو ویکسین کی فراہمی کا سلسلہ جاری ہے۔ تاہم ڈبلیو ایچ او کو خدشہ ہے کہ ویکسین کے اسٹاکس کی تعداد میں جس رفتار سے کمی ہو رہی ہے، اس کے پیش نظر ہو سکتا ہے کہ کم یا درمیانی آمدنی رکھنے والے 92 ملکوں کے ہیلتھ ورکرز کے لیے کوویکس پروگرام کے ابتدائی مرحلے میں ویکسین دستیاب نہ ہو سکے۔
پیر کے روز عالمی ادارۂ صحت نے ویکسین بنانے والوں سے ایک بار پھر اپیل کی ہے کہ وہ غریب ملکوں کے لیے ویکسین کے اس کے پروگرام کوویکس کے لیے کویڈ 19 سے بچاؤ کے ٹیکے فراہم کریں۔
ڈبلیو ایچ او کے سینئر مشیر بروس ایلوارڈ کا کہنا ہے کہ ہمیں توقع ہے اور ہمیں یقین ہے کہ ہم فروری میں ان ملکوں میں ویکسی نیشن کر سکیں گے۔
ان کا کہنا تھا کہ ہم زیادہ سے زیادہ ملکوں میں ویکسین پہنچانے کی ہر ممکن کوشش کر رہے ہیں، لیکن ہم یہ سب کام تنہا نہیں کر سکتے۔ ہمیں ویکسین بنانے والوں کا اور اس سلسلے میں مالی معاونت فراہم کرنے والوں کا تعاون درکار ہے۔
اس سے قبل عالمی ادارہ صحت کے ڈائریکٹر جنرل ڈاکٹر ٹیڈروس یہ کہہ چکے ہیں کہ ویکسین کے کلیدی سپلائرز کو یہ یقینی بنانا چاہئے کہ ہمارے پاس اس یقین دہانی کے لئے ضروری ڈیٹا موجود ہو کہ ویکسین لگانے کا عمل تحفظ اور کوالٹی کے اعتبار سے ہر معیار پر پورا اترتا ہو۔
40 سے زیادہ ملکوں میں کرونا سے بچاؤ کی ویکسین لگانے کا سلسلہ شروع ہو چکا ہے جہاں فائزر، بائیواین ٹیک، موڈرنا، ایسٹرا زینیکا کے ساتھ ساتھ چین اور روس کی تیار کردہ ویکیسنز دی جا رہی ہیں۔
ایلورڈ کا کہنا ہے کہ یہ تمام ممالک امیر اور متوسط آمدنی کے حامل ہیں۔ جب کہ ہم ان غریب ملکوں کے لیے ویکسین حاصل کر رہے ہیں جو اسے خریدنے کی استطاعت نہیں رکھتے۔
