پاکستان سپر لیگ کے آٹھویں ایڈیشن کو شروع ہونے سے چند دن پہلے لیفٹ آرم اسپنر آصف آفریدی پر اینٹی کرپشن کوڈ کی خلاف ورزی پر دو سال کی پابندی نے ان پرانے تنازعات کوایک بار پھر زندہ کردیا جنہیں شایقین ہر سال بھلانے کی کوشش کرتے ہیں۔
آصف آفریدی کو کشمیر پریمیئر لیگ کے دوران میچ فکسنگ کی پیشکش کے بارے میں متعلقہ حکام کو آگا ہ نہ کرنے پر دو سال کے لیے معطل کیا گیا، جس سے ان کی ٹیم سابق چیمپئنز ملتان سلطانز کو ایونٹ سے قبل ایک جھٹکاضرور لگا۔
آصف آفریدی سے پہلے بھی کئی کھلاڑی پی ایس ایل سے قبل یا اس کے دوران اپنی نااہلی کی وجہ سے نقصان پہنچا چکے ہیں لیکن مداحوں نے ایک کھلاڑی کی غلطی کی سزا پوری لیگ کو نہ دے کر اس پر بھروسے کا ثبوت دیا۔
کبھی کوئی انٹرنیشنل کھلاڑی اہم میچ سے قبل لیگ چھوڑ کر چلا گیا ، تو کبھی دو پاکستانی کرکٹرز کی بلاوجہ لڑائی نے شایقین کو بددل کیا، لیکن جہاں ان واقعات کی وجہ سےلیگ کی جگ ہنسائی ہوئی، وہیں اس میں ہونے والے کانٹے کے مقابلوں نے ان تنازعات کو دبا نے میں اہم کردار ادا کیا۔
جس لیگ نے پاکستان کو کئی اسٹار کھلاڑی دیے ، جس کی وجہ سے انٹرنیشنل کرکٹ کی پاکستان میں واپسی ہوئی اور جسے مبصرین بلاشبہ ایک بہتر لیگ کہتے ہیں، اس میں اور کن کن تنازعات نے جنم لیا، آئیے جانتے ہیں۔
#PSL8 trophy 👌📸: @thePSLt20 pic.twitter.com/vVzP6n8U2Y
— CricTracker (@Cricketracker) February 9, 2023
جب دو انٹرنیشنل کھلاڑیوں نے طیش میں آکر شایقین کو بری طرح مایوس کیا
پاکستان سپر لیگ کے پہلے ایڈیشن میں جہاں شایقین کا جوش و خروش دیدنی تھا، وہیں کھلاڑی بھی کسی سے پیچھے نہیں تھے۔ ایسےمیں کوئٹہ گلیڈی ایٹرز اور پشاورزلمی کے درمیان ایک میچ میں وہاب ریاض اور احمد شہزادکے درمیان ہونے والی لڑائی نے مداحوں کوسخت مایوس کیا۔
جس وقت یہ واقعہ پیش آیا اس ووقت دونوں کھلاڑی قومی کرکٹ ٹیم کا حصہ تھے جس کی جہ سے اس واقعہ کو دنیا بھر کے پریس نے خوب اچھالا۔ معاملہ اس وقت بگڑا جب ایک گیند پر باؤنڈری کھانے کے بعد بائیں ہاتھ سے بالنگ کرنے والے وہاب ریاض نے احمد شہزاد کو آؤٹ کرکے زوردار جشن منایا۔
It%27s getting heated out there. Wahab Riaz versus Ahmed Shehzad #HBLPSL #Cricket pic.twitter.com/WZ1IefCriu
— Saj Sadiq (@SajSadiqCricket) February 14, 2016
وہاب ریاض کا وکٹ حاصل کرنے پر خوش ہونا آؤٹ ہونے والے بلے باز کو ایک آنکھ نہ بھایا اور دونوں کےدرمیان پہلے تکرار ہوئی جس کے بعد دونوں ایک دوسرے کی جانب بڑھے۔ اس سے پہلے کے معاملہ مزید خراب ہوتا،امپائرز اور ساتھی کھلاڑیوں نے دونوں کے درمیان بیچ بچاؤ کرایا۔
دونوں کی اس حرکت نے پی ایس ایل کو پہلے ہی سیزن میں بدنام کیا، اور اسی وجہ سے میچ ریفری روشن ماہنامہ نے احمد شہزاد پر میچ فیس کا 30 فیصد اور وہاب ریاض پر 40 فیصد جرمانہ کرکے انہیں آئندہ ایسا نہ کرنے کی تنبیہ کی۔
