روسی نیم فوجی گروپ ویگنر کئی ممالک سے فوجی بھرتی کر رہا ہے

ایک سینئر امریکی ایلچی نے روس کےنیم فوجی گروپ ویگنر کی سرگرمیوں اور سربیا اور دنیا کے دیگر مقامات پر فوجی بھرتی کرنے کی اس کی کوششوں پر سخت تشویش کا اظہار کیا ہے۔

امریکی محکمہ خارجہ کے کونسلر ڈیرک شولیٹ نے کہا ہے کہ انہوں نے جمعرات کو بلغراد میں سربیا کے صدر الیگزینڈر ووسک کے ساتھ بات چیت کے دوران ان خدشات کا اظہار کیا۔

ویگنر گروپ روسی اولیگارچ یوگینی پریگوزن کی ملکیت ہے اور مبینہ طور پر درجنوں افریقی ریاستوں میں سرگرم ہے، جو روس نواز پراپیگنڈے اور دیگر فوجی اور سیاسی منصوبوں پر حکومتوں کے ساتھ کام کر رہا ہے۔

اس گروپ کو سربیا میں اپنی موجودگی پر ناز ہے۔

یہ بیلاروس کے علاوہ واحد یورپی ریاست ہے جو یوکرین میں جنگ کے لیے روس کے خلاف بین الاقوامی پابندیوں میں شامل نہیں ہوا ہے۔

نارویجن ریفیوجی کونسل کا طالبان قیادت کو کھلا خط: پر خواتین کی تعلیم اور کام پر پابندی کا حکم واپس لیا جائے

نارویجن ریفیوجی کونسل کے ڈائریکٹر جان ایجلینڈ نے قندھارمیں صوبائی گورنر اور علما کونسل کے نام ایک کھلے خط میں طالبان قیادت پر زور دیا کہ وہ خواتین کے کام اور تعلیم پر پابندی ختم کرنے کا حکم نامہ جاری کریں۔

جان ایجلینڈ نے اپنے ٹوئٹر پر ایک خط پوسٹ کیا ہے جس میں کہا گیا ہے کہ ہمارا خط علماء شوری، اسلامی کونسل اور قندھار کے گورنر کو دیا گیا ہے جس میں کہا گیا ہے کہ ہر سطح پر خواتین کی تعلیم اور این جی اوز میں خواتین کے کام کرنے کی اجازت کے نئے حکمنامے جاری کیے جائیں۔

ہیومن رائیٹس واچ کے مطابق طالبان نے افغانستان میں خواتین اور لڑکیوں کے بنیادی حقوق کی بڑے پیمانے پر خلاف ورزی کرتے ہوئے متعدد قوانین اور پالیسیاں نافذ کیں ہیں۔

حقوق سے متعلق عالمی ادارے کا کہنا ہے کہ ان پابندیوں کے نتیجے میں ملک بھر میں 2022 کے دوران شدید معاشی بحران جاری رہا اور لاکھوں بچوں کو شدید غذائی قلت کا سامنا کرنا پڑا۔

اقوام متحدہ افغانستان میں خواتین کے حقوق کی پامالی روکے: ایمنسٹی انٹرنیشنل

ایمنسٹی انٹرنیشنل نے کہا ہے کہ افغانستان پر اقوام متحدہ کی سلامتی کونسل کے بند کمرے کے اجلاس میں اس بات پر توجہ مرکوز کرنی چاہیے کہ طالبان کی طرف سے خواتین اور لڑکیوں پر کام، تعلیم، کھیلوں اور عوامی مقامات تک رسائی پر پابندی کو کیسے واپس لیا جائے۔

24 دسمبر 2022 کوطالبان نے تمام مقامی اور غیر ملکی این جی اوز کو حکم دیا کہ وہ خواتین کو ملازمت نہ دیں۔20 دسمبر کو انہوں نے تمام یونیورسٹیوں کو حکم دیا کہ وہ اگلے نوٹس تک خواتین طالبات کے داخلے نہ کریں۔

نومبر 2022 میں خواتین کو ملک میں پارکوں اورجسمانی ورزش کے مراکز میں داخلے کے حق سے محروم کر دیا گیا۔

طالبان کے قبضے کے بعد سے خواتین کو کھیلوں میں حصہ لینے سے روک دیا گیا ہےجب کہ لڑکیوں کے سیکنڈری اسکولوں کو ملک بھر میں بند کر دیا گیا ہے۔

اس لیے یہ ضروری ہے کہ اقوام متحدہ کی سلامتی کونسل افغانستان میں خواتین اور لڑکیوں کے حقوق کی خلاف ورزیوں کو روکے ۔

ایمنسٹی انٹرنیشنل کی جنوبی ایشیا کے لیے ریجنل ڈائریکٹر یامینی مشرا نے کہا کہ دنیا دیکھ رہی ہے کہ طالبان منظم طریقے سے خواتین کے حقوق کو گزشتہ چند مہینوں کے دوران متعدد امتیازی پابندیوں کے ذریعے ختم کرنے کی کارروائیاں جاری رکھے ہوئے ہیں۔

چین کووڈ کیسز کے درست اعداد و شمار فراہم نہیں کر رہا: عالمی ادارہ صحت

عالمی ادارہ صحت ڈبلیو ایچ او نے بدھ کو چین سے کووڈ کےکیسز میں اضافے کے بارے میں مزید معلومات فراہم کرنے کا مطالبہ کیا ہے ۔

ڈبلیو ایچ او کو اب بھی یقین ہے کہ چین سے اموات کی درست اطلاع نہیں دی جاتی ہے۔

ڈبلیو ایچ او کے ایمرجنسی ڈائریکٹر مائیکل ریان نے صحافیوں کو بتایا کہ ڈاکٹروں اور صحت عامہ کے نظام میں رپورٹ کرنے والوں کی حوصلہ افزائی کی جائے کہ وہ ان کیسوں کی رپورٹ کریں ۔

ریان نے انتہائی نگہداشت کے یونٹوں میں مختص بستروں کی تعداد بڑھانے اور علاج کے شروع میں اینٹی وائرل استعمال کرنےپر چین کی کوششوں کی تعریف کی۔

چین کی جانب سے اعداد و شمار کی کمی کی وجہ سے متعدد ممالک کو چینی مسافروں کی جانچ کی شرط رکھنا پڑی ہے۔

ریان نے کہا کہ اصل اعداد و شمار کی عدم موجودگی کی وجہ سے ان ممالک نے احتیاطی رویہ اپنانے کا فیصلہ کیا ہے اور ایسے حالات میں ان ممالک کا رویہ قابل فہم ہے۔