جنوبی افریقہ: سالگرہ کی تقریب میں فائرنگ، 8 افراد ہلاک
جنوبی افریقہ کی پولیس نے پیر کو بتایا کہ جنوبی بندرگاہی شہر گبیخا میں اختتام ہفتہ سالگرہ کی ایک تقریب میں مسلح افراد نے فائرنگ کر دی جس میں آٹھ افراد ہلاک اور تین زخمی ہو گئے۔
ر فائرنگ میں ہلاک ہونے والوں میں وہ شخص بھی شامل تھا جس کی سالگرہ منائی جا رہی تھی۔
پولیس نے کہا کہ مسلح افراد نے بلا امتیاز فائرنگ کی ۔
حملے کی وجہ ابھی تک معلوم نہیں ہو سکی ہے۔
مشرقی کیپ صوبے کے صوبائی پولیس سربراہ نومتھیلی می نے ان ہلاکتوں کو انسانی زندگی کا ضیان قرار دیتے ہوئے اس کی مذمت کی۔
حملے کی تحقیقات شروع کر دی گئی ہیں اور پولیس کا کہنا ہے کہ حملہ آوروں کی تلاش جاری ہے۔
ترکی کا فن لینڈ کی نیٹو میں شمولیت کی حمایت کرنے کا عندیہ
ترکی کے صدر طیب اردوان نے اتوار کو اشارہ دیا کہ انقرہ فن لینڈ کی نیٹو میں شمولیت پر راضی ہو سکتا ہے۔
سویڈن اور فن لینڈ نے گزشتہ سال یوکرین پر روس کے حملے کے بعد نیٹو میں شمولیت کے لیے درخواست دی تھی اور اس شمولیت کے لیے تمام رکن ممالک کی منظوری درکار ہے۔
ترکی اور ہنگری نے ابھی تک نورڈک ممالک کی رکنیت کی توثیق نہیں کی ہے۔
ترکی کا کہنا ہے کہ سویڈن خاص طور پر کالعدم کردستان ورکرز پارٹی کے عسکریت پسندوں کو پناہ دیتا ہےجس نے 1984 سے ترک ریاست کے خلاف ہتھیار اٹھائے ہوئے ہیں ۔
ترکی نے سویڈن اور فن لینڈ کے ساتھ نیٹو مذاکرات گزشتہ ہفتے اسٹاک ہوم میں احتجاج کے بعد معطل کر دیے تھے جس میں ایک انتہائی دائیں بازو کے سیاست دان نے قرآن کا نسخہ نذر آتش کیا تھا۔
سویڈن کے وزیر اعظم الف کریسٹرس نے کہا کہ ان کا ملک ترکی کے ساتھ نیٹو مذاکرات بحال کرنا چاہتا ہے لیکن ترک وزیر خارجہ میولوت کاووش اوغلو نے جمعرات کو کہا کہ مذاکرات دوبارہ شروع کرنا بے معنی ہے۔
وزیر خارجہ نے یہ بھی کہا کہ سویڈن اور فن لینڈ کی نیٹو میں رکنیت کا الگ الگ جائزہ لینے کی کوئی پیشکش نہیں ہے۔
اسلام آباد میں افغان صحافیوں کا مظاہرہ
اسلام آباد پاکستان میں اتوارکے روز ہونے والے ایک اجتماع میں متعدد افغان صحافیوں نے اپنی صورت حال پر عالمی برادری کی عدم توجہ پر احتجاج کیا۔
افغانستان میں طالبان کے اقتدار سنبھالنے کے بعد درجنوں افغان صحافی پاکستان چلے گئے تھے۔
ان کا کہنا تھا کہ پاکستان میں پناہ لینے والے بیشتر صحافیوں اور میڈیا ورکرز کو مالی مسائل سمیت کئی چیلنجز کا سامنا ہے۔
مظاہرین نے صحافیوں کے لیے کام کرنے والی تنظیموں سے مطالبہ کیا وہ دنیا کی توجہ افغان صحافیوں کے مسائل کی جانب مبذول کرائیں۔
اسلامی تعاون تنظیم کا طالبات کےیونیورسٹیوں میں داخلے پر پابندی کے فیصلے پر مایوسی
اسلامی تعاون کی تنظیم (او آئی سی) نے اتوار کو ایک بیان میں طالبان کے اس فیصلے پر مایوسی کا اظہار کیا ہے جس میں طالبات کے پرائیویٹ یونیورسٹیوں میں داخلے کے امتحانات دینے پر پابندی عائد کی گئی ہے۔
او آئی سی نے ٹویٹ کیا کہ یہ تازہ ترین حکم نامہ کابل حکام کی طرف سے لڑکیوں اورخواتین کی تعلیم اور عوامی کام کے لیے رسائی تک اعلان کردہ وسیع پابندیوں کو مزید سخت کرتا ہے۔
تنظیم نے طالبان حکام سے یہ بھی مطالبہ کیا کہ لڑکیوں کے لیے اسکولوں اور یونیورسٹیوں کو دوبارہ کھولنے کی کوشش کریں اور انہیں تعلیم کی تمام سطحوں اور افغان عوام کو درکار تمام صلاحیتوں کےحصول کے قابل بنائیں۔