پی ایس ایل کے دوسرے ایڈیشن میں سامنے آنے والا اسپاٹ فکسنگ اسکینڈل
پہلے کامیاب سیزن کے بعد پاکستان سپرلیگ کی مقبولیت میں اضافہ ہوا جس کی وجہ سے سٹے بازوں نے اس لیگ کا رخ کیا، لیکن انڈین پریمیئر لیگ میں ہونے والی فکسنگ سے انتظامیہ آگاہ تھی اور یہی وجہ ہے کہ دوسرے ایڈیشن کے دوران کئی کھلاڑی پی سی بی کے اینٹی کرپشن یونٹ کی پکڑ سے نہ بچ سکے۔
دوسری پی ایس ایل میں جن کھلاڑیوں کو فکسنگ میں ملوث ہونے یا پھر بک میکرز کی طرف سے ہونے والی پیشکش کی بروقت اطلاع نہ دینے پر پابندی لگی ان میں شرجیل خان، خالد لطیف، ناصر جمشید، محمد عرفان، شاہزیب حسن اور محمد نواز شامل تھے۔
The Pakistani cricketer Sharjeel Khan banned for five years in spot fixing. pic.twitter.com/Q44F0ANYHA
— Zain Khan (@ZKhanOfficial) August 30, 2017
کراچی کنگز کے شرجیل خان پر الزام تھا کہ انہوں نے 20 لاکھ روپے کے بدلے میں دو ڈاٹ بال کھیلیں جب کہ خالد لطیف نے ساتھی کھلاڑیوں کو شہہ دی کہ وہ بھی فکسنگ کا حصہ بنیں۔ دونوں کھلاڑیوں پر الزام ثابت ہونےکی بنا پر پانچ پانچ سال کی پابندی لگی۔
لیکن سب سے زیادہ سزا جس کھلاڑی کو ملی وہ تھے سابق انٹرنیشنل کھلاڑی ناصر جمشید جنہیں دس سال کے لیے کھیل سے دور کردیا گی۔ اسپاٹ فکسنگ میں ملوث ہونے کے شبے میں انہیں پہلے معطل کیا گیا تھا لیکن الزامات ثابت ہونے کے بعد ان پر دس سال کی پابندی لگادی گئی۔
جب 'ریلو کٹے' کرکٹرز کو دوسرے ایڈیشن کے فائنل کے لیے مدعو کرنا پڑا
پاکستان سپرلیگ کے دوسرے ایڈیشن کا فائنل پاکستان میں ہونےکا کیااعلان ہوا، کئی اہم کھلاڑیوں نے پاکستان آنے سے معذرت کرلی جس میں انگلینڈ کے کیون پیٹرسن ، ویسٹ انڈیز کے کرس گیل اور سری لنکا کے کمار سنگاکار کا نام سرفہرست تھا۔
ان کھلاڑیوں نے سیکیورٹی وجوہات کو بنیاد بناکر پاکستان نہ آنے کا فیصلہ کیا جس کے بعد بورڈ نےچند ایسےکھلاڑیوں کو بطور متبادل مدعو کیا جن کا انٹرنیشنل کرکٹ میں بڑا مقام نہیں تھا، انہی کرکٹرز کو مایہ ناز سیاستدا ن و سابق کرکٹرعمران خان نے ریلو کٹے کہہ کر اپنے اور کھلاڑیوں کے مداحوں کی جو دل آزاری کی اس سے اس ایونٹ کو نقصان پہنچا۔
جب ناقص امپائرنگ نے کرکٹرز اور شایقین دونوں کو مایوس کیا
پاکستان سپر لیگ کے ہونے والے ساتوں ایڈیشن میں زیادہ تر میچوں میں امپائرنگ کا معیار اچھا رہا ہے تاہم اہم مواقع پر ناقص امپائرنگ سے کئی میچز متاثر ہوئے۔
تیسری پی ایس ایل کے دوران اسلام آباد یونائیٹڈ اور پشاور زلمی کے درمیان ایک میچ کے دوران ایسے ہی ایک فیصلے نے اسلام آباد کی شکست میں اہم کردار ادا کیا تھا۔
جب موبائل فون کے استعمال کی وجہ سے پانچواں پی ایس ایل ایڈیشن مشکوک بن گیا!
