خواتین کے حقوق دبانے میں ملوث طالبان کے لیے امریکی ویزوں پر پابندی
امریکہ نے افغانستان میں خواتین اور لڑکیوں پر جبر و استبداد میں ملوث طالبان ارکان کے لیے ویزوں کے اجرا پر پابندی لگا دی ہے۔
امریکی وزیر خارجہ انٹنی بلنکن نے کہا ہے کہ امریکہ بعض موجودہ اور سابق طالبان ارکان، غیر ریاستی سیکیورٹی گروپ کے ارکان، اور دیگر افراد پر نئی ویزا پابندیاں عائد کر رہا ہے جو افغانستان میں خواتین اور لڑکیوں کے حقوق کو دبانے میں ملوث ہیں۔
یہ اعلان طالبان کی جانب سے خواتین کے یونیورسٹیوں میں جانے اور غیر سرکاری تنظیموں کے ساتھ کام کرنے پر پابندی کے اعلان کے ایک ماہ سے زائد عرصے کے بعد سامنے آیا ہے۔
بلنکن نے ان فیصلوں کا حوالہ دیتے ہوئے کہا کہ امریکہ خواتین اور لڑکیوں کے خلاف طالبان کے اقدامات کی سخت ترین الفاظ میں مذمت کرتا ہے۔
بھارتی وزیر اعظم سال کے وسط میں امریکہ کا سرکاری دورہ کریں گے
بھارتی وزیر اعظم نریندر مودی جو اس سے پہلے بھی کئی بار وائٹ ہاؤس کے مہمان بن چکے ہیں، اس سال کے وسط میں صدر جو بائیڈن ایک بار پھر ان کی میزبانی کریں گے۔
بھارتی اخبار ٹائمز آف انڈیا کی ایک رپورٹ میں بتایا گیا ہے کہ صدر بائیڈن نے وزیر اعظم مودی کو اس دورے کی دعوت دی ہے اور دونوں ملکوں کے عہدے دار دورے کی تاریخ کو حتمی شکل دینے کے لیے کام کر رہے ہیں۔
رپورٹ میں یہ امکان ظاہر کیا گیا ہے کہ یہ دورہ جون یا جولائی میں ہو گا۔
اس دورے میں وائٹ ہاؤس میں سرکاری ضیافت اور دوسری تقریبات کے ساتھ ساتھ انہیں کانگریس کے دونوں ایوانوں کے مشترکہ اجلاس سے خطاب کی دعوت بھی دی جائے گی۔
ایران کا اسرائیل پر اصفہان کی فوجی تنصیب پر ڈورن حملے کا الزام، جوابی کارروائی کی دھمکی
ایران نے سرکاری طور پر اس ڈرون حملے کا الزام اسرائیل پر عائد کیا ہے جس نے اختتام ہفتہ اس کے مرکزی شہر اصفہان میں ایک فوجی ورکشاپ کو نشانہ بنایا تھا۔
اس حملے کے بعد ایران نے خبردار کیا تھا کہ وہ جوابی کارروائی کا اپنا جائز حق محفوظ رکھتا ہے۔
اقوام متحدہ میں ایران کے مشن نے جمعرات کو اپنی ویب سائٹ پر شائع ہونے والے ایک خط میں اس حملے کا ذمہ دار اسرائیل کو قرار دیا ہے۔
اسرائیلی حکام نے اس بیان پر تبصرہ کرنے سے انکار کر دیا۔
ایرانی سفیر امیر سعید ایرانی کے دستخطوں سے جاری ہونے اس خط میں یہ انتباہ بھی شامل ہے کہ ایران اسرائیل کے حملے کا جواب دے سکتا ہے۔
عالمی طاقتوں کے ساتھ تہران کے 2015 کے جوہری معاہدے کے خاتمے کے بعد سے اسرائیل نے ایران کے جوہری پروگرام اور دیگر مقامات کو نشانہ بناتے ہوئے کئی حملے کیے ہیں۔
یمن: ڈورن حملے میں القاعدہ کے تین جنگجو ہلاک
یمن میں مقامی سرکاری حکام نے بتایا کہ شمال مشرقی یمن میں ایک مشتبہ امریکی ڈرون حملے میں القاعدہ کے تین مبینہ جنگجو مارے گئے۔
حکام نے بتایا کہ یہ حملہ ماریب صوبے میں ایک کار پر کیا گیا، جو یمن کی طویل عرصے سے جاری خانہ جنگی میں 2021 سے شدید لڑائی کا گڑھ ہے۔
ایک سرکاری اہل کار نے نام ظاہر نہ کرنے کی شرط پر اے ایف پی کو بتایا کہ ایک مجوزہ امریکی ڈرون کے حملے میں القاعدہ کے تین ارکان مارے گئے ۔
تینوں وادی عبیدہ میں ایک کار میں تھے جب انہیں مشتبہ امریکی حملے میں نشانہ بنایا گیاجس میں وہ فوراً ہلاک ہو گئے۔
ماریب کے ایک دوسرے سرکاری اہل کار نے القاعدہ کے عسکریت پسندوں پر حملے اور ہلاکتوں کی تعداد کی تصدیق کی۔
واشنگٹن کی جانب سے فوری طور پر کوئی تبصرہ نہیں کیا گیا۔
امریکہ القاعدہ کی یمن کی شاخ - جزیرہ نما عرب میں القاعدہ کو عالمی جہادی نیٹ ورک کی سب سے خطرناک شاخوں میں شمار کرتا ہے۔
یمن 2015 سےجنگوں کی لپیٹ میں ہے اور اقوام متحدہ اسے بدترین انسانی بحران قرار دیتا ہے جس میں لاکھوں لوگ بے گھر ہو چکے ہیں۔