پاکستان سپر لیگ کے پانچویں ایڈیشن میں اس وقت ایک عجیب صورت حال پیدا ہوگئی جب کراچی کنگز کے ڈگ آؤٹ میں ایک غیر متعلقہ شخص کو موبائل استعمال کرتے ہوئے کیمرے نے دیکھ لیا۔
Mobile phone being used in the dugout during the Karachi Kings versus Peshawar Zalmi match today #PSLV #KKvPZ pic.twitter.com/bmDi4WCeUG
— Saj Sadiq (@SajSadiqCricket) February 21, 2020
آئی سی سی کے قوانین کے مطابق ڈگ آؤٹ میں موبائل فون کا استعمال صرف اور صرف مینجر کرسکتا ہے جو ٹیم شیٹ کے مطابق طارق وصی نہیں تھے، بلکہ نوید راشد تھے۔
جب کرونا کی وجہ سے پی ایس ایل کا چھٹا ایڈیشن تعطل کا شکار ہوا
پاکستان سپر لیگ کا چھٹاایڈیشن 2021 پاکستان میں بائیو سیکیور ببل میں زور و شور سے جاری تھا کہ دو ہفتے کے اندر اندر چھ کھلاڑیوں اور ایک آفیشل کے کرونا میں مبتلاہونے کی وجہ سے اسے معطل کرنا پڑا۔
لیگ کے باقی میچز کا انعقاد اسی سال جون میں متحدہ عرب امارات میں تو ہوگیا لیکن اس سے قبل فرانچائز مالکان نے بورڈ کو جلدبازی میں لیگ منعقد کرانے پر آڑھے ہاتھوں لیا جس کےنتیجے میں بورڈ کے ملازم ڈاکٹرسہیل سلیم کو مستعفی ہونا پڑا۔
جب ایک آسٹریلوی کھلاڑی نے غلط بیانی کرتے ہوئے لیگ کو بدنام کرنے کی ناکام کوشش کی!
سابق آسٹریلوی فاسٹ بالر جیمز فاکنر نے گزشتہ سال ہونے والے پی ایس ایل کے ایڈیشن کے دوران اپنی فرانچائز کوئٹہ گلیڈی ایٹرز پر مالی تقاضے پورے نہ کرنے کا الزام لگا کر لیگ سے دستبرداری اختیار کی، تاہم جاتے جاتے وہ جس ہوٹل میں ٹھہرے تھے اس میں توڑ پھوڑ کے مرتکب پائے گئے۔
جیمر فاکنر کے الزامات کا جواب دیتے ہوئے پی سی بی اور کوئٹہ گلیڈی ایٹرز نے کھلاڑی کے قابل مذمت رویے پر افسوس کا اظہار بھی کیا ہے اور بتایا کہ سات سال میں کسی بھی غیر ملکی کرکٹر نے کنٹریکٹ کی ذمہ داریوں کو پورا نہ کرنے کی شکایت نہیں کی۔
PCB and Quetta Gladiators strongly refute James Faulkner%27s baseless allegationsMore details ⤵️https://t.co/AwAOWjF1261/2 pic.twitter.com/cR3Il1MKTd
— Pakistan Cricket (@TheRealPCB) February 19, 2022
بورڈ کے مطابق جس بے ضابطگی کا الزام جیمز فاکنر لگارہے تھے اس کےذمہ دار ان کے اپنے ایجنٹ ہیں جنہوں نے دسمبر 2021 میں ادائیگی کے لیے فاکنر کے برطانوی بینک اکاؤنٹ کی تصدیق کی تھی۔
آسٹریلوی کھلاڑی کی سنگین بدتمیزی کا سنجیدگی سے نوٹس لیتے ہوئے بورڈ نے یہ بھی کہا کہ یہ الزامات پی سی بی، اور پاکستان سپر لیگ کو بدنام کرنے کی کوشش تھی جس کے بعد فیصلہ کیا گیا کہ جیمز فالکنر کو آئندہ ایونٹ میں شامل نہیں کیا جائے گا۔
جب ایلکس ہیلز مسلسل ببل میں رہنے کی وجہ سے لیگ سے باہر گئے، اور پھر واپس بھی آگئے!
انگلش کرکٹر ایلکس ہیلر کا شمار بلاشبہ ان کرکٹرز میں ہوتا ہے جن کی انٹرنیشنل کرکٹ میں واپسی پی ایس ایل کے مرہونِ منت ہے ۔ گزشتہ سال پی ایس ایل کے دوران لیگ سے کنارہ کشی سے ان کے مداح تو سخت مایوس ہوئے تھے لیکن انہوں نے اسے ناگریز قرار دیا تھا۔
🚨 Red Alert 🚨 #HaleStorm returns!! @AlexHales1 is back in Pakistan and is available for the remaining Islamabad United matches. #HBLPSL7 #UnitedWeWin #RedHotSquad🦁 pic.twitter.com/P6Fz0Q2Ahk
— Islamabad United (@IsbUnited) February 23, 2022
تاہم ساتھی کھلاڑیوں کی انجری کی وجہ سے وہ دوبارہ اسلام آباد یونائیٹڈ کی ٹیم میں واپس آئے اور بغیر بائیو سیکیور ببل کا حصہ بنےانہوں نے پلے آف مرحلے میں اپنی ٹیم کی نمائندگی کی اور انہیں ایک میچ میں کامیابی دلانے میں بھی اہم کردار ادا کیا